مسلح فوجی اور ایک بے بس لڑکی: جنوبی کوریا میں مارشل لا کے خلاف مزاحمت کی علامت ‘آہن’

جنوبی کوریا میں منگل کی رات اچانک مارشل لا لگنے کے بعد جو واقعات پیش آئے، ان میں کئی ایسے منظر بھی شامل ہیں جو ملک کی تاریخ میں اہم حیثیت رکھتے ہیں۔

ایک خاص منظر جس نے جنوبی کوریا سمیت دنیا بھر کے لوگوں کی توجہ حاصل کی، وہ ایک خاتون تھیں جو مسلح فوجیوں کے سامنے ڈٹ گئی تھیں۔ یہ فوجی جنوبی کوریا کی پارلیمنٹ کے باہر اس مقصد کے لیے تعینات کیے گئے تھے کہ وہ اراکین اسمبلی کو اندر جانے نہیں دیں گے۔

لیکن یہ خاتون کون تھیں؟

35 سالہ آہن گوی ریونگ جنوبی کوریا کی حزب مخالف جماعت ڈیموکریٹک پارٹی کی ترجمان ہیں۔ ان کی وائرل ہونے والی فوٹیج میں دیکھا گیا کہ وہ ایک فوجی کی بندوق پکڑ کر چھیننے کی کوشش کر رہی ہیں۔ حالانکہ وہ اس میں ناکام رہتی ہیں اور اس دوران فوجی اہلکار ان پر گولی نہیں چلاتا۔

اس ویڈیو کے سامنے آنے کے بعد پاکستان میں بھی سوشل میڈیا پر ان خاتون کا تذکرہ ہوا اور حال ہی میں اسلام آباد میں تحریک انصاف کے احتجاج سے ان کا موازنہ کیا گیا۔ تحریکِ انصاف کے حمایتی اکاؤنٹس نے یہ تبصرہ کیا کہ ’جنوبی کوریا میں فوج نے تحمل کا مظاہرہ کیا۔‘

تحریک انصاف کا الزام ہے کہ 26 نومبر کو پارٹی کے احتجاج کے دوران سکیورٹی اہلکاروں کی فائرنگ کے نتیجے میں 12 افراد ہلاک ہوئے۔ مگر پاکستان کی وفاقی حکومت نے فائرنگ اور ہلاکتوں دونوں کی تردید کی ہے۔

Uses in Urdu نے جنوبی کوریا کی ان خاتون سے بات چیت کی اور یہ جاننے کی کوشش کی کہ اس وقت کیا ہو رہا تھا۔

انھوں نے Uses in Urdu کی کورین سروس سے بات کرتے ہوئے کہا کہ ’میں نے کچھ نہیں سوچا، میں بس جانتی تھی کہ ہمیں اس کو روکنا ہے۔‘

ایک جانب جنوبی کوریا کی فوج قومی اسمبلی کے باہر تعینات ہو رہی تھی، تو دوسری جانب آہن بھی مارشل لا لگنے کی خبروں کے ساتھ ہی پارلیمنٹ کے باہر پہنچ چکی تھیں۔

اُن سے پہلے ملک کی سب سے بڑی حزب اختلاف جماعت ڈیموکریٹک پارٹی کے سربراہ، لی جائی میونگ، نے اراکین اسمبلی کو پارلیمان پہنچنے کی درخواست کی تھی تاکہ مارشل لا کے خلاف ووٹ کیا جا سکے اور عام شہریوں سے بھی کہا تھا کہ وہ پارلیمان پہنچ کر احتجاج کریں۔

انہوں نے کہا تھا کہ 'ٹینک، بکتر بند گاڑیاں اور مسلح فوجی ملک پر حکومت کریں گے، میرے ہم وطنو، قومی اسمبلی پہنچو۔'

جنوبی کوریا کی نوجوان نسل کی اکثریت کے لیے مارشل لا کا لفظ ایک اجنبی سا تھا۔ یاد رہے کہ جنوبی کوریا میں آخری بار سنہ 1979 میں مارشل لا لگایا گیا تھا۔