پنجاب کے دریاؤں میں طغیانی کا امکان، بھارت کی جانب سے آئندہ 2 روز میں پانی چھوڑے جانے کا خدشہ

بالائی علاقوں میں بارشوں کا اثر

لاہور (ڈیلی پاکستان آن لائن) بالائی علاقوں میں بارشوں کے باعث پنجاب کے دریاؤں میں طغیانی کا خدشہ ہے۔ بھارت کی جانب سے آئندہ 2 روز میں دریائے ستلج میں پانی چھوڑے جانے کا خدشہ ہے۔ بھارتی ڈیمز میں پانی کی سطح میں غیر معمولی اضافہ ریکارڈ کیا گیا ہے۔ بھاکڑا ڈیم 61 پونگ ڈیم 76 اور تھین ڈیم 64 فیصد تک بھر چکے ہیں۔

یہ بھی پڑھیں: نیپرا نے بجلی کے بنیادی ٹیرف میں ایک روپیہ 14پیسے کمی کی منظوری دیدی

موسمی صورتحال کا جائزہ

ڈائریکٹر جنرل پی ڈی ایم اے عرفان علی کاٹھیا کا کہنا تھا کہ پی ڈی ایم اے پنجاب ارسا اور محکمہ آبپاشی 24 گھنٹے دریاؤں و ڈیمز کی صورتحال کو مانیٹر کر رہے ہیں۔ دریائے ستلج میں گنڈا سنگھ کے مقام پر سیلاب نچلے درجے سے معمول پر آ گیا ہے۔ دریائے ستلج کے بہاؤ میں مزید اضافے کا خدشہ ہے۔ دریائے چناب میں مرالہ خانکی اور قادر آباد کے مقام پر درمیانے سے اونچے درجے کے سیلاب کی وارننگ جاری کر دی گئی ہے۔

حفاظتی ہدایات

ڈی جی پی ڈی ایم اے پنجاب نے کمشنرز، ڈپٹی کمشنرز اور متعلقہ محکموں کو الرٹ رہنے کی ہدایات جاری کیں۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ دریاؤں کے پاٹ میں موجود شہری فوری محفوظ مقامات پر منتقل ہو جائیں۔ ہنگامی انخلاء کی صورت میں انتظامیہ سے تعاون کریں۔ عوام الناس سے التماس ہے کہ احتیاطی تدابیر اختیار کریں۔ دریاؤں، نہروں، ندی نالوں اور تالابوں میں ہر گز مت نہائیں۔ سیلابی صورتحال میں دریاؤں کے اطراف پکنک اور غیر ضروری کراسنگ سے گریز کریں۔ بچوں کو دریاؤں، ندی نالوں کے قریب ہرگز مت جانے دیں۔ ایمرجنسی کی صورتحال میں پی ڈی ایم اے پنجاب کی ہیلپ لائن پر رابطہ کریں۔ شہریوں کی جان و مال کا تحفظ پی ڈی ایم اے پنجاب کی ذمہ داری ہے۔