راولپنڈی کی باربی کیو پچ اور پاکستان کی وقار کی بحالی

یہ کیسے ممکن ہے کہ ٹیسٹ کرکٹ راولپنڈی لوٹے اور پچ سے جڑے مباحث کی گرد نہ اڑے؟ جب سے پاکستان میں ہوم کرکٹ بحال ہوئی ہے، تب سے راولپنڈی کی پچ نے کئی مختلف روپ دکھائے ہیں جن میں سے کچھ پاکستان کے لیے بھیانک بھی ثابت ہوئے ہیں۔

تین سال پہلے سری لنکن ٹیم کے خلاف جب پاکستان اسی پچ پر کھیلا تو یہ روایتی راولپنڈی پچ تھی، جس میں پیس اور باؤنس تھا۔ میچ کے دوران جہاں سپنرز کے لیے کچھ سازگار حالات تھے، وہیں پرانی گیند کے ساتھ ریورس سوئنگ بھی فیصلہ کن ثابت ہوئی۔

پھر جب جنوبی افریقہ کے خلاف پاکستان اسی پچ پر اترا تو جنوری کا یخ بستہ موسم گھاس سے ہری بھری پچ کے لیے موزوں رہا۔ ایسی گرین ٹاپ وکٹ دیکھنے کو ملی جس پر میچ چار دن بھی مکمل نہ کر پایا اور پیسرز نہال رہے۔

یہ دونوں واقعات تب ہوئے جب پی سی بی کی حالیہ تاریخ کا مستحکم ترین دور تھا۔ احسان مانی کی قیادت میں پاکستان کرکٹ اپنے سٹائل اور ہوم گراؤنڈز کے تنوع کی شناخت پیدا کر رہی تھی لیکن یہ استحکام زیادہ برقرار نہ رہ پایا اور رمیز راجہ آن پہنچے۔

رمیز راجہ کے زیرِ انتظام پاکستان کی آسٹریلیا کے خلاف سیریز وہ موقع تھا جب راولپنڈی کی پچ کو ’نیوٹرل‘ کرنے کا فیصلہ کیا گیا۔ اس اقدام کی بدولت وہ پچ پیدا ہوئی جہاں پانچ روز میں پندرہ وکٹیں بھی حاصل نہ ہو سکیں۔

اس حکمتِ عملی کا جواز رمیز راجہ نے یہ پیش کیا تھا کہ آسٹریلوی پیسرز کو باؤنس سے محروم کرنے کے لیے ایسی پچ تیار کی گئی تاکہ وہ میچ میں فیصلہ کن کردار ادا نہ کر سکیں، مگر اب یہ انکشافات سامنے آ رہے ہیں کہ پچ بدلنے کا وہ فیصلہ دراصل بابر اعظم کا تھا۔

رمیز راجہ کے مطابق بابر اعظم ایسی پچ چاہتے تھے جو بلے بازی کے لیے آسان ہو۔

بہر طور، یہ جس کا بھی فیصلہ تھا مگر اس ایک فیصلے سے شروع ہونے والا زوال ایسا دامن گیر ہوا کہ پھر چار سال تک پاکستان کرکٹ کسی ہوم ٹیسٹ میں جیت کو ترستی ہی رہی۔

اب جبکہ دوسرے ملتان ٹیسٹ میں سپن وکٹ نے پاکستان کو امید کی کرن دکھائی تو راولپنڈی میں بھی پچھلے پانچ دن سے ویسی ہی پچ کی تیاری جاری ہے جو پاکستان کا کھویا ہوا وقار بحال کر سکے۔

یہ کہنا البتہ مشکل ہے کہ الیکٹرک ہیٹرز اور پنکھوں کے ذریعے پچ کو خشک بلکہ باربی کیو کرنے کا عمل کس قدر موثر ثابت ہو گا کیونکہ جو ’ٹرن‘ ملتان کی پچ میں سات روز استعمال کے بعد پیدا ہوا، یہاں شاید وہ تیسرے دن سے پہلے پیدا نہ ہو پائے۔

ایسے میں پاکستان کے لیے دقت یہ ہے کہ انگلش ٹیم کے برعکس ان کے پاس صرف ایک پیس آل راؤنڈر کی خدمات دستیاب ہیں جبکہ انگلش ٹیم کا توازن زیادہ بہتر ہے کہ اسے تین فرنٹ لائن سپنرز شامل کرنے کے بعد بھی دو پیس آپشنز مہیا رہتے ہیں۔

گو کہ ملتان کی گرمی اور کنڈیشنز نے جو ریورس سوئنگ مہیا کی تھی، ویسی شاید راولپنڈی میں دیکھنے کو نہ ملے، مگر پھر بھی بین سٹوکس اور گس ایٹکنسن کی کئی بولنگ اس پچ کے دوغلے باؤنس کا فائدہ اٹھا سکتی ہے۔