ہر صوبے سے لوگ نکلیں گے، علی محمد خان

پی ٹی آئی کی تحریک کا نیا مرحلہ

لاہور (ڈیلی پاکستان آن لائن) پاکستان تحریک انصاف (پی ٹی آئی) کے رہنما علی محمد خان کا کہنا ہے کہ فیصلہ ہوا ہے پنجاب سمیت ہر صوبے سے تحریک میں لوگ نکلیں گے، ہر چھوٹے بڑے شہر سے کارکنوں کو متحرک کرنے کا فیصلہ کیا گیا ہے۔

یہ بھی پڑھیں: جنگ کی صورت میں بھارت کی معیشت بری طرح متاثر ہو گی، سابق بھارتی جج

اجلاس کی تفصیلات

رائیونڈ روڈ پر فارم ہاؤس میں تحریک انصاف کی پارلیمانی پارٹی کے مشترکہ اجلاس کے بعد میڈیا سے گفتگو کرتے ہوئے علی محمد خان نے کہا کہ لاہور سے تحریک نے ہی بانی پی ٹی آئی کو وزیر اعظم بنایا، اب بھی تحریک کی تیاری یہاں سے کی جا رہی ہے، اس لیے اجلاس رکھا کہ آوازیں جاتی امراء میں سنائی دیتی رہیں۔

وزیر اعلیٰ خیبر پختونخوا کی آمد

’’جنگ‘‘ کے مطابق وزیر اعلیٰ خیبر پختونخوا علی امین گنڈا پور کا قافلہ رائیونڈ روڈ پر فارم ہاؤس پہنچا تھا۔ چیئرمین پی ٹی آئی بیرسٹر گوہر اور دیگر رہنما بھی فارم ہاؤس پہنچے۔ فارم ہاؤس میں بیرسٹر گوہر اور علی امین کی زیر صدارت پی ٹی آئی پارلیمانی پارٹی کے اجلاس میں تحریک انصاف کی احتجاجی تحریک کے لائحہ عمل پر مشاورت کی گئی، جس کے بعد پی ٹی آئی رہنماؤں کے اعزاز میں عشائیہ دیا گیا۔ پی ٹی آئی ذرائع کا کہنا ہے کہ اجلاس کے فیصلوں سے کل بذریعہ پریس کانفرنس آگاہ کیا جائے گا۔