جب دلیپ کمار پر پاکستان کے لئے جاسوسی کا الزام لگا اور نشانِ امتیاز ملنے سے ہنگامہ برپا ہوا

اگر ہم دلیپ کمار کے ساتھ ایسا سلوک کرتے ہیں تو دنیا میں کون ہماری اس بات پر یقین کرے گا کہ ہم اپنے ملک میں بسنے والے مسلمانوں کے ساتھ اچھا سلوک کرتے ہیں؟

یہ انڈیا کے معروف صحافی ویر سنگھوی کے ایک مضمون کا آخری جملہ ہے جو 18 جولائی 1999 کو دی ٹیلیگراف میں شائع ہوا تھا۔

دراصل یہ مضمون اس شور شرابے کے بعد تحریر کیا گیا تھا جب بالی وڈ کے معروف اداکار دلیپ کمار کو پاکستان نے اپنا اعلیٰ ترین شہری اعزاز نشان امتیاز سے نوازا تھا۔

اُس وقت مہاراشٹر میں شیوسینا کے رہنما بالا صاحب ٹھاکرے نے دلیپ کمار کی جانب سے اس اعزاز کو قبول کرنے پر اعتراض کیا تھا جبکہ مظاہرین کی جانب سے دلیپ کمار کے گھر کے سامنے ہنگامہ برپا کیا گیا تھا۔

اس واقعے کا تذکرہ معروف اداکار رشی کپور نے بھی کیا ہے جو دلیپ کمار کی سوانح دلیپ کمار: دی سبسٹینس اینڈ دی شیڈو میں درج ہے۔

رشی کپور نے اپنے والد راج کپور اور دلیپ کمار کی قربت کے بارے میں بات کرتے ہوئے بتایا کہ جب یوسف انکل (دلیپ کمار) کو بالاصاحب ٹھاکرے کی جانب سے نشان امتیاز وصول کرنے پر اعتراض کا سامنا کرنا پڑا اور ان کے بنگلے کے باہر مظاہرے ہوئے تو اس موقع پر یوسف انکل نے ایک انٹرویو دیا جس میں انھوں نے کہا کہ میں آج اپنے دوست راج کو بہت یاد کر رہا ہوں، وہ میرے یا کسی دوسرے فنکار کے خلاف اس ایجیٹیشن کو بغیر جواب کے جانے نہیں دیتے تھے۔۔۔

اُس وقت پاپا نہیں رہے تھے (راج کپور دس سال قبل 1988 میں وفات پا چکے تھے) لیکن اس بات نے ہمیں اتنا فخر محسوس کرایا کہ یوسف انکل جیسا کوئی دانشور ہمارے والد کو یاد کر رہا ہے اور انھیں ایک نڈر آدمی ہونے کا کریڈٹ دے رہا ہے جو ایسی کسی آزمائش پر اٹھ کھڑا ہوتا تھا۔

دلیپ کمار سات جولائی2021 کو 98 سال کی عمر میں وفات پا گئے تھے اور اگر آج وہ زندہ ہوتے تو آج کے دن یعنی11 دسمبر کو اپنا 102واں جنم دن منا رہے ہوتے۔

اس مضمون میں ہم دلیپ کمار کے ساتھ جڑے چند تنازعات کا ذکر کر رہے ہیں جو پاکستان کے ساتھ اُن کے تعلق اور مسلمان ہونے کی وجہ سے وقتاً فوقتاً سر اٹھاتے رہے۔

مصنف ویر سانگھوی کے مطابق دلیپ کمار کی انڈیا میں مقبولیت ایک طرف لیکن مسلمان ہونے کی وجہ سے انھیں بار بار جس امتحان سے گزرنا پڑا ہے وہ ایک الگ کہانی ہے۔

اس بات کا احساس دلیپ کمار کو بھی تھا جو انڈیا کے پہلے وزیر اعظم پنڈت جواہر لعل نہرو کے ہیرو تھے اور ان کے سماجی اور فلاحی منصوبوں کو آگے بڑھانے کے لیے اپنی مقبولیت کا بھرپور استعمال کرتے تھے۔

یوسف خان عرف دلیپ کمار

یوسف خان 11 دسمبر 1922 کو غیر منقسم ہندوستان کے شہر پشاور (موجودہ پاکستان) کے محلہ قصہ خوانی میں پیدا ہوئے اور پھر کم عمری میں ہی اپنے والدین کے ساتھ بمبئی چلے آئے۔

اگرچہ تقسیم ہند سے پہلے ہی وہ فلم ’جوار بھاٹا‘ کے ذریعے فلمی دنیا میں آ گئے تھے لیکن اس سے پہلے انھیں اپنا مسلم نام بدلنا پڑا تھا کیونکہ اس دور کی فضا میں ہندوستان میں مسلم نام کو شاید پذیرائی نہیں مل سکتی تھی۔

اگرچہ یوسف خان کے سامنے اسکرین کے لیے کئی ناموں کی تجویز پیش کی گئی لیکن انھوں نے ’دلیپ کمار‘ کو منتخب کیا۔

اگر اس دور کی بات کی جائے تو نام بدلنے کا قصہ یوسف خان تک محدود نہیں تھا۔ اداکارہ مہ جبین بانو نے مینا کماری کے نام سے شہرت حاصل کی، ممتاز جہاں بیگم نے مدھوبالا کے نام سے لوگوں کے دلوں پر راج کیا جبکہ حامد علی خان کا نام اجیت اور قاضی بدرالدین کا نام جانی واکر لگا۔

اگرچہ اشوک کمار، دیو آنند اور گرو دت کے نام بھی بدلے ہوئے ہیں لیکن معروف صحافی اور فلم نقاد ضیا السلام کے مطابق ان کے ناموں سے ان کا مذہب نہیں بدلتا یعنی وہ ہندو تھے اور انھوں نے بدلے ہوئے ہندو نام ہی اپنائے۔

بہرحال تقسیم ہند کے بعد فلم انڈسٹری میں یہ مفروضہ گردش کرتا رہا کہ مسلم نام کو شاید وہ پذیرائی نہ ملے جو آج شاہ رخ خان، سلمان خان، عامر خان اور سیف علی خان وغیرہ کو حاصل ہے۔

یہ بھی پڑھیں: بشریٰ بی بی کیخلاف ٹیلی گراف ایکٹ کے تحت مقدمہ درج

دلیپ کمار کو گرفتاری کا خطرہ

بہر حال دلیپ کمار کے ساتھ ایک واقعہ کا ذکر صحافی ویر سنگھوی اور ان کی سابق اہلیہ ملاویکا سنگھوی نے بھی کیا ہے کہ کس طرح دلیپ کمار کو ایک واقعے کی وجہ سے گرفتاری کا خدشہ پیدا ہوگیا تھا۔

ملاویکا نے 10 جولائی 2021 کے اپنے ایک مضمون میں اس کا ذکر کیا۔ انھوں نے لکھا: ’ویر سنگھوی (اور میرے سابق شوہر) جن کے والد آنجہانی رمیش سنگھوی بھی دلیپ کمار کے حلقۂ ارباب میں تھے، وہ بتاتے ہیں کہ میری بچپن کی پہلی یاد ’گنگا جمنا‘ کی ریلیز سے متعلق ہے، جسے سینسر بورڈ بغیر کاٹ چھانٹ کے ریلیز کی اجازت دینے کے لیے تیار نہیں تھا۔‘

رمیش سنگھوی چونکہ وکیل تھے، اس لیے دلیپ کمار نے اس فلم کے متعلق اُن سے رابطہ کیا اور ویر سنگھوی کے مطابق وہ دونوں اس فلم پر ہر شام بیٹھتے تھے اور اس پر غور کرتے تھے یہاں تک کہ انھیں اس فلم کے سارے مکالمے یاد ہوگئے تھے۔

ملاویکا لکھتی ہیں کہ حکومت ہند کے ساتھ دلیپ کمار کے معاملے کے بارے میں ویر کی دوسری یاد بہت سنگین ہے۔

بقول ویر سنگھوی: ’مجھے اپنے والد کے چہرے پر صدمے کے تاثرات واضح طور پر یاد ہیں جب دلیپ کمار نے انھیں بتایا کہ ان پر پاکستانی جاسوس ہونے کا الزام لگایا گیا ہے اور شاید وہ گرفتار ہو سکتے ہیں۔ ان دنوں دلیپ کمار انڈیا کے ’عظیم سیکولر‘ فلمی ستارے تھے، جنھیں ان کی وطن پرستی کے لیے جانا جاتا تھا۔ کوئی کیسے سوچ سکتا ہے کہ ایسا آدمی جاسوس ہے؟‘

یہ بھی پڑھیں: 7 سے 11 دسمبر تک کس کس شہر میں بادل برسیں گے؟ محکمہ موسمیات کی اہم پیش گوئی

دلیپ کمار ایک بار گرفتار ضرور ہوئے

ادے تارا نایر کے ساتھ لکھی دلیپ کمار کی سوانح ’دلیپ کمار: دی سبسٹینس اینڈ دی شیڈو‘ میں دلیپ کمار اپنی گرفتاری کا ایک واقعہ یاد کرتے ہوئے بتاتے ہیں کہ ’میں نے انجمن اسلام سکول میں ایک طالب علم کی حیثیت سے برطانوی آئین کا مطالعہ کیا تھا اور اس علم کو ایک ایسی تقریر کی تیاری میں استعمال کیا کہ جس میں محنتی، سچے اور غیر متشدد لوگوں کی قوم کے طور پر ہم نے اپنی برتری کا خاکہ پیش کیا۔‘

انھوں نے مزید کہا کہ ’میری تقریر پر خوب تالیاں بجیں اور مجھے خوشی محسوس ہوئی لیکن میری کامیابی کا مزہ وقتی تھا۔ حیرت کی بات یہ ہے کہ پولیس افسران کا ایک گروپ جائے وقوعہ پر پہنچا اور مجھے ہتھکڑیاں لگا کر کہا کہ مجھے میرے برطانوی مخالف خیالات کی وجہ سے گرفتار کیا جاتا ہے۔‘

’مجھے یرواڈا جیل لے جایا گیا اور ایک کوٹھڑی میں بند کر دیا گیا جس میں کچھ انتہائی مہذب نظر آنے والے لوگ تھے، جن کے بارے میں مجھے بتایا گیا تھا کہ وہ ستیہ گرہی (مہاتما گاندھی کے پیروکار جو عدم تشدد کے ساتھ مزاحمت کر رہے تھے) ہیں۔ میری آمد پر جیلر نے مجھے ’گاندھی والا‘ کہا۔ میں سمجھ نہیں سکا کہ وہ میرے لیے یہ اصطلاح کیوں استعمال کر رہے ہیں جب تک کہ میں نے پولیس والوں کو سیل کے تمام قیدیوں کو گاندھی والا کہتے ہوئے نہ سُنا۔ یہ گاندھی جی کے پیروکاروں کے طور پر ہمیں بیان کرنے کا ان کا طریقہ تھا۔‘

یہ بھی پڑھیں: وفاق کے ساتھ ساتھ صوبے میں بھی تعلیمی ادارے بند رہیں گے

نشان امتیاز پر تنازع

دلیپ کمار کو انڈیا اور پاکستان کے درمیان کے ایک پُل اور ’امن کے پیامبر‘ کے طور پر دیکھا اور بیان کیا جاتا ہے لیکن جب حکومت پاکستان نے 1997998 میں انھیں نشان امتیاز دینے کا اعلان کیا تو ایک بار پھر اُن پر دباؤ بڑھا اور یہ دباؤ اتنا شدید تھا کہ انھیں اس وقت کے وزیر اعظم اور بی جے پی رہنما اٹل بہاری واجپئی سے مشورہ کرنا پڑا کہ انھیں یہ اعزاز قبول کرنا چاہیے یا نہیں۔

اپنی کتاب میں دلیپ کمار اس کا ذکر کرتے ہوئے کہتے ہیں: ’میرا پاکستان کا دوسرا دورہ مارچ 1998 کے نصف آخر میں پاکستان کا اعلیٰ ترین سول اعزاز نشان امتیاز حاصل کرنے کے لیے تھا، جسے آرڈر آف ایکسیلنس یا کم و بیش آرڈر آف دی برٹش ایمپائر اور امریکہ کے صدارتی تمغہ برائے آزادی کے برابر کہہ سکتے ہیں۔ اسے تسلیم کرنے پر ایک تنازع کھڑا ہو گیا جب شیو سینا کے سربراہ بالا صاحب ٹھاکرے (جو پاکستان مخالف موقف کے لیے مشہور ہیں) نے اعلان کیا کہ مجھے ایوارڈ نہیں لینا چاہیے۔ انھوں نے بالواسطہ طور پر میری دیانت اور حب الوطنی پر شکوک و شبہات ظاہر کیے، جو بلاوجہ تھے اور جس کی وجہ سے مجھے شدید صدمہ پہنچا۔‘

’میں نے اس وقت کے انڈیا کے وزیر اعظم اٹل بہاری واجپائی سے مشورہ طلب کیا اور انھوں نے واضح طور پر اعلان کیا کہ مجھے ایوارڈ لینا چاہیے۔ جیسا کہ انھوں نے صراحت کے ساتھ کہا ’آپ ایک فنکار ہیں اور اس طرح آپ کو سیاسی یا جغرافیائی حدود میں باندھا نہیں جا سکتا۔ آپ نے جو انسانی خدمت کی ہے اس کے لیے آپ کو منتخب کیا گیا ہے اور دونوں ممالک کے درمیان تعلقات کو بہتر بنانے کے لیے آپ کی کوششیں سب کو معلوم ہیں۔ اس کا نہ لینا صرف تعلقات کو مزید خراب کریں گے اور انڈیا اور پاکستان کے درمیان خراب ماحول پیدا ہو گا۔‘

ویر سنگھوی نے اس واقعے پر لکھا کہ جس دلیپ کمار نے بار بار اپنی وطن پرستی اور اپنی وفاداری ثابت کی انھیں اٹل بہاری واجپئی کے پاس جا کر یہ کہنے میں کتنی تکلیف ہوئی ہو گی کہ ’سر آپ جو کہیں گے وہیں کریں گے۔‘

بدلے ہوئے حالات

ہم نے فلم نقاد اور ’بینگ مسلم ان ہندو انڈیا‘ کتاب کے مصنف ضیا السلام سے اس کے متعلق پوچھا تو انھوں نے کہا کہ دلیپ کمار کا یا مینا کماری کا یا مدھو بالا اور اجیت کا ایک ہندو نام اختیار کرنا ہی بتاتا ہے کہ اس وقت انڈیا میں مسلم نام قابل قبول نہیں تھا۔

انھوں نے مزید بتایا کہ تقسیم تک دہلی کا امپریل سنیما ہال جو ہالی وڈ کی فلمیں دکھاتا تھا اور مسلم معاشرے پر مبنی فلمیں دکھاتا تھا اس نے یکایک ایسی فلمیں دکھانا بند کر دیا اور اس نے پنجابی فلمیں اور ہندو اساطیر پر مبنی فلمیں دکھانا شروع کر دیا اور یہی حال آشرم کے شالیمار سنیما ہال کا تھا۔

ان کے مطابق وہ پاکستان سے آنے والے پنجابیوں اور ہندوؤں کی ہمدردی کے لیئے ایسا کر رہے تھے۔

انھوں نے کہا کہ ہندوستان میں تقسیم سے پہلے مسلمانوں کی آبادی 40 فیصد سے زیادہ تھی، جو 1951 کی مردم شماری کے مطابق تقسیم کے بعد انڈیا میں 11 فیصد رہ گئی۔ اس صورتحال میں نہرو نے سنیما کو خلیج کو کم کرنے کے ایک ذریعے کے طور پر دیکھا اور اس دور میں ’بیجو باورا‘، ’مغل اعظم‘ اور ’انار کلی‘ جیسی تاریخی فلمیں بنائی گئیں تاکہ سماج میں آنے والی تلخیوں کو کم کیا جا سکے، اور دلیپ کمار ان کے ایجنڈے کی تکمیل کرنے والوں میں پیش پیش تھے۔

سماجی انصاف پر مبنی دلیپ کمار کی فلم ’گنگا جمنا‘ یا پھر مشین اور انسان کے درمیان کشمکش والی فلم ’نیا دور‘ نہرو کے نئے ہندوستان کی تعمیر کے لیے بنائی گئی تھیں۔

انھوں نے بتایا کہ نہ صرف 60 کی دہائی میں دلیپ کمار پر پاکستانی جاسوس ہونے کے الزامات لگے بلکہ 90 کی دہائی میں بھی انھیں پاکستان نواز ہونے کی تنقید سہنی پڑی۔

اس بارے میں ہم نے پونے میں قائم ڈی وائی پاٹل انٹرنیشنل یونیورسٹی کے سکول آف میڈیا اینڈ جرنلزم کے ڈائریکٹر پروفیسر اروند داس سے بات کی تو انھوں نے کہا کہ ’یہ بڑی افسوس کی بات ہے کہ دلیپ کمار جیسے عظیم اداکار کو، جو قومی افتخار ہیں، ایسے امتحانات سے گزرنا پڑتا ہے۔‘

انھوں نے مزید کہا کہ ’یہ صرف دلیپ کمار تک محدود نہیں ہے، بلکہ اگر آپ دیکھیں تو مشہور مصور مقبول فدا حسین کو بھی سخت تنقید کا سامنا کرنا پڑا تھا اور انھیں اپنے وطن میں دو گز زمین تک نہیں ملی۔ یہی معاملہ انڈیا کے معروف کرکٹر اور سابق کپتان محمد اظہرالدین کے ساتھ بھی پیش آیا، جنہیں بھی غدار کہا گیا۔‘

انھوں نے کہا کہ اگرچہ دلیپ کمار کی موت کے بعد ان کی کہانی ختم ہو چکی ہے، لیکن یہ انڈیا کے لیے ایک لمحۂ فکریہ ہے کہ وہ اپنی اقلیت کے ساتھ کیسا سلوک روا رکھتی ہے!