سیلابی صورتحال مزید سنگین، بھارتی ہائی کمیشن نے پاکستان کو سیلاب کے خطرے سے آگاہ کر دیا

سیلابی صورتحال کی پیش گوئی

لاہور (ڈیلی پاکستان آن لائن) دریائے ستلج پر پانی کے بہاؤ میں مزید اضافہ ہوگا۔ انڈین ہائی کمیشن نے پاکستان کو سیلابی صورتحال کے بارے میں معلومات فراہم کر دیں۔

یہ بھی پڑھیں: پنجاب میں دفعہ 144 نافذ

پی ڈی ایم اے کی الرٹ جاری

پی ڈی ایم اے پنجاب نے انڈین ہائی کمیشن کے مراسلہ کے بعد اونچے درجے کے سیلاب سے متعلق الرٹ جاری کر دیا۔ ڈی جی عرفان علی کاٹھیا کا کہنا ہے کہ دریائے ستلج میں ہیریکے ڈاؤن اسٹریم اور فیروز پور ڈاؤن اسٹریم میں اونچے درجے کا سیلاب ہے۔ سول انتظامیہ، پاک فوج اور دیگر متعلقہ محکمے الرٹ ہیں۔ شہریوں کی جان و مال کے تحفظ کو یقینی بنایا جائے۔

یہ بھی پڑھیں: ملائشیا میں خوفناک آتشزدگی کے دوران 5 پاکستانی ملائشین قوم کے ہیرو بن گئے، قوم و ملک کا نام روشن کردیا

دریاؤں میں پانی کا بہاؤ

پی ڈی ایم اے کے مطابق دریائے چناب میں مرالہ کے مقام پر پانی کا بہاؤ 1 لاکھ 15 ہزار کیوسک، خانکی کے مقام پر پانی کا بہاؤ 2 لاکھ 5 ہزار کیوسک ہے۔ قادرآباد کے مقام پر پانی کا بہاؤ 2 لاکھ 66 ہزار کیوسک ہے۔ ہیڈ تریموں کے مقام پر پانی کا بہاؤ 3 لاکھ 31 ہزار کیوسک ہے۔

دریائے راوی کی معلومات

دریائے راوی میں جسڑ کے مقام پر پانی کا بہاؤ 73 ہزار کیوسک ہے، شاہدرہ پر 1 لاکھ 12 ہزار کیوسک، سائفن پر 1 لاکھ 14 ہزار کیوسک، اور بلوکی ہیڈ ورکس پر پانی کا بہاؤ 1 لاکھ 44 ہزار کیوسک ہے۔ ہیڈ سدھنائی کے مقام پر پانی کا بہاؤ 1 لاکھ 22 ہزار کیوسک ہے۔ دریائے ستلج میں گنڈاسنگھ والاکے مقام پر پانی کا بہاؤ 3 لاکھ 19 ہزار کیوسک، سلیمانکی کے مقام پر پانی کا بہاؤ 1 لاکھ 42 ہزار کیوسک، اور پنجند ہیڈ ورکس کے مقام پر پانی کا بہاؤ 3 لاکھ 10 ہزار کیوسک ہے۔