بے نظیر انکم سپورٹ پروگرام سے شکایت کنندگان کو مالی امداد کی منظوری دیدی گئی

کھلی کچہری کا انعقاد

اسلام آباد (ڈیلی پاکستان آن لائن) وفاقی محتسب اعجاز احمد قریشی کی ہدایت پر وفاقی محتسب سیکرٹریٹ کے ایڈوائزر میجر جنرل (ر) ہارون سکندر پاشا اور کنسلٹنٹ خالد سیال نے کہوٹہ میں کھلی کچہری کے دوران وفاقی اداروں کے خلاف شکایات سنیں۔ انہوں نے متعلقہ اداروں کے افسران کو ہدایات جاری کرکے گیس، بجلی، بے نظیر انکم سپورٹ پروگرام اور نادرا کے خلاف متعدد شکایات موقع پر ہی حل کروا دیں۔

یہ بھی پڑھیں: مودی حکومت پر رافیل ڈیل میں کرپشن اور فراڈ کے الزامات کی دوبارہ گونج

شکایات کی تعداد

کھلی کچہری میں شکایت کنندگان نے وفاقی اور صوبائی محکموں کے خلاف بڑی تعداد میں شکایات پیش کیں۔ شکایت کنندگان نے بتایا کہ کہوٹہ شہر میں سڑکیں جگہ جگہ ٹوٹ چکی ہیں اور بجلی کے متعدد کھمبے گر چکے ہیں، جن کی بحالی کے لیے متعدد درخواستوں کے باوجود محکمہ کوئی کاروائی نہیں کر رہا۔ مزید برآں، بجلی کے اہلکار رشوت کے بغیر کوئی کام نہیں کرتے۔ زیادہ تر شکایات بجلی کے کنکشن اور ٹرانسفارمر نہ لگانے، زائد بلوں، گیس کے کنکشن میں تاخیر، شناختی کارڈ کے اجرا میں تاخیر، اور بلاک ہونے نیز بے نظیر انکم سپورٹ پروگرام سے مالی امداد نہ ملنے سے متعلق تھیں۔

یہ بھی پڑھیں: اے پی ایس بوائز لاہور میں اردو زبان و ادب کے فروغ کے لیے لٹریچر فیسٹیول کا انعقاد

شکایات کا فوری ازالہ

وفاقی محتسب کے افسران نے متعلقہ وفاقی اداروں کو شکایات کے ازالے کے لیے موقع پر ہی احکامات جاری کیے۔ جب کہ صوبائی اداروں سے متعلق شکایات صوبائی محتسب اور ضلعی انتظامیہ کو بھیج دی گئیں۔ کھلی کچہری میں وفاقی اداروں کے مقامی افسران، اے سی کہوٹہ، ضلعی انتظامیہ کے افسران اور میڈیا کے نمائندوں نے بھی شرکت کی۔

میڈیا کے کردار کا اعتراف

قبل ازیں، وفاقی محتسب کے افسران نے وفاقی محتسب کے بارے میں آگاہی لیکچر بھی دیا۔ کھلی کچہری کے بعد وفاقی محتسب کے افسران نے میڈیا کے نمائندوں کی شکایات اور تجاویز سننے کے بعد ان کا شکریہ ادا کرتے ہوئے کہا کہ میڈیا کی وجہ سے عوام الناس میں وفاقی محتسب کے بارے میں آگاہی پیدا ہورہی ہے اور وفاقی محتسب میں آنے والی شکایات میں ہر سال اضافہ ہو رہا ہے۔