بابا صدیقی کی وفات کے بعد سلمان خان کی حفاظت کے بارے میں تشویش: ‘پہلے دھمکی ملی تو میں نے کہا زندگی اور موت خدا کے ہاتھ میں ہے’

بالی وڈ کے سابق ہدایت کار سلیم خان کا کہنا ہے کہ جب ان کے ’دبنگ‘ بیٹے سلمان خان نے کسی جانور کو مارا ہی نہیں تو وہ معافی کیوں مانگیں۔

انڈین چینل اے بی پی نیوز کو دیے گئے انٹرویو میں ان کا کہنا تھا کہ سلمان خان جانوروں سے کافی لگاؤ رکھتے ہیں اور وہ بندوق نہیں اٹھاتے۔

یاد رہے کہ سلمان خان کو لارنس بشنوئی نامی گروپ کی جانب سے جان سے مارنے کی نہ صرف دھمکیاں دی گئی ہیں بلکہ ان کے گھر پر فائرنگ بھی ہوئی۔

ان تمام معامالات کے تانے بانے 25 سال پرانے اس واقعے اور مقدمے سے جڑے ہیں جب کالے ہرن کے شکار کے الزام میں سلمان خان کو بری کر دیا گیا تھا۔ اس گروہ کا تعلق ایک مذہبی فرقے سے ہے جو کالے ہرن کو مقدس مانتا ہے اور انڈین قانون کے مطابق اس کے شکار پر پابندی ہے۔

اس گروپ نے ماضی میں سلمان خان کو سنہ 1998 میں کالے ہرن کے شکار کے معاملے مبینہ طور پر قتل کرنے کی دھمکی دی تھی اور ان پر حملہ کرنے کی کوشش کی تھی جب وہ راجستھان میں بلاک بسٹر فلم ’ہم ساتھ ساتھ ہیں‘ کی شوٹنگ کر رہے تھے۔

رواں برس اپریل میں بھی صبح سویرے سلمان خان کے گھر کے باہر فائرنگ کی گئی۔ پولیس کے مطابق اس حملے کے الزام میں دو نوجوانوں کو گرفتار کیا گیا تھا اور پنجاب اور ہریانہ میں سرگرم لارنس بشنوئی گروپ نے ان دونوں نوجوانوں کو سلمان خان کو مارنے کی ذمہ داری سونپی تھی۔

سلمان خان نے 100 سے زیادہ فلمیں کی ہیں۔ انھیں کالے ہرن کے شکار کے معاملے میں سنہ 2018 میں محفوظ جانوروں کے غیر قانونی شکار کے جرم میں پانچ سال قید کی سزا سنائی گئی تھی لیکن بعد میں ان کی سزا معطل کر دی گئی۔

لارنس بشنوئی اس وقت سنہ 2022 میں انڈین گلوکار سدھو موسے والا کے قتل سمیت متعدد ہائی پروفائل قتل کے مقدمات میں ملوث ہونے کی وجہ سے جیل کی سزا کاٹ رہے ہیں۔

بابا صدیقی کی موت کے بعد سلمان کے تحفظ پر خدشات

حال ہی میں ممبئی کی ایک معروف سیاسی شخصیت بابا صدیقی کو گولیاں مار کر قتل کر دیا گیا تھا۔ وہ سلمان خان کے بہت اچھے دوست سمجھے جاتے تھے۔

یہی وجہ ہے کہ اب سلمان خان کی سلامتی کے بارے میں خدشات بڑھ رہے ہیں۔

بابا صدیقی کے بارے میں کہا جاتا ہے کہ ان کی بالی وڈ کے کئی اداکاروں سے دوستی تھی اور وہ ماہِ رمضان کے دوران اپنی بڑی افطار پارٹیوں کے لیے بھی مشہور تھے۔

سلمان خان کے قریبی دوست بابا صدیقی کی موت کو سلمان خان کی زندگی کی ممکنہ وجہ قرار دینے پر، سلیم خان نے کہا کہ 'بابا صدیقی ایک دوست تھے، ہم ان سے ملتے تھے۔ وہ سلمان کے ساتھ سکول بھی پڑھتے تھے۔ مجھے دکھ ہوا ہے۔ ہم سب ان کے جنازے میں بھی گئے تھے۔'

سلیم خان نے مزید کہا کہ 'بابا صدیقی نے بہت سے لوگوں کی مدد کی، کچھ لوگوں کے ساتھ ان کے جھگڑے بھی ہوئے ہوں گے، لیکن ہمارے ساتھ ان کا تعلق بہت اچھا تھا۔'

'اس سے پہلے بھی دھمکی ملی تھی، تو میں نے کہا تھا کہ زندگی اور موت اللہ کے ہاتھ میں ہے।'

یہ بھی پڑھیں: اسرائیلی قیادت میں اندرونی اختلافات، نیتن یاہو نے اپنے وزیر دفاع کو برطرف کردیا

'معافی مانگنے کا مطلب اعترافِ جرم کرنا ہے'

سلمان خان کو ملنے والی دھمکیوں کے بعد، پولیس نے ان کے خاندان کو احتیاطی تدابیر اختیار کرنے کو کہا تو سلیم خان نے کہا کہ 'پولیس والوں کی بات ماننے میں کوئی حرج نہیں۔ مجھے اس معاملے میں کوئی مسئلہ نہیں۔'

سلیم خان نے بتایا کہ جب ان کے گھر پر فائرنگ ہوئی تو پولیس نے کہا کہ وہ وہاں بیٹھنے سے منع کریں۔ اسی طرح، گھر کی مختلف جگہوں پر موجود رہنے سے بھی منع کیا تو انھوں نے سب مان لیا۔

سلیم خان نے کہا کہ 'یہ سب کام ہمارے لیے کیا جا رہا ہے، ہماری حفاظت کے لیے، اس لیے ہمیں ان کی بات سننی چاہیے۔'

بشنوئی گروپ کی جانب سے مطالبہ کیا گیا کہ سلمان خان راجستھان جا کر کسی مندر میں معافی مانگیں، تو سلیم خان نے کہا کہ 'وہ کہتے ہیں معافی مانگ لو، کس چیز کی معافی مانگیں، معافی تب مانگی جاتی ہے جب آپ نے کچھ کیا ہو۔'

انھوں نے مزید کہا کہ 'معافی میں کہا جاتا ہے کہ میں اعترافِ جرم کرتا ہوں، اس لیے اب مجھے معافی دے دو۔ جن لوگوں کو تکلیف دی ہو یا جنہوں نے گناہ کیا ہو، ان سے معافی مانگی جاتی ہے۔'

وہ زور دے کر پوچھتے ہیں، 'کس بات کی معافی مانگیں؟'

سلیم خان نے وضاحت کرتے ہوئے کہا کہ 'یہ کہنا تو یہ ماننا ہے کہ ہم نے کسی کو مارا ہے۔ سلمان نے تو کبھی کسی جانور کو بھی نہیں مارا۔'

ان کا کہنا تھا کہ 'میں خود بھی جانوروں کو بہت پسند کرتا ہوں۔'