گنڈا سنگھ والا میں رینجرز کا ہنگامی ریسکیو آپریشن، سیلاب میں پھنسے افراد کو محفوظ مقام پر منتقل کیا

سیلاب متاثرین کی مدد

لاہور (طیبہ بخاری سے) سیلاب متاثرین کی مدد میں سرگرم، پاکستان رینجرز (پنجاب) نے سیلاب متاثرین کے لیے ہنگامی ریسکیو آپریشن کیا۔

تفصیلات کے مطابق پاکستان رینجرز (پنجاب) کا دیگر اداروں کے ہمراہ سرحدی علاقوں میں سیلاب متاثرین کے لیے ریسکیو آپریشن جاری ہے۔

ضلع قصور کے علاقے گنڈا سنگھ والا میں پنجاب رینجرز کے اہلکاروں نے سیلاب میں پھنسے افراد کو محفوظ مقام پر منتقل کیا۔

ریسکیو آپریشن میں متاثرین کا مال اسباب بھی بحفاظت منتقل کیا گیا۔ سیلابی صورتحال کے پیش نظر رینجرز دیگر ریسکیو اداروں کے ساتھ مسلسل رابطے میں ہے۔

سیکیورٹی ذرائع نے بتایا ہے کہ کسی بھی ناگہانی صورتحال سے نمٹنے کے لیے پنجاب رینجرز کے اہلکار امدادی سرگرمیوں کے لیے تیار ہیں۔