بانی پی ٹی آئی کی صحت اور اڈیالہ جیل سے منتقلی کی خبریں غلط ہیں، بیرسٹر گوہر

راولپنڈی(ڈیلی پاکستان آن لائن) چیئرمین تحریک انصاف بیرسٹر گوہر نے کہا ہے کہ بانی پی ٹی آئی کی صحت ٹھیک ہے۔ عمران خان کی صحت سے متعلق خبریں غلط ہیں، اور اڈیالہ جیل سے منتقلی کی تقاریر بھی غیر درست ہیں۔

میڈیا سے گفتگو کرتے ہوئے بیرسٹر گوہر نے کہا کہ ہمارے جتنے کارکنوں کی اموات ہوئیں، وہی تعداد بتائی گئی۔ ان کا کہنا تھا کہ ایسی کوئی ہدایت نہیں تھی کہ ہر لیڈر کو ہر صورت ڈی چوک پہنچنا ہے۔ وزیراعلیٰ خیبرپختونخوا اور دیگر لوگ زخمیوں کی عیادت کے لیے جا رہے ہیں۔ ہمارا موقف ہے کہ کسی بھی طرف سے گولی نہیں چلنی چاہیے تھی۔ اموات سے توجہ ہٹانے کے لیے سنگجانی اور ڈی چوک کی باتیں ہو رہی ہیں۔ مزید یہ کہ سانحہ ماڈل ٹاؤن پر اہم شخصیات نے استعفے دیے اور انکوائری میں شامل ہوئے۔

بیرسٹر گوہر نے کہا کہ پی ٹی آئی پر کوئی پابندی نہیں لگے گی، ہم ایک پرامن جماعت ہیں۔ پارٹی ہمیشہ اپنے ہر کام کا احتساب کرتی ہے۔ پی ٹی آئی پاکستان کی سب سے بڑی سیاسی جماعت ہے اور تحریک انصاف دنیا کی ساتویں بڑی سیاسی جماعت ہے۔ ان کا کہنا تھا کہ بانی پی ٹی آئی نے خود مجھے پارٹی چیئرمین بنایا اور بانی کی ہدایات من و عن آگے منتقل کرتا ہوں۔ فی الحال کوئی مذاکرات نہیں کر رہے۔