مجھے نہیں پتہ کس کو کتنا نقصان ہوا، یہ صرف اسلام آباد کے ڈرائنگ رومزکی گفتگو تھی، مفتاح اسماعیل کی وضاحت

مفتاح اسماعیل کا علی ڈار کے نقصان پر اظہار بیگانگی

اسلام آباد(ڈیلی پاکستان آن لائن) سابق وزیر خزانہ مفتاح اسماعیل نے اسحاق ڈار کے بیٹے علی ڈار کو کرپٹو پراجیکٹس میں ہونے والے نقصان سے متعلق خبروں پر لا علمی کا اظہار کردیا۔ ان کا کہنا تھا کہ "میں نے کبھی بھی کسی کا نام نہیں لیا، ساری دنیا کا گناہ میرے سر پر نہ ڈالیں، اس موضوع پر میں نے بھی وہ ہی باتیں سنی ہیں جو باقی سب نے سنی ہیں۔"

یہ بھی پڑھیں: بلوچستان میں منفی درجہ حرارت، گیس پائپ لائن منجمد، سپلائی متاثر

پوڈ کاسٹ میں گفتگو

صحافی سید خالد مصطفیٰ اور سہیل اقبال بھٹی کے ساتھ پوڈ کاسٹ میں گفتگو کرتے ہوئے مفتاح اسماعیل نے بتا یا کہ "ہم پروگرام کی بریک میں چائے پیتے ہوئے بات کر رہے تھے، ہمارے ساتھ سسٹم لمیٹڈ کے ہیڈ آصف پیر بھی بیٹھے تھے، وہ کرپٹو کو جانتے ہیں مجھے تو کرپٹو کا پتہ بھی نہیں ہے۔"

اس دوران میزبان ندیم ملک نے ان سے سوال کیا کہ "ہم نے سنا ہے کہ کسی ایک بڑے خاندان کے شخص نے 100 ملین تک کا نقصان کیا ہے"، جس پر مفتاح اسماعیل نے جواب دیا کہ "میں نے بھی سنا ہے، اس سے زیادہ میں نے کچھ نہیں بولا، میرا جرم صرف اتنا ہی ہے۔"

یہ بھی پڑھیں: ابھی تو روس نے ٹھیک سے جواب ہی نہیں دیا، امریکہ نے یوکرین کیلئے خطرے کی گھنٹی بجا دی

نقصان کی حقیقت

مفتاح اسماعیل نے کہا کہ "پیسے کا نقصان کرنا جرم نہیں ہوتا، نہ پیسہ کمانا جرم ہے، مجھے نہیں پتہ کس نے کتنا نقصان کیا ہے، ہو سکتا ہے جتنا بتا یا جا رہا ہے اتنا ہی نقصان ہو یا یہ بھی ہو سکتا ہے کہ اس سے کم نقصان ہو، مجھے کچھ بھی نہیں پتہ، یہ بس اسلام آباد کے ڈرائینگ رومز میں ہونے والی ایک بات تھی۔"

علی ڈار کا کرپٹو پراجیکٹ

واضح رہے کہ علی ڈار کو کرپٹو پراجیکٹس میں ہونے والے نقصان سے متعلق سب سے پہلے سماء نیوز پر میزبان ندیم ملک کے پروگرام میں تذکرہ ہوا تھا۔ ندیم ملک نے سوال کیا کہ "کسی بڑے خاندان کے شخص کو کرپٹو میں 100 ڈالر کا نقصان ہوا ہے"، جس پر مفتاح اسماعیل نے جواب دیا تھا کہ "میں نے بھی اس بارے میں سنا ہے"۔

اس کے بعد دنیا نیوز کے پروگرام میں تجزیہ کار عثمان شامی نے علی ڈار کا نام لیتے ہوئے اس خبر سے متعلق تمام تر تفصیل بتائی تھی۔ انہوں نے بتایا تھا کہ علی ڈار نے متحدہ عرب امارات میں ایک کرپٹو پراجیکٹ لانچ کیا تھا جس میں وہاں کے انویسٹرز نے انویسٹمنٹ کی تھی، لیکن وہ پراجیکٹ ڈمپ کر گیا تھا۔ اس کے نقصان کے ازالے کے لیے ایک دوسرا کرپٹو پراجیکٹ لانچ کیا گیا تھا لیکن وہ بھی نہ چل سکا تھا۔