ملک بھر میں 20 کلو آٹے کے تھیلے کی قیمت میں 217 روپے تک کا اضافہ

آٹے کی قیمتوں میں اضافہ

اسلام آباد (ڈیلی پاکستان آن لائن) ملک بھر میں آٹے کی قیمتوں میں بڑا اضافہ دیکھنے میں آیا ہے۔ حالیہ ایک ہفتے کے دوران 20 کلو آٹے کے تھیلے کی قیمت میں 217 روپے تک کا اضافہ ہوا۔ کراچی اور اسلام آباد کے شہری ملک میں سب سے مہنگا آٹا خریدنے پر مجبور ہیں۔ شہر قائد اور شہر اقتدار میں 20 کلو آٹے کے تھیلے کی قیمت 1800 روپے تک پہنچ گئی۔

یہ بھی پڑھیں: لیبیا کشتی حادثے میں جاں بحق 6 پاکستانیوں کی میتیں لاہور ایئرپورٹ پہنچ گئیں

ریاستی ادارے کی رپورٹ

ہم نیوز کے مطابق وفاقی ادارہ شماریات کی دستاویز میں کہا گیا ہے کہ حالیہ ایک ہفتے میں سیالکوٹ میں آٹے کا 20 کلو کا تھیلا 217 تک مہنگا ہوا، لاہور، گوجرانوالہ، ملتان، بنوں 200 روپے، بہاولپور 193 روپے 34 پیسے، راولپنڈی 187 روپے 67 پیسے، اسلام آباد 173 روپے 33 پیسے، سرگودھا 173 روپے، سکھر 160، کوئٹہ 130، کراچی، سکھر 100 روپے اور پشاور میں آٹے کے 20 کلو تھیلے کی قیمت میں 50 روپے تک کا اضافہ ہوا۔

ملک کے مختلف شہروں میں قیمتیں

اسی طرح راولپنڈی میں آٹے کے 20 کلو تھیلے کی قیمت 1 ہزار 786 روپے 67 پیسے، کوئٹہ 1690، حیدر آباد 1680، سیالکوٹ میں 1667، ملتان 1666 روپے 66 پیسے، بہاولپور 1660، پشاور اور بنوں میں 1650 روپے تک پہنچ گئی۔

گوجرانوالہ میں 1650، فیصل آباد اور سرگودھا میں 1640، لاہور اور خضدار میں آٹے کے 20 کلو تھیلے کی قیمت 1600 روپے تک پہنچ گئی، جب کہ سکھر میں 1560 اور لاڑکانہ میں 1500 روپے تک ہے۔