حیدرآباد میں کلاؤڈ برسٹ، شدید بارش سے نظامِ زندگی مفلوج

شدید موسلادھار بارش کی صورتحال

حیدرآباد (ڈیلی پاکستان آن لائن) حیدرآباد اور گرد و نواح کے علاقوں میں کلاؤڈ برسٹ کے باعث شدید موسلادھار بارش ہوئی، جس کے نتیجے میں نشیبی علاقے زیرِ آب آگئے اور شہریوں کو شدید مشکلات کا سامنا ہے۔

یہ بھی پڑھیں: تحریک انصاف نے حکومت کو ایک مرتبہ پھر مذاکرات کی پیشکش کردی

ہنگامی الرٹ اور حکومتی اقدامات

ڈپٹی کمشنر زین العابدین کے مطابق شہر میں کلاؤڈ برسٹ ریکارڈ کیا گیا ہے اور ہنگامی الرٹ جاری کر دیا گیا ہے۔ ان کا کہنا ہے کہ پمپنگ اسٹیشنز کو فعال رکھنے کی کوشش کی جا رہی ہے جبکہ بجلی کی بندش کے باعث پانی کی نکاسی جنریٹرز کے ذریعے کی جا رہی ہے۔ پھلیلی نہر کی سطح کو کم کرنے کے لیے محکمہ آبپاشی کو ہدایات جاری کر دی گئی ہیں۔

یہ بھی پڑھیں: سیلابی صورتحال، اسلام آباد کے تمام ہائیکنگ ٹریلز تاحکم ثانی بند کرنے کا فیصلہ

محکمہ موسمیات کے اعداد و شمار

محکمہ موسمیات کے مطابق حیدرآباد شہر میں 53 ملی میٹر جبکہ ائیرپورٹ کے مقام پر 50 ملی میٹر بارش ریکارڈ کی گئی ہے۔ بارش کے باعث حیسکو ریجن کے 220 فیڈرز ٹرپ کر گئے، جس سے بجلی کی فراہمی متاثر ہوئی۔

دیگر متاثرہ علاقے

نجی ٹی وی جیو نیوز کے مطابق ٹنڈو الٰہ یار، ٹنڈو محمد خان، جامشورو، مٹیاری اور ہالہ میں بھی تیز ہواؤں کے ساتھ شدید بارش ہوئی، جس سے کئی علاقوں میں پانی گھروں میں داخل ہو گیا۔ نشیبی علاقوں میں پانی جمع ہونے سے شہریوں کو شدید مشکلات کا سامنا ہے اور معمولاتِ زندگی مفلوج ہوکر رہ گئے ہیں۔