بانی پی ٹی آئی کی رہائی کا واحد راستہ عدالتی و قانونی چارہ جوئی ہے،احسن اقبال

احسن اقبال کا بیان

لاہور(ڈیلی پاکستان آن لائن) وفاقی وزیر منصوبہ بندی احسن اقبال نے کہا ہے کہ بانی پی ٹی آئی آج عدالتی و قانونی مقدمات میں گرفتار ہیں۔ رہائی کا واحد راستہ عدالتی و قانونی چارہ جوئی ہے، بانی پی ٹی آئی کو عدالتوں میں جا کر اپنی بے گناہی ثابت کرنی چاہیے۔

یہ بھی پڑھیں: دور تک مار کرنے والے میزائل اور اتحادی کی جاسوسی: کیا ایران پر ممکنہ اسرائیلی حملے کے حوالے سے امریکی دستاویزات جان بوجھ کر لیک کی گئیں؟

سیاسی انتشار کی تشریح

نجی ٹی وی چینل دنیا نیوز کے مطابق احسن اقبال کا لاہور میں پریس کانفرنس میں کہنا تھا کہ ایک سیاسی جماعت بار بار پاکستان میں انتشار پھیلانا چاہتی ہے۔ پاکستان کوئی عام معمولی ملک نہیں ہے؛ یہ ایٹمی قوت رکھنے والا ملک ہے۔ حکومت یہ اقدامات خوشی سے نہیں اٹھا رہی، انہوں نے حکومت کی نرمی کا ناجائز فائدہ اٹھایا۔ آخر اس فساد کو کرنے کی ضرورت کیا ہے؟

یہ بھی پڑھیں: لاہور: تحریک انصاف کی احتجاجی کال، پنجاب بھر میں دفعہ 144 نافذ

بنیادی حقوق اور قانونی چارہ جوئی

وفاقی وزیر کا کہنا تھا کہ بانی پی ٹی آئی کو تمام مقدمات میں خود کو کلیئر کرانا ہوگا۔ انہوں نے کہا کہ ہم نے کبھی برطانیہ جا کر کسی کے پاؤں نہیں پکڑے اور نہ ہی کسی بین الاقوامی پلیٹ فارم پر جاکر پاکستان کے خلاف بولا۔ ہم نے گھر کی جنگ گھر میں ہی لڑی اور اپنے کیس عدالتوں میں لڑے۔

وکلا کی کارروائی

احسن اقبال نے نشاندہی کی کہ ان کے وکلا کی ٹیم مسلسل ان کے کیسز کے ٹرائل میں التوا کر رہی ہے۔ بانی پی ٹی آئی کے وکلا پیش ہونے کے بجائے بہانے کرتے ہیں۔ بشریٰ بی بی بھی ضمانت لینے کے بعد عدالت میں پیش نہیں ہو رہیں۔ یہ وہی مہاتما ہیں جنہوں نے ایم پی ایز کو بنی گالہ بلا کر پی ٹی آئی کے پٹے ڈالے۔