شاہدرہ ٹاؤن میں کمسن ڈرائیور کی غفلت سے اندوہناک حادثہ، ایک شخص جاں بحق، متعدد زخمی

افسوسناک حادثہ لاہور میں پیش آیا

لاہور (رپورٹ: زین بابو) شاہدرہ ٹاؤن میں آج ایک افسوسناک اور دل دہلا دینے والا واقعہ پیش آیا، جہاں ایک کم سن بچہ گاڑی چلا رہا تھا جو تیز رفتاری کے باعث بے قابو ہو گئی اور دس سے بارہ موٹر سائیکلوں کو ٹکر مار دی۔ حادثے کے نتیجے میں متعدد افراد شدید زخمی ہوئے جبکہ ایک شخص ملک امین زخموں کی تاب نہ لاتے ہوئے موقع پر ہی جاں بحق ہو گیا۔

یہ بھی پڑھیں: پڑوسی ملک میں جعلی عدالت کا انکشاف، 5 سال تک جعلی جج، وکیل اور اردلی متحرک رہے لیکن بھانڈا کیسے پھوٹا؟ جانئے

حادثے کی تفصیلات

عینی شاہدین کے مطابق واقعہ رات کے وقت پیش آیا جب ایک کم عمر بچہ بغیر کسی ڈرائیونگ لائسنس کے کار چلا رہا تھا۔ اچانک تیز رفتاری اور ڈرائیونگ پر گرفت نہ ہونے کے باعث گاڑی بے قابو ہو گئی اور سڑک کنارے کھڑے متعدد موٹر سائیکلوں اور راہگیروں کو کچل دیا۔ ٹکر اتنی شدید تھی کہ کئی موٹر سائیکلیں تباہ ہو گئیں اور لوگ دور جا گرے۔

یہ بھی پڑھیں: آڈیو لیکس کیس: علی امین گنڈا پور کیخلاف فرد جرم کی کارروائی مؤخر

موقع پر جان بحق ہونے والا شخص

ملک امین نامی شہری جو معمول کے کام سے جا رہا تھا، حادثے کا شکار ہو کر موقع پر ہی جان کی بازی ہار گیا۔ دیگر زخمیوں کو فوری طور پر قریبی اسپتال منتقل کیا گیا، جن میں سے بعض کی حالت تشویشناک بتائی جا رہی ہے۔

یہ بھی پڑھیں: بھارتی طیارہ حادثے سے ایک ہفتہ قبل کی گئی بھارتی نجومی کی پیشگوئی نے ہنگامہ برپا کر دیا

پولیس کی کارروائی

حادثے کے فوراً بعد علاقے میں موجود شہریوں نے پولیس کو اطلاع دی۔ تھانہ شاہدرہ ٹاؤن کی ٹیم نے بروقت کارروائی کرتے ہوئے کمسن ملزم کو موقع سے گرفتار کر لیا۔ تھانہ شاہدرہ ٹاؤن کے ایس ایچ او رانا وقاص کی نگرانی میں گرفتاری عمل میں لائی گئی۔ ایس ایچ او نے میڈیا سے گفتگو کرتے ہوئے بتایا کہ ملزم سے تفتیش جاری ہے اور گاڑی کے مالکان کا سراغ لگانے کی بھی کوشش کی جا رہی ہے۔ پولیس اس بات کی بھی تفتیش کر رہی ہے کہ بچہ گاڑی لے کر کس طرح سڑک پر آیا اور گاڑی اس کے سپرد کیسے کی گئی؟

یہ بھی پڑھیں: انگلینڈ کے خلاف فیصلہ کن ٹیسٹ کے لئے قومی ٹیم کا اعلان

علاقے کی عوام کا ردعمل

علاقہ مکینوں اور شہریوں نے اس واقعے پر شدید غم و غصے کا اظہار کیا ہے۔ ان کا کہنا ہے کہ کم عمر بچوں کو گاڑی چلانے کی اجازت دینا ایک سنگین غفلت ہے جس کا نتیجہ آج ایک قیمتی جان کے ضیاع کی صورت میں سامنے آیا ہے۔ شہریوں نے حکومتِ پنجاب اور محکمہ ٹریفک پولیس سے مطالبہ کیا ہے کہ کم عمر ڈرائیونگ کے خلاف سخت اقدامات کیے جائیں، والدین کو جوابدہ بنایا جائے اور ایسے واقعات کی روک تھام کے لیے بھرپور مہم چلائی جائے۔

سیاسی رہنماؤں کا بیان

مسلم لیگ(ن) کے مقامی رہنما اکرام بٹ کا کہنا ہے کہ یہ واقعہ ہمارے معاشرے کے لیے لمحۂ فکریہ ہے جہاں کم سن گاڑیاں چلا رہے ہیں اور جانیں ضائع ہو رہی ہیں۔ ضروری ہے کہ قانون نافذ کرنے والے ادارے اس رویئے کے خلاف سخت کارروائی کریں تاکہ آئندہ ایسے دلخراش واقعات سے بچا جا سکے۔