جنوبی کوریا کی خوشی پاکستانیوں کو کیوں ناپسند ہے؟

سنہ 2013 میں سابق مقتول فوجی آمر پارک چنگ ہی کی صاحبزادی پارک یونگ ہائی ملک کی پہلی خاتون صدر منتخب ہوئیں۔ مگر بدعنوانی اور اختیارات کے ناجائز استعمال کے الزامات کی وجہ سے پارلیمنٹ نے ان کا مواخذہ کر کے انہیں چار سال چودہ دن بعد گھر بھیج دیا۔ پارک یونگ ہائی پر مقدمہ چلا، اور وہ اس وقت جیل میں ہیں۔

پارک یونگ ہائی کے بعد حکومت کی پانچ سالہ مدت کی بقیہ معیاد پوری کرنے کے لیے ہوانگ کیو آہن صدر بنے، مگر صرف 152 دن بعد استعفیٰ دے دیا۔ آہن کے بعد مون جائے ان نے پانچ برس کی نئی مدت مکمل کی، اور پھر موجودہ صدر یون سک اوول نے مئی 2022 میں انتخابی کامیابی حاصل کی۔

موجودہ صدر اور ان کی اہلیہ نے عہدہ سنبھالتے ہی 'چن چڑھانے' کی کارروائیاں شروع کر دیں۔

لوگوں کی ان سے بیزاری کی پہلی وجہ یہ تھی کہ وہ ایک فیصد سے بھی کم اکثریت کی بنیاد پر منتخب ہوئے۔ صدر یون سک اوائل جوانی میں پادری بننا چاہتے تھے لیکن وکیل بن کر اپنی ڈگری 1951 میں نو بار کی امتحانی کوششوں کے بعد حاصل کر پائے۔

ان کی اہلیہ کم ہیون ہی پر الزام ہے کہ ان کا گریجویشن کا تھیسز سرقہ شدہ ہے۔ خاتونِ اول بنتے ہی محترمہ نے مبینہ طور پر انتظامی معاملات میں بھی دخل دینا شروع کر دیا، اپنے من پسند بہت سے امیدواروں کو حکمران پیپلز پاور پارٹی کے ٹکٹ دلوائے، مگر اکثر اپوزیشن ڈیموکریٹک پارٹی سے ہار گئے، جس سے پارلیمنٹ حکمران جماعت کے ہاتھ سے نکل گئی۔

گذشتہ برس خاتونِ اول کی ایک ویڈیو بھی وائرل ہوئی جس میں وہ ایک کورین نژاد امریکی پادری سے لگ بھگ ڈھائی ہزار ڈالر مالیت کا قیمتی بیگ بطور رشوت وصول کرتی نظر آئیں۔ (شاید جنوبی کوریا میں توشہ خانہ نہیں ہوتا)۔

صدر یون سک اوول نے خاتونِ اول پر عائد کرپشن الزامات کی تحقیقات کروانے کے بجائے اپنی اہلیہ کا مسلسل دفاع جاری رکھا۔ اس حوالہ سے پارلیمنٹ میں منظور ہونے والے تین قانونی مسودوں کو ویٹو بھی کیا۔ گذشتہ ماہ انہوں نے قوم سے نشری خطاب میں خاتونِ اول کی ناسمجھی پر معافی مانگی (اہلیہ نے معافی نہیں مانگی)۔

اب سے دو دن پہلے سامنے آنے والے تازہ سروے سے ظاہر ہوا کہ صدر یون کی عوامی مقبولیت محض پچیس فیصد رہ گئی ہے۔

اس کے باوجود کل (بروز منگل) صدر نے اعلان کیا کہ ملک میں مارشل لا لگایا جائے گا۔ پارلیمنٹ اور سیاسی جماعتیں کالعدم قرار دی جائیں گی، اور 'پارلیمنٹ میں گھسے ہوئے شمالی کوریائی ایجنٹوں' کی خبر لینے کا عزم ظاہر کرتے ہوئے فوج کے سربراہ جنرل پارک آنسو کو مارشل لا کمانڈر بھی نامزد کر دیا۔

تاہم چند ہی گھنٹے بعد عوام کی جانب سے پارلیمنٹ کے حفاظتی گھیراؤ کی وجہ سے حالات پلٹنے لگے۔ سپیکر نے پولیس اور فوج کو پارلیمنٹ کا احاطہ خالی کرنے کا حکم دیا۔ تین سو ارکان پر مشتمل ایوان نے 190 ووٹوں سے منظور کردہ قرار داد میں مارشل لا کے فوری خاتمے کا مطالبہ کیا۔ مخالفت میں ایک ووٹ بھی نہیں ڈلا۔

صدر نے یوٹرن لیا اور پارلیمانی مطالبے کے سامنے کابینہ کے مشورے سے ہتھیار ڈال دیے۔ نہ صرف حکمران جماعت بلکہ دارالحکومت سیول کے مئیر نے بھی اس صدارتی بچگانہ پن پر تنقید کی (عین ممکن ہے کہ آپ تک یہ مضمون پہنچتے پہنچتے صدر صاحب سبکدوشی کے بعد مواخذے کے کٹہرے میں ہوں)۔

یہ سب ثابت کر رہا ہے کہ پچھلے 33 برس میں جنوبی کوریا میں سویلین بالادستی جڑ پکڑ چکی ہے۔ اس سے بھی اہم بات یہ ہے کہ پہلے فوجی آمر پارک چنگ ہی سے لے کر اب تک آنے والی ہر حکومت نے سیاسی مخالفین کے ساتھ کتنی بھی سختی سے پیش آیا ہو، لیکن قومی معیشت کی قیمت پر کبھی بھی نہیں۔

شاید اسی لیے اتنی اتھل پتھل، چھینا جھپٹی اور سکینڈلز کے باوجود جنوبی کوریا جس کی فی کس آمدنی 1960 میں ایک سو بیس ڈالر تھی آج پینتیس ہزار ڈالر ہے۔ سوا پانچ کروڑ آبادی والا یہ ملک اس لمحے بارہویں عالمی اور چوتھی ایشیائی معیشت ہے جس کا حجم لگ بھگ دو ٹریلین ڈالر ہے۔

تازہ واقعات سے پہلے بھی ہم یہ یاد کر کر کے پھولے نہیں سماتے تھے کہ 1960 کی دہائی میں جنوبی کوریا کا پہلا پنج سالہ اقتصادی منصوبہ ایوب خان کے پہلے پنج سالہ منصوبے کی فوٹو کاپی تھی۔ ہم پیچھے رہ گئے تو کیا ہوا ’ساڈے ہتھاں دا منڈا تے اگے نکل گیا۔‘

جنوبی کوریا سے ہمارا دوسرا روحانی تعلق نوے کی دہائی میں ڈائیوو کے لاہور اسلام آباد موٹر وے اور ہنڈائی کی پیلی ٹیکسی کے ذریعے استوار ہوا۔

پاکستانی سوشل میڈیا جنوبی کوریا کو اس وقت جس رشکیلی حسرت سے دیکھ رہا ہے اس کا مجموعی تاثر یہ ہے کہ ’چلو کسی ملک کے عوام، پارلیمنٹ اور سیاست دانوں نے تو غیرت دکھائی۔‘

جولائی 2016 میں جب چار مارشل لاؤں کے ڈسے ترکی میں تختہ پلٹنے کی بالائے آئین ایک اور کوشش روکنے کے لیے استنبول کی سڑکیں رجب طیب اردوغان کے غضب ناک حامیوں سے بھر گئیں تب بھی ہمارا سوشل میڈیا ایک ٹانگ پر ناچا تھا۔

حالات کی مار سہتے سہتے شاید ہمارا حال اس تماشائی کا سا ہو چلا ہے جسے خود تو ہیرو بننے کا موقع نہیں مل پا رہا مگر وہ جب بھی کسی امیتابھ بچن یا سلطان راہی کے ہاتھوں ولن کو پٹتے دیکھتا ہے اور پھر سینما ہال سے نکلتا ہے تو خود بخود سینہ اور ٹانگیں چوڑے ہو جاتے ہیں۔ چہرے پر ایک عارضی تمکنت رقص کرنے لگتی ہے۔