امریکہ کو قطر سے ملنے والا طیارہ وصول ہو گیا، امریکی صدر کے سرکاری طیارے کے طور پر خدمات انجام دے گا
امریکہ نے قطر کی جانب سے دیا گیا بوئنگ 747 قبول کر لیا
واشنگٹن (ڈیلی پاکستان آن لائن) امریکی محکمہ دفاع نے تصدیق کی ہے کہ قطر کی جانب سے تحفے میں دیا گیا ایک لگژری بوئنگ 747 طیارہ صدر ٹرمپ کے نئے ائیر فورس ون کے طور پر استعمال کے لیے قبول کر لیا گیا ہے۔
یہ بھی پڑھیں: فرانس میں مہاجرین کے کیمپ پر فائرنگ، 4 افراد ہلاک
محکمہ دفاع کا بیان
غیر ملکی خبررساں ایجنسی کے مطابق محکمہ دفاع نے بتایا کہ امریکی ایئرفورس سے کہا گیا ہے کہ وہ طیارے کو جلد از جلد ایئرفورس ون کے طور پر استعمال کے قابل بنانے کا انتظام کرے۔ پینٹاگون کے مطابق امریکی وزیر دفاع پیٹ ہیگستھ نے 400 ملین ڈالر مالیت کا یہ طیارہ سرکاری طور پر وصول کیا، جو امریکی صدر کے سرکاری طیارے کے طور پر خدمات انجام دے گا۔ پینٹاگون کے ترجمان شان پرنیل نے کہا کہ محکمہ دفاع ’طیارے میں سکیورٹی اور مشن سے متعلق ضروری تکنیکی تقاضوں کو یقینی بنانے کے لیے کام کرے گا‘۔
یہ بھی پڑھیں: علامہ اقبال اور ایما: عشق یا سادگی کی انتہا؟
سکیورٹی اپ گریڈز کی ضرورت
ماہرین کا کہنا ہے کہ قطر کے شاہی خاندان کی جانب سے پیش کیے گئے اس طیارے کو ’ایئرفورس ون‘ میں تبدیل کرنے کے لیے کئی سکیورٹی اپ گریڈز، حساس مواصلاتی نظام، اور میزائل حملوں سے بچاؤ کی صلاحیت جیسے عوامل شامل کرنا ہوں گے، جن پر بھاری لاگت آ سکتی ہے۔
بوئنگ کمپنی کا منصوبہ
یہ بات بھی قابل ذکر ہے کہ بوئنگ کمپنی کو 2018 میں امریکی حکومت کی جانب سے دو نئے ایئرفورس ون طیارے تیار کرنے کا 3.9 ارب ڈالر کا آرڈر ملا تھا لیکن اس منصوبے میں شدید تاخیر ہوئی ہے اور طیاروں کی لاگت 5 ارب ڈالر سے تجاوز کر چکی ہے۔
