گڈ گورننس کے اہداف کو ہر صورت پورا کیا جائے گا: وزیراعلیٰ مریم نواز کی سپیکر ملک محمد احمد خان سے ملاقات میں گفتگو

ملاقات کی تفصیلات

لاہور (ڈیلی پاکستان آن لائن) وزیراعلیٰ پنجاب مریم نواز نے سپیکر پنجاب اسمبلی ملک محمد احمد خان سے ملاقات کی۔ اس ملاقات میں بجٹ، ترقیاتی پراجیکٹس اور ملکی سیاسی صورتحال پر گفتگو کی گئی۔ وزیراعلیٰ نے بجٹ اجلاس کے کامیاب انعقاد پر سپیکر پنجاب اسمبلی ملک محمد احمد خان کو مبارکباد دی۔

یہ بھی پڑھیں: موٹروے ایم 5 کو جلال پورپیر والا کے قریب سیلاب کے باعث بند کردیا گیا

بجٹ کی اہمیت

سپیکر پنجاب اسمبلی ملک محمد احمد خان نے عوامی فلاحی بجٹ پیش کرنے پر وزیراعلیٰ کا شکریہ ادا کیا۔ وزیراعلیٰ مریم نواز نے ملاقات کے دوران گفتگو کرتے ہوئے کہا کہ عوامی خدمت، فلاح و بہبود اور گڈگورننس کے اہداف کو ہر صورت پورا کیا جائے گا۔ بجٹ 2025-26 میں تعلیم، صحت اور ڈویلپمنٹ کے لیے سب سے زیادہ فنڈز مختص کرنے کا ریکارڈ قائم کیا گیا ہے۔ مسلم لیگ (ن) عوام کی جماعت ہے اور صوبے بھر میں یکساں ترقیاتی کام کر رہی ہے۔ طلباء کو لیپ ٹاپ اور ہونہار سکالر شپ دے کر احسان نہیں، بلکہ حق ادا کیا جا رہا ہے۔ میری پوری توجہ عوام کی فلاح و بہبود پر ہے۔ ایک سال میں عوام کی بھرپور خدمت کی بہترین کوشش کی گئی، اور اس سال بھی یہ کوشش جاری رہے گی۔

عوامی فلاحی اقدامات

سپیکر پنجاب اسمبلی ملک محمد احمد خان نے کہا کہ وزیراعلیٰ مریم نواز نے عوامی فلاحی بجٹ دے کر پنجاب کے عوام کے دل جیت لیے ہیں۔ وزیراعلیٰ نے ڈویلپمنٹ پراجیکٹس اور عوامی فلاحی اقدامات کے لئے قائد محمد نواز شریف اور وزیر اعظم شہباز شریف کی روایت کو عمدگی سے آگے بڑھایا ہے۔