پی آئی اے شیئرز کی نجکاری: بولی دہندگان کی اہلیت کے معیار سے متعلق درخواستیں طلب

نجکاری کمیشن کی نئی پیش رفت

اسلام آباد (ڈیلی پاکستان آن لائن) نجکاری کمیشن نے پاکستان انٹرنیشنل ایئرلائنز کارپوریشن لمیٹڈ (پی آئی اے سی ایل) کے 51 سے 100 فیصد حصص کی نجکاری کے لیے ممکنہ بولی دہندگان کے انتخاب کے لیے پیشگی اہلیت کے معیار کی درخواستیں طلب کرلی ہیں۔

یہ بھی پڑھیں: ترک خاتون اوّل کی خصوصی دعوت ،وزیراعلیٰ مریم نواز ترکیہ کا دورہ کریں گی

درخواست دینے کی آخری تاریخ

نجی ٹی وی چینل ایکسپریس نیوز کی رپورٹ کے مطابق، پیشگی اہلیت کے معیار کی درخواستیں تین جون 2025 تک پراسیسنگ فیس کے ساتھ نجکاری کمیشن کے پاس جمع کروانی ہوں گی۔ نجکاری کمیشن نے پیشگی اہلیت کے معیار کی درخواستوں کی وصولی کے لیے ایک اشتہار جاری کیا ہے۔

بورڈ کی منظوری

واضح رہے کہ نجکاری کمیشن بورڈ نے پچھلے ہفتے پی آئی اے سی ایل کے 51 سے 100 فیصد حصص کی نجکاری کے لیے ممکنہ بولی دہندگان کے انتخاب کے لیے پیشگی اہلیت کے معیار کی منظوری دی تھی۔