یوکرین کا روس پر برطانوی ساختہ میزائل حملہ: سٹارم شیڈو میزائل کیا ہے اور یہ یوکرین کے لیے کیوں اہم ہے؟

Uses in Urdu کو معلوم ہوا ہے کہ یوکرین نے پہلی مرتبہ روس کے اندر اہداف کو نشانہ بنانے کے لیے برطانیہ کے تیار کردہ سٹارم شیڈو میزائل کا استعمال کیا ہے۔

تاہم برطانوی سیکریٹری دفاع جون ہیلی نے اس بات کی تصدیق کرنے سے گریز کیا ہے کہ یوکرین نے روس پر برطانوی ساختہ میزائل سے حملہ کیا ہے۔

سیکریٹری دفاع جون ہیلی نے برطانیہ کے دارالعوام میں بات کرتے ہوئے کہا کہ 'میدانِ جنگ میں یوکرین کے اقدامات بولتے ہیں۔'

انھوں نے اراکین دارالعوام کو بتایا کہ گذشتہ روز ان کی اپنے یوکرینی ہم منصب سے فون پر گفتگو ہوئی تھی اور انھوں نے روس کے جارحانہ اقدامات پر 'مضبوط ردِ عمل دینے' پر تبادلہ خیال کیا۔

تاہم سٹارم شیڈو میزائل کے استعمال کی تصدیق یا تردید نہ کرتے ہوئے ان کا کہنا تھا کہ 'اس وقت میں مزید آپریشنل تفصیلات میں نہیں جا سکتا۔'

برطانیہ اور فرانس نے پہلے ہی ان میزائلوں کو یوکرین بھیج دیا تھا اور اس کے پاس ان میزائل کی کثیر تعداد موجود ہے، تاہم ملک پر پابندی تھی کہ وہ روس کے خلاف ان کا استعمال نہیں کر سکتا چاہے روس کے طیارے یوکرین کی اپنی سرحدی حدود میں ہی کیوں نہ گردش کر رہے ہوں۔

یوکرین کے دارالحکومت کیئو کی جانب سے کئی ہفتوں سے درخواست کی جا رہی تھی کہ اسے روس کے خلاف یہ میزائل استعمال کرنے کی اجازت دے دی جائے۔ مگر مغربی ممالک یوکرین کو یہ اجازت دینے میں کترا رہے تھے۔

مگر امریکہ کی جانب سے ٹیکٹکل میزائلوں کو روس کے خلاف استعمال کرنے کی اجازت کے بعد یوکرین نے سٹارپ شیڈو میزائل سے بھی روس میں اہداف کو نشانہ بنایا ہے۔

سٹارم شیڈ میزائل کیا ہے اور ان میزائلوں کے استعمال سے جنگ پر کیا اثر پڑے گا؟

سٹارم شیڈو میزائل کیا ہے؟

سٹارم شیڈو ایک اینگلو فرانسیسی کروز میزائل ہے جو زیادہ سے زیادہ تقریباً 250 کلومیٹر تک کا فاصلہ طے کر سکتا ہے۔ فرانسیسی اسے 'سکیلپ' کہتے ہیں۔

اسے ہوائی جہاز سے لانچ کیا جاتا ہے۔ یہ تقریباً آواز کی رفتار پر اپنے ہدف تک پرواز کرتا ہے اور پھر نیچے گرنے سے پہلے اپنے 'وار ہیڈ' (میزائل کا وہ حصہ جس میں دھماکہ خیز مواد موجود ہوتا ہے) کو دھماکے سے اڑا دیتا ہے۔

سٹارم شیڈو کو مضبوط بنکرز اور گولہ بارود کے گوداموں میں گھسنے کے لیے ایک مثالی ہتھیار سمجھا جاتا ہے، جیسے وہ میزائل جو روس نے یوکرین کے خلاف اپنی جنگ میں استعمال کیے۔

تاہم ایک سٹارم شیڈو میزائل کی لاگت تقریباً دس لاکھ امریکی ڈالر ہے۔ اس لیے ان کو استعمال کرنے سے پہلے سستے ڈرونز استعمال کیے جاتے ہیں، جن سے دشمن کا فضائی دفاع کمزور بنایا جا سکے اور ڈرونز کا مقابلہ کرنے کے لیے اس کا زیادہ سے زیادہ گولہ بارود استعمال ہو جائے۔ بالکل اسی طرح روس بھی یوکرین کے ساتھ کرتا ہے۔

ماضی میں سٹارم شیڈو کو موثر انداز میں استعمال کیا گیا ہے۔ اس میزائل کے ذریعے کرائیمیا میں روس کے بحیرہ اسود میں واقع نیول ہیڈکوارٹر کو نشانہ بنایا گیا تھا جس کے بعد کرائیمیا روس کی بحریہ کے لیے خطرناک قرار دے دیا گیا تھا۔

برطانوی فوج کے سابق افسر اور فوجی تجزیہ کار جسٹن کرمپ کا کہنا ہے کہ سٹارم شیڈو یوکرین کے لیے انتہائی موثر ہتھیار ثابت ہوا ہے، جس سے انھوں نے مقبوضہ علاقے میں انتہائی محفوظ اہداف پر ٹھیک نشانہ لگایا۔

ان کے خیال میں ’یہ تعجب کی بات نہیں کہ کیئو نے روس کے اندر اس میزائل کے استعمال کے لیے لابنگ کی ہے۔ خصوصاً ان فضائی اڈوں کو نشانہ بنانے کے لیے جہاں سے یوکرین کے اگلے مورچوں کو گلائیڈ بم حملوں کے ذریعے نشانہ بنایا گیا ہے۔‘

یہ بھی پڑھیں: آئی ایم ایف سے قرض کی دوسری قسط کی منظوری، انٹربینک میں ڈالر کی قیمت میں بڑی کمی

یوکرین اب کیوں سٹارم شیڈو استعمال کرنا چاہتا ہے؟

یوکرین کے اگلے مورچوں اور شہروں پر روس کی جانب سے روزانہ کی بنیاد پر حملے ہوتے ہیں۔

روسی طیاروں نے اپنی سرحدی حدود کے اندر سے کئی مرتبہ میزائلوں اور گلائیڈ بموں کے ذریعے یوکرین میں موجود کئی فوجی مورچوں، فلیٹس اور ہسپتالوں پر حملے کیے ہیں۔

کیئو کی شکایت ہے کہ اسے ان روسی مورچوں پر حملہ کرنے کی اجازت نہ ہونا اس طرح ہے جیسے اسے ایک بازو کے ساتھ جنگ لڑنے کا حکم دیا گیا ہو۔

فوجی تجزیہ کار جسٹن کرمپ نے بتایا کہ ’میں نے ستمبر میں پراگ میں گلوبسیک سکیورٹی فورم میں شرکت کی تھی جہاں اس بات پر بحث ہوئی کہ روس کے فوجی مورچے یوکرین کے شہریوں سے زیادہ محفوظ ہیں کیونکہ یوکرین پر یہ (سٹارم شیڈو) میزائل استعمال کرنے کی پابندی ہے۔‘

تاہم یوکرین کے پاس اپنا خود کا بھی ایک طویل فاصلے پر حملہ کرنے والا ڈرون پروگرام موجود ہے۔

ان ڈرونز کی پہنچ روس میں سینکڑوں کلومیٹرز تک ہے اور ایسا کئی بار ہوا کہ ان ڈرون حملوں نے روسی فوج کو چونکا دیا۔ تاہم یہ ڈرونز کم گولہ بارود سے لیس ہوتے ہیں۔

کیئو کا کہنا ہے کہ روس کی جانب سے فضائی حملوں کو ناکام بنانے کے لیے اسے سٹارم شیڈو سمیت زیادہ فاصلے تک مار کرنے والے میزائلوں کی ضرورت ہے۔ ان میزائلوں میں امریکی اٹیکمز بھی شامل ہیں جو 300 کلومیٹر تک نشانہ بنا سکتے ہیں۔

یہ بھی پڑھیں: نیوٹرل وینیو سے متعلق کل فیصلہ ہو جائے گا، محسن نقوی

مغربی ممالک میں ہچکچاہٹ کیوں؟

اس کا آسان جواب یہ ہے کہ وہ نہیں چاہتے کہ بات حد سے زیادہ بگڑ جائے۔

اگرچہ صدر ولادمیر پوتن نے خطرناک رد عمل کی دھمکیاں دی ہیں اور گذشتہ روز پوتن نے روس کے جوہری ہتھیاروں کے استعمال کے اصول میں تبدیلیوں کی منظوری دیتے ہوئے نئے قواعد اور شرائط طے کیے تھے جن کے تحت اب روس اپنے جوہری ہتھیاروں کے استعمال کا فیصلہ کرے گا۔

روس کی جانب سے جوہری ڈاکٹرائن میں کی گئی تازہ ترین تبدیلیوں کے مطابق اگر ایک غیر جوہری ریاست کو روس پر حملہ کرنے کے لیے ایک جوہری طاقت کی حمایت حاصل ہے، تو اس حملے کو روس پر مشترکہ حملہ تصور کیا جائے گا۔

اب ان تبدیلیوں کے تحت روس پر روایتی میزائلوں، ڈرونز یا ہوائی جہازوں سے بڑا حملہ روس کی جانب سے جوہری ردعمل کے لیے سبب بن سکتا ہے۔ مثال کے طور پر اگر بیلاروس پر حملہ ہو یا روس کی خودمختاری کو کوئی سنگین خطرہ لاحق ہو تو وہ جوہری ردعمل دے سکتا ہے۔

روس کی جانب سے یہ اہم تبدیلیاں واشنگٹن کے فیصلے کے بعد سامنے آئی ہیں جس میں یوکرین کو روس میں طویل فاصلے تک مار کرنے والے امریکی ساختہ میزائل فائر کرنے کی اجازت دی گئی تھی۔

وائٹ ہاؤس کو لگتا ہے کہ اگر یوکرین کو مغربی میزائل استعمال کرنے کی اجازت دے دی گئی تو کریملن میں بیٹھے سخت گیر موقف رکھنے والے لوگ یوکرین کی مدد کرنے والے ممالک جیسے پولینڈ کے فضائی اڈوں پر دھاوا بول دیں گے۔

اگر ایسا ہوا تو نیٹو کا آرٹیکل 5 نافذ ہو جائے گا جس کا مطلب یہ ہوگا کہ اب روس کی جنگ مغربی اتحاد سے ہے۔

24 فروری 2022 کو یوکرین پر روس کے حملے کے بعد سے امریکہ کا مقصد یہ رہا ہے کہ روس کے ساتھ براہ راست تنازعے میں گھسنے کے بغیر کیئو کو زیادہ سے زیادہ مدد فراہم کرے، کیونکہ اگر امریکہ براہ راست اس جنگ میں شامل ہوا تو روس کے ساتھ جوہری جنگ کا خدشہ بڑھ جائے گا۔

سٹارم شیڈو کے استعمال سے کیا فرق پڑے گا؟

یوکرین کو اب سٹارم شیڈو استعمال کرنے کا کوئی خاص فائدہ نہیں ہوگا۔