فیس بک مارکیٹ پلیس پر انسانی ہڈیوں کی خریدو فروخت پر خاتون گرفتار، کھوپڑی کتنے میں بیچ رہی تھی؟

فلوریڈا کی خاتون کی گرفتاری

واشنگٹن (ڈیلی پاکستان آن لائن) فلوریڈا کی ایک خاتون کو انسانی ہڈیاں آن لائن خریدنے اور فروخت کرنے کے الزام میں گرفتار کر لیا گیا ہے۔ پولیس کے مطابق 52 سالہ کمبرلی این اسکوپر پر انسانی ٹشوز کی تجارت کا مقدمہ درج کیا گیا ہے۔ فوکس نیوز کے مطابق اورنج سٹی پولیس نے بتایا کہ ملزمہ کو 7500 ڈالر کی ضمانت پر وولوشیا کاؤنٹی جیل سے رہا کر دیا گیا ہے۔

یہ بھی پڑھیں: کھانے میں تھوک اور پیشاب ملانے کی افواہی ویڈیوز سے بھارتی ریاستوں میں شور مچ گیا

انسانی ہڈیوں کی فروخت کی اطلاعات

پولیس کو 21 دسمبر 2023 کو ایک مقامی دکان کے فیس بک مارکیٹ پلیس پر انسانی ہڈیاں فروخت کرنے کی اطلاعات موصول ہوئیں۔ دکان کے فیس بک پیج سے موصولہ تصاویر میں فروخت کے لیے پیش کیے جانے والے انسانی ڈھانچے کے حصے دیکھے جا سکتے تھے۔ رپورٹس کے مطابق 'وکڈ ونڈرلینڈ' نامی اس دکان میں دو انسانی کھوپڑیاں 90 ڈالر، کندھے اور ہنسلی کی ہڈی 90 ڈالر، پسلی 35 ڈالر، مہروں کا حصہ 35 ڈالر اور کھوپڑی کا ایک حصہ 600 ڈالر میں فروخت ہو رہا تھا۔ پولیس نے انسانی باقیات کو بطور ثبوت ضبط کرتے ہوئے میڈیکل کے لیے بھیج دیا۔

گرفتاری کے بعد کا بیان

گرفتاری کی دستاویزات کے مطابق ملزمہ نے پولیس کو بتایا کہ دکان میں موجود تمام انسانی ہڈیاں پرائیویٹ سیلرز سے خریدی گئی تھیں اور ان کے پاس خریداری کے دستاویزات موجود ہیں۔ تاہم اسکوپر نے بعد میں دعویٰ کیا کہ یہ ہڈیاں دراصل "تعلیمی ماڈلز" تھیں۔ ریاستی قانون کے مطابق فلوریڈا میں ایسے ماڈلز کی فروخت جائز ہے۔ فوکس نیوز کے مطابق دکان کی مالکن نے پولیس کو بتایا کہ وہ کئی سال سے انسانی ہڈیاں فروخت کر رہے ہیں لیکن انہیں علم نہیں تھا کہ فلوریڈا میں یہ غیرقانونی ہے۔