اسلام آباد میں اوورسیز پاکستانیوں کا پہلا سالانہ کنونشن،دنیا بھر سے پاکستانیوں کی شرکت

اسلام آباد (ڈیلی پاکستان آن لائن) وفاقی دارالحکومت اسلام آباد میں اوورسیز پاکستانیوں کا پہلا سالانہ کنونشن منعقد ہوا، جس میں دنیا بھر سے پاکستانیوں نے شرکت کی۔ کنونشن کا مقصد دیار غیر میں رہنے والے پاکستانیوں کی خدمات کو سراہنا ہے۔

نجی ٹی وی سما نیوز کے مطابق، اس تقریب میں وزیراعظم شہبازشریف، نائب وزیراعظم اسحاق، اور آرمی چیف جنرل عاصم منیر نے شرکت کی۔ وفاقی وزرا عبدالعلیم خان، عطا تارڑ، امیر مقام، طارق فضل چودھری کے علاوہ عون چودھری، فیصل واوڈا اور دیگر اہم شخصیات بھی موجود تھیں۔ گورنر سندھ کامران ٹیسوری نے بھی تقریب میں شرکت کی۔

سید قمر رضا نے کہا کہ بیرون ملک مقیم پاکستانی ملک کے سفیر اور چہرہ ہیں اور اوورسیز پاکستانیوں کے مسائل کے حل کیلئے کوشاں ہیں۔ کنونشن کی کامیابی میں آرمی چیف کا مکمل تعاون حاصل رہا۔ قمر رضا نے تقریب میں دنیا بھر سے آئے پاکستانیوں کو خوش آمدید کہا۔

قمر رضا نے مزید کہا کہ وزیراعظم شہبازشریف نے پروگرام کیلئے خصوصی وقت دیا اور اوورسیز پاکستانیوں کے مسائل کے حل کیلئے اعلیٰ سطحی کمیٹی تشکیل دی ہے۔ دنیا کے 160 ممالک میں ایک کروڑ 20 لاکھ پاکستانی موجود ہیں۔