کرم کے حاجی عقیل، جنہوں نے اپنی جان کی پرواہ کیے بغیر ‘مسیحا خاندان’ کا دیا ساتھ

پاکستان کے صوبہ خیبرپختونخوا کے ضلع کرم کے گنجان آباد سنی اکثریتی علاقے بگن میں 22 نومبر کو جب مسلح لشکر نے بازار کو آگ لگانے کے بعد واپس روانہ ہونے کا ارادہ کیا تو انہوں نے بگن کے ایک معروف خاندان کے افراد کو بھی اغوا کر کے اپنے ساتھ لے جانے کا اقدام کیا۔

یہ خاندان علاقے میں معروف ’ڈاکٹرز کلینک‘ چلانے والے ڈاکٹر طلہ محمد کا تھا۔ مسلح حملہ آوروں نے ڈاکٹر طلہ، ان کی اہلیہ، ان کی دو بیٹیاں ڈاکٹر یاسمین اور ڈاکٹر شیلا کے علاوہ ان کی بہن اور بھانجے فیاض گل کو زبردستی اپنے ساتھ لے جانے کی کوشش کی۔ مسلح افراد نے ان تمام افراد کو علیحدہ علیحدہ گاڑیوں میں بٹھایا تھا۔

واضح رہے کہ ضلع کرم میں فرقہ وارانہ فسادات میں یہ بات عام ہو چکی ہے کہ حملہ آور اپنے مخالف قبیلے اور فرقے کے افراد کو اپنے ساتھ اغوا کر لیتے ہیں تاکہ ان کے ساتھ مذاکرات کرتے ہوئے ان کا پلڑا بھاری رہے۔

گذشتہ ماہ نومبر کے آخری عشرے میں کرم میں مسافر گاڑیوں کے قافلے پر حملے کے بعد شروع ہونے والی کشیدگی کے دوران مختلف واقعات میں 130 سے زائد افراد ہلاک جبکہ 170 سے زائد زخمی ہوئے ہیں۔ اور کئی دن کی حکومتی کوششوں اور سیاسی جرگے کی مداخلت کے بعد علاقے میں جنگ بندی ممکن ہو پائی ہے۔

بلا تفریق سب کا ’مسیحا خاندان‘

ضلع کرم میں فرقہ وارانہ تقسیم موجود ہے۔ بعض ڈاکٹرز کے مطابق چونکہ پاڑہ چنار شیعہ اکثریتی علاقہ ہے اس لیے وہاں ہسپتال میں زیادہ تر شیعہ مسلک کے لوگ علاج کے لیے آتے ہیں۔ جبکہ سنی اکثریتی صدہ کے ہسپتال میں عموماً سنی مسلک کے لوگ علاج کے لیے آتے ہیں۔

بگن کے رہائشی اور 30 سال سے کرم میں پریکٹس کرنے والے ڈاکٹر طلہ محمد سنہ 2013 میں اپنی ریٹائرمنٹ سے قبل پاڑہ چنار اور علی زئی کے سرکاری ہسپتالوں میں خدمات انجام دیتے تھے۔

علاقہ مکینوں کا کہنا ہے کہ اگرچہ وہ سنی مسلک سے تعلق رکھتے ہیں مگر انہوں نے علاج میں کبھی کسی فرقے کی بنیاد پر تقسیم نہیں کی اور ہر مریض کا علاج کیا۔ وہ اپنے کیریئر میں تشدد کے ادوار میں بھی ہسپتالوں میں کام کرتے رہے۔

اس کے بعد ڈاکٹر طلہ نے بگن کے علاقے میں اپنا کلینک قائم کیا۔

ان کے 11 بچوں میں سے زیادہ تر نے اپنے والد کے پیشے کو اپناتے ہوئے ڈاکٹری کی تعلیم حاصل کی اور اپنے والد کی خواہش کے مطابق بہتر روزگار کے مواقع چھوڑ کر کرم میں ہی مریضوں کی مدد کے لیے کام کیا۔

حملہ آوروں کی جانب سے اغوا کی جانے والی ان کی بیٹی ڈاکٹر یاسمین نے ریڈیالوجی میں سپیشلائیزیشن کے ساتھ ساتھ گائنی میں ڈپلومہ حاصل کیا ہے جبکہ ڈاکٹر شیلا فزیوتھراپی میں مہارت رکھتی تھیں۔

یہ بھی پڑھیں: پاکستانی کک باکسنگ فائٹر علی مہتا نے برطانوی حریف کو شکست دے کر اہم مقابلہ جیت لیا

’اپنی جان دے کر بھی ڈاکٹر طلہ کے خاندان کی حفاظت کروں گا‘

مسلح حملہ آور جب بگن سے ڈاکٹر طلہ کے خاندان کے افراد کو اغوا کر کے لے جا رہے تھے تو شیعہ اکثریتی علاقے علی زئی سے گزرتے ہوئے ان کی اہلیہ اور بیٹی ڈاکٹر شیلا نے اغوا کرنے والوں سے پوچھا کہ ’ہمیں کدھر لے کر جارہے ہو؟‘

انھوں نے درخواست کی کہ ’ہمیں کہیں بھی مت لے کر جاؤ، ہمیں علی زئی میں حاجی عقیلو کے گھر پر چھوڑ دو۔‘

اکثریتی شیعہ طوری قبیلے سے تعلق رکھنے والے عقیل حسین عرف حاجی عقیلو دراصل علاقے کی ایک امن پسند شخصیت ہیں جو بلاتفریق لوگوں کی مدد کرتے ہیں۔

ڈاکٹر شیلا کی یہ درخواست اس گاڑی میں موجود اغوا کرنے والوں نے تسلیم کر لی اور ان کو علی زئی کے گاؤں حاجی کلے زئی میں حاجی عقیلو کی رہائش گاہ پر چھوڑ دیا ہے۔

جب ڈاکٹر شیلا اور ڈاکٹر طلہ کی اہلیہ کو حاجی عقیلو کی رہائش گاہ پر پہنچایا گیا تو حاجی عقیلو حیران ہوئے اور اغواکاروں پر غصہ کرتے ہوئے پوچھا 'یہ تم لوگوں نے کیا کیا ہے؟'

'یہ وہ خاندان ہے جو ہر ایک کو، چاہے وہ سنی ہو یا شیعہ، بہترین علاج معالجہ دیتا ہے۔ ان کے کلینک پر شیعہ کا علاج تو مفت ہوتا ہے۔ (آپ کو) ایسا کبھی نہیں کرنا چاہیے تھا۔'

اس بارے میں خود حاجی عقیلو نے Uses in Urdu کو بتایا کہ انھوں نے اغوا کاروں سے پوچھا 'ڈاکٹر طلہ، ڈاکٹر یاسمین اور ان کے خاندان کے دیگر لوگ کدھر ہیں؟ وہ بھی میری حوالے کرو۔ میں ان کی حفاظت اپنی جان دے کر بھی کروں گا۔'

مگر اغواکاروں کو دیگر افراد کے بارے میں علم نہیں تھا۔

حاجی عقیلو کو فوراً شک ہوا کہ دیگر کو بھی اغوا کیا گیا ہوگا۔ 'میں نے ایک لمحے کے لیے سوچا اور پھر ڈاکٹر شیلا اور ڈاکٹر طلہ کی اہلیہ سے کہا کہ وہ اب اپنے بھائی، اپنے بزرگ عقیلو کی پناہ میں ہیں اور سب کچھ میری ذمہ داری ہے۔'

یہ بھی پڑھیں: کراچی کی آلودہ ساحلی پٹی: “ایک وقت تھا جب ہم یہاں بال دھوتے تھے، اب یہ مٹی پاؤں میں لگ جائے تو کئی دن تک دھونے سے بھی نہیں جاتی”

دباؤ کے باوجود حاجی عقیلو نے ڈاکٹر طلہ کی باقی فیملی تک رسائی کیسے حاصل کی

حاجی عقیلو کے بقول ڈاکٹر شیلا اور ڈاکٹر طلہ کی اہلیہ ان کی پناہ میں تھیں تو اس وقت انھوں نے ان سے وعدہ کیا کہ وہ دیگر فیملی بشمول خود ڈاکٹر طلہ، ان کی بیٹی ڈاکٹر یاسمین، بہن اور بھانجے فیاض گل کا پتا لگائیں گے۔

مگر جب علاقے بھر میں لوگوں کو پتا چلا کہ ڈاکٹر طلہ کی اہلیہ اور ڈاکٹر شیلا ان کی پناہ میں ہیں تو 'مجھ پر دباؤ آنے لگا۔'

حاجی عقیلو کہتے ہیں کہ 'لڑائی کے دوران میں نے ان سے کہا کہ اگر وہ چاہیں تو میں ان کو اپنے بیٹوں، بھتیجوں، اور بھانجوں کی حفاظت میں پشاور یا جہاں وہ چاہیں چھوڑ سکتا ہوں۔'

'مگر انھوں نے لڑائی کے دوران بہتر سمجھا کہ میرے گھر پر رہیں۔ سیز فائر ہونے کے بعد میں نے انہیں ان کے قریبی رشتہ داروں کے حوالے کر دیا۔'

حاجی عقیلو کا کہنا تھا کہ بگن حملے کے دوران ڈاکٹر طلہ کے کلینک اور گھر کو تباہ کر دیا گیا۔ اس میں ایک جدید فارمیسی تھی جو علاقے کے لوگوں کی ضرورت کو پورا کرتی تھی۔

مگر 'اب وہاں کچھ بھی باقی نہیں بچا۔ معلوم نہیں اب لوگوں کو جب اپنی ماں، بہن، بیٹی کے علاج کی ضرورت پڑے گی تو وہ کہاں جائیں گے؟'

ان کا خیال ہے کہ 'سنی اور شیعہ دونوں طرف صرف چار، پانچ فیصد انتہا پسند ہیں اور وہ لڑائی کر رہے ہیں۔'

حقیقت یہ ہے کہ 'اکثریت امن اور بھائی چارہ چاہتی ہے۔'