سورج نے تیور بدلنا شروع کردئیے، درجہ حرارت 47 سینٹی گریڈ سے تجاوز کرگیا

جیکب آباد کی حالیہ گرمی

جیکب آباد(آئی این پی) جیکب آباد میں سورج نے تیور بدلنا شروع کردئیے ہیں، درجہ حرارت 47 سینٹی گریڈ سے تجاوز کرگیا۔ ہیٹ ویو کے باعث متعدد افراد بے ہوش ہوگئے ہیں۔ بجلی کی بدترین لوڈشیڈنگ اور ٹرپنگ نے عوام کی زندگی اجیرن بنادی ہے۔

یہ بھی پڑھیں: طلحہ انجم پرکانسرٹ کے دوران بوتل پھینکنے پر ہانیہ عامر برس پڑیں

درجہ حرارت میں اضافہ

تفصیلات کے مطابق جیکب آباد میں روز بروز گرمی کی شدت میں اضافہ ہورہا ہے۔ جمعرات کے روز جیکب آباد اور گردونواح کے علاقوں میں گرمی کا درجہ حرارت 47 سینٹی گریڈ تک ریکارڈ کیا گیا۔ شدید گرمی کی وجہ سے شہری گھروں میں محصور ہوگئے ہیں، جبکہ بے ہوش ہونے والے شہریوں کی اطلاعات موصول ہوئی ہیں۔

یہ بھی پڑھیں: خیبرپختونخوا میں پولیس کا سرچ آپریشن، 113 مشتبہ افراد گرفتار

بجلی کی لوڈشیڈنگ کا اثر

جیکب آباد میں ایک طرف قیامت خیز گرمی تو دوسری جانب سیپکو حکام کی جانب سے بدترین لوڈشیڈنگ اور ٹرپنگ نے عوام کی زندگی اجیرن بنادی ہے۔ شہری علاقوں میں 12 سے 16 گھنٹے جبکہ دیہی علاقوں میں کئی کئی دن تک بجلی بند کی جاتی ہے، جس کی وجہ سے عوام شدید اذیت کا شکار ہیں۔

یہ بھی پڑھیں: بجٹ میں تنخواہ دار طبقے کو ریلیف کی تجویز شامل، 50 ارب روپے تک فائدہ

پینے کے پانی کی قلت

گرمی کی شدت میں اضافے اور بجلی کی لوڈشیڈنگ کی وجہ سے شہر میں پینے کے پانی اور برف کی قلت پیدا ہوگئی ہے۔ شہریوں نے مطالبہ کیا ہے کہ بجلی کی لوڈشیڈنگ اور ٹرپنگ کا سلسلہ بند کرکے عوام کو ریلیف فراہم کیا جائے۔

ڈاکٹروں کی ہدایت

ڈاکٹروں نے عوام کو خبردار کرتے ہوئے ہدایت کی ہے کہ بلاوجہ گھروں سے باہر نہ نکلیں، پانی کا زیادہ سے زیادہ استعمال کریں اور باہر نکلتے وقت سر کو ڈھانپ کر رکھیں۔