سافٹ گرلز: نوکری چھوڑ کر گھر کی خاتون بننے کا رجحان اور سویڈن میں اس کی مقبولیت کی وجوہات کیا ہیں؟

سرکاری سطح پر اس وقت کوئی اعداد و شمار دستیاب نہیں ہیں جن سے یہ پتہ چل سکے کہ کتنی نوجوان لڑکیاں اس ٹرینڈ کو اپناتے ہوئے نوکریاں چھوڑ رہی ہیں۔

تاہم اس کے باوجود سویڈین میں اخبارات میں اس ضمن میں شائع ہونے والے اداریوں، سیاسی جماعتوں کی پینل ڈسکشنز اور سرکاری ٹی وی پر اس معاملے پر بحث اب ایک اہم موضوع ہے۔

سویڈن میں خواتین کے حقوق کے لیے کام کرنی والی جماعت کی شریک بانی گورڈن سکیمن کہتی ہیں کہ انھوں نے حال ہی میں اس موضوع پر ہونے والے مباحثوں میں حصہ لیا ہے۔

وہ سمجھتی ہیں کہ خواتین کے لیے اپنے پارٹنر کی دولت پر انحصار کرنا یا گھر بیٹھ جانا ’بہت خطرناک‘ ہے اور یہ صنفی مساوات کے لیے ’ایک قدم پیچھے ہٹنے‘ پر مبنی رجحان ہے۔

وہ یہ توجیہ پیش کرتی ہیں کہ سویڈن کے نوجوان ملک کی دائیں بازو کی مخلوط حکومت کے زیر اثر آ رہے ہیں۔

وہ یہ بھی سمجھتی ہیں کہ سویڈن میں صنفی مساوات کو فروغ دینے کے لیے بنائی گئی پالیسیوں کو اپنانے سے پہلے عوامی شعور کی کمی ہے۔ ’آج کی نوجوان خواتین اس تاریخ کو نہیں دیکھتی ہیں کہ کیسے خواتین کو اپنے حقوق کے لیے لڑنا پڑا، کام کرنے کا حق، تنخواہ کا حق، اور معاشی آزادی کا حق۔‘

تاہم دوسری جانب سویڈن ڈیموکریٹس پارٹی ’سافٹ گرلز‘ کے رجحان کے حوالے سے مثبت رویہ رکھتی ہے۔

پارٹی کے یوتھ ونگ کے ترجمان ڈینس ویسٹربرگ کہتے ہیں کہ ’میں سمجھتا ہوں کہ لوگوں کو اپنی زندگی کا فیصلہ خود کرنا چاہیے، اور اگر آپ کے پاس ایسا کرنے کا معاشی آپشن موجود ہے (یعنی پارٹنر کی تنخواہ ہر گزر اوقات) تو یہ آپ کے لیے اچھا ہے۔‘

وہ مزید کہتے ہیں کہ ’ہم اب بھی ایک ایسے ملک میں رہتے ہیں جہاں کرئیر میں آنے بڑھنے کے تمام مواقع موجود ہیں۔ یہاں حقوق محفوظ ہیں، اور ہمیں زیادہ روایتی طور پر اپنی زندگی گزارنے کا چناؤ کرنے کا حق بھی حاصل ہے۔‘

ورک، لائف بیلنس کے لیے سویڈن عالمی سطح پر شہرت رکھتا ہے، یہاں زیادہ تر ملازمین کو سال میں چھ ہفتے کی چھٹی ملتی ہے جبکہ کام کرنے کے اہل افراد میں سے محض ایک فیصد سے بھی کم افراد ہفتے میں 50 گھنٹے سے زیادہ کام کرتے ہیں۔

تاہم اس سب کے باوجود ایک حالیہ تحقیق نوجوانوں میں بڑھتے ہوئے تناؤ کی جانب اشارہ کرتی ہے۔

گورینسن کا خیال ہے کہ سافٹ گرلز کا رجحان اس وقت عالمی سطح پر کام کے رجحانات کی ایکسٹینشن ہو سکتا ہے جس میں ملازمین کی حوصلہ افزائی کر جاتی ہے کہ کام کی جگہ پر ضرورت سے زیادہ دباؤ نہ لیں۔

دوسری جانب جنریشن زی، یعنی وہ افراد جو سنہ 1997 سے 2012 کے درمیان پیدا ہوئے، سوشل میڈیا پر زیادہ تر ایسے مواد کی تخلیق کر رہے ہیں جو فارغ اوقات کو منانے کے متعلق ہیں، بجائے اس کے کہ وہ کریئر کے فروغ پر توجہ دیں۔

اگر آپ سوشل میڈیا پر لائف سٹائل کے موضوعات پر نظر ڈالیں تو یہ پتہ چلتا ہے کہ نوکری کا حصہ بہت کم ہے، یعنی جو مواد بنایا جا رہا ہے، اس میں ملازمت یا اس سے متعلق مقاصد کو زیادہ اہمیت نہیں دی گئی۔

گورنسن کا کہنا ہے کہ اگر یہ نوجوانوں کی عام زندگی گزارنے کی عکاسی ہے تو ممکن ہے کہ وہ روزانہ آٹھ گھنٹے دفتر میں گزارنے کے معاملے میں زیادہ پرجوش نہ ہوں۔

تاہم، سب سے اہم بات یہ ہے کہ آیا یہ رجحان سویڈن کی صنفی مساوات کے اہم پالیسیوں کا ردعمل ہے۔

سویڈن میں کام کرنے والی ماؤں کا تناسب یورپ میں سب سے زیادہ ہے، مگر سرکاری اعداد و شمار یہ ظاہر کرتے ہیں کہ خواتین اب بھی مردوں کے مقابلے میں گھر کے کاموں اور بچوں کی دیکھ بھال میں زیادہ وقت صرف کرتی ہیں۔

اسی طرح، یہاں مردوں اور عورتوں کے درمیان آمدنی کا فرق یورپی یونین کے دیگر ممالک کے مقابلے میں کم ہے۔

لارسن مستقبل میں بچے پیدا کرنے کی خواہش رکھتی ہیں۔ ان کا کہنا ہے کہ 'میں سمجھتی ہوں کہ زیادہ تر خواتین کام کے دباؤ سے تھک چکی ہیں۔ اور میں اس حوالے سے اپنی ماں اور دادی کے بارے میں سوچتی ہوں، جو ہمیشہ دباؤ کا شکار رہتی تھیں۔'

ماہر معاشیات شوکا اہرمن، جو کہ سویڈن کے سب سے بڑے پنشن فنڈز ایس پی پی سے وابستہ ہیں، کہتے ہیں کہ انہیں یقین نہیں ہے کہ اتنی بڑی تعداد میں خواتین سوفٹ گرل ٹرینڈ کے تحت کام چھوڑ دیں گی اور اس سے ملکی معیشت پر کوئی اثر پڑے گا۔

وہ امید رکھتے ہیں کہ سافٹ گرل کے حوالہ سے حالیہ بحث سیاست دانوں اور کاروباری اداروں کے لیے ایک انتباہ ہے کہ سویڈن میں جاری عدم مساوات کو دور کرنے کے لیے ابھی بہت کچھ کرنے کی ضرورت ہے۔