سیکیورٹی فورسز نے پاک، افغان سرحد پر دراندازی کی کوشش ناکام بنا دی، 5 مبینہ خودکش حملہ آور گرفتار

پاک افغان سرحد پر خوارج کی دراندازی

عزیز خیل (ڈیلی پاکستان آن لائن) - پاک افغان سرحد پر خوارج کی دراندازی کی کوشش ناکام بناتے ہوئے سیکیورٹی فورسز کے اہلکاروں نے 5 مبینہ خودکش حملہ آوروں کو گرفتار کر لیا۔

یہ بھی پڑھیں: سرگودھا، ڈپٹی سپرنٹنڈنٹ ڈسٹرکٹ جیل راشن چوری کے الزام میں معطل کردیا گیا

دراندازی کی کوشش کی تفصیلات

’’جنگ‘‘ نے سیکیورٹی کے ذرائع کے حوالے سے بتایا کہ 17 جولائی کی شام 5 بجے خوارج نے پاک افغان سرحد سے دراندازی کی کوشش کی۔ سیکیورٹی فورسز نے اطلاع ملتے ہی 5 مختلف مقامات پر ناکہ بندی کی اور شام 6 بج کر 25 منٹ پر خوارج سرحد سے پاکستانی حدود میں داخل ہوئے۔ دراندازی کے بعد خوارج نے عزیز خیل اور منڈی خیل کی سمت پیش قدمی کی، سیکیورٹی فورسز کی موجودگی کے باعث خوارج نے بیسی خیل کی مسجد میں پناہ لے لی، جسے سیکیورٹی فورسز نے فوری طور پر محاصرہ کر لیا۔

گرفتار شدگان کی معلومات

ذرائع کے مطابق سیکیورٹی فورسز کی بہترین حکمت عملی کے باعث خوارج نے ہتھیار ڈال دیئے۔ گرفتار خوارج افغان شہری ہیں، جن میں سے 3 کے پاس افغان شناختی کارڈ بھی موجود ہیں۔ گرفتار افراد کی عمریں 15 سے 18 سال کے درمیان ہیں، اور تمام خوارج کو مزید تفتیش کے لیے نامعلوم مقام پر منتقل کر دیا گیا ہے۔