وزیراعلیٰ مریم نواز مری سے واپسی پر فیلڈ ہسپتال دیکھ کر رک گئیں،ادویات کی مفت فراہمی اور ورکنگ کے بارے میں تفصیلات حاصل کیں۔

وزیراعلیٰ پنجاب کا فیلڈ ہسپتال کا اچانک معائنہ

لاہور (ڈیلی پاکستان آن لائن) وزیراعلیٰ پنجاب مریم نواز مری سے واپسی پر فیلڈ ہسپتال دیکھنے کے لیے رک گئیں۔ انہوں نے مری کے نواح میں مغل آباد کے قریب ایکسپریس وے پر کھڑے فیلڈ ہسپتال کا اچانک معائنہ کیا اور وہاں دستیاب سہولتوں کا تفصیلی جائزہ لیا۔

یہ بھی پڑھیں: جو آرمی چیف مرضی کا ہو، انہیں اقتدار میں رکھے وہ پی ٹی آئی کا باپ ہوتا ہے‘خواجہ آصف کا سخت بیان

ڈاکٹروں اور مریضوں سے بات چیت

وزیراعلیٰ مریم نواز نے ہسپتال میں تعینات ڈاکٹر اور طبی عملے سے بات چیت کی اور فیلڈ ہسپتال کی ورکنگ کے بارے میں تفصیلات حاصل کیں۔ انہوں نے وہاں موجود مریضوں اور ان کے اہل خانہ سے بھی ملاقات کی اور طبی سہولتوں کے بارے میں معلومات حاصل کی۔ وزیراعلیٰ نے مفت طبی ٹیسٹ اور ادویات کی فراہمی کے بارے میں بھی دریافت کیا۔

یہ بھی پڑھیں: کمار سانو نے ذہنی، جسمانی تشدد کیا، مجھے دوران حمل بھوکا رکھا اور بچوں کے لیے بھی دودھ بند کر دیا تھا، سابق اہلیہ نے سنگین الزام عائدکردیے۔

شہریوں کے تاثرات

شہری نے وزیراعلیٰ مریم نواز سے بات چیت کرتے ہوئے کہا کہ "فیلڈ ہسپتال شاندار اقدام ہے، ضعیف خواتین اور مریضوں کو بہت فائدہ ہو رہا ہے۔" انہوں نے مزید کہا کہ "ہم کبھی سوچ بھی نہیں سکتے تھے کہ دشوارگزار راستوں سے گزر کر ہسپتال جانے کی صعوبت اٹھائے بغیر علاج کی سہولتیں گھر کی دہلیز پر ملیں گی۔"

وزیراعلیٰ کی یقین دہانی

وزیراعلیٰ مریم نواز نے کہا کہ "عوام کی سہولت کے لیے اب فیلڈ ہسپتال خود چل کر ان کی دہلیز تک پہنچ چکا ہے۔ اللہ تعالیٰ کے فضل و کرم سے فیلڈ ہسپتال اور کلینک آن ویل ہسپتال سے سوا کروڑ سے زائد مریض فیض یاب ہو چکے ہیں۔" انہوں نے اس عزم کا اظہار کیا کہ "انسانیت کی خدمت ہی مسلم لیگ (ن) کا ہمیشہ سے منشور رہا ہے، اور ہم فیلڈ ہسپتال اور کلینک آن ویل کا دائرہ کار مزید بڑھائیں گے۔ صحت کی سہولتیں عوام کا بنیادی حق ہیں، ہم عوامی ذمہ داریاں پوری کریں گے۔"