بانی پی ٹی آئی کی تینوں بہنوں نے دھرنا دیدیا

راولپنڈی میں حراست میں نئی صورتحال

راولپنڈی (ڈیلی پاکستان آن لائن) پولیس حراست میں موجود بانی پی ٹی آئی کی تینوں بہنوں نے اڈیالہ روڑ پر واقع شادی ہال میں دھرنا دیا۔

یہ بھی پڑھیں: لاہور پولو کلب کے زیراہتمام پیٹرینز ایبک پولو کپ 2024ء میں دو اہم مقابلے

دھرنے کی تفصیلات

تفصیلات کے مطابق شادی ہال کے باہر پی ٹی آئی کے کارکنان جمع ہونا شروع ہوگئے ہیں، جو نعرے بازی کر رہے ہیں۔ پولیس نے ہال کا مرکزی دروازہ بند کردیا ہے۔ پی ٹی آئی کارکنوں نے علیمہ خان سمیت تینوں بہنوں کی رہائی کا مطالبہ کیا ہے جبکہ شادی ہال کے باہر پارٹی قیادت موجود نہیں ہے۔

یہ بھی پڑھیں: پاکستان میں ایک سابق وزیراعظم کو پھانسی ہوئی، اس پارٹی نے بھی ردعمل میں وہ کچھ نہیں کیا جو 9 مئی کو ہوا، اٹارنی جنرل

پولیس کی پیشکش کا انکار

"جنگ" نے ذرائع کے حوالے سے بتایا ہے کہ راولپنڈی پولیس نے تینوں بہنوں کو گھر جانے کی پیشکش کی، جسے انہوں نے قبول کرنے سے انکار کردیا۔ پولیس حکام نے بانی پی ٹی آئی کی بہنوں کو اڈیالہ جیل کے باہر سے حراست میں لیا اور کچھ آگے جا کر گاڑی روکی۔ انہوں نے خواتین سے کہا کہ آپ کو تھانے نہیں لے جانا ہے، اب آپ اپنے گھر جائیں۔ بانی پی ٹی آئی کی بہنوں اور عالیہ حمزہ نے پولیس کی بات ماننے اور واپس جانے سے انکار کردیا۔ انہوں نے پولیس حکام سے اصرار کیا کہ اگر آپ نے حراست میں لیا ہے تو تھانے لے جائیں۔

یہ بھی پڑھیں: جائیداد کی تقسیم کا معاملہ، عدالت نے چوہدری برادران کو طلب کرلیا

پولیس کی نقل و حمل

اس کے بعد پولیس پی ٹی آئی کی زیر حراست خواتین کو لے کر نجی شادی ہال پہنچی اور تمام خواتین پولیس وین سے اتر کر شادی ہال کے لان میں بیٹھ گئیں۔ پولیس افسران بھی لان میں بانی پی ٹی آئی کی بہنوں کے ساتھ بیٹھ گئے، جبکہ شادی ہال کا مرکزی گیٹ بند ہے اور عام افراد کو داخلے سے روک دیا گیا ہے۔

حراست میں لیے گئے دیگر رہنما

اس سے قبل راولپنڈی پولیس نے بانی تحریک انصاف کی تینوں بہنوں کو حراست میں لے لیا تھا اور انہیں وین میں بٹھایا تھا۔ پولیس حکام کی طرف سے حراست میں لیے گئے دیگر رہنماؤں میں صاحبزادہ حامد رضا، عالیہ حمزہ، نادیہ خٹک اور بانی چیئرمین کے کزن قاسم خان شامل ہیں۔