سپریم کورٹ فل کورٹ بنا کر 26ویں آئینی ترمیم کیخلاف درخواستیں سنے، بیرسٹر گوہر

پی ٹی آئی کے چیئرمین کی سپریم کورٹ سے درخواست

اسلام آباد(ڈیلی پاکستان آن لائن)پاکستان تحریک انصاف کے چیئرمین بیرسٹر گوہر نے کہا ہے کہ سپریم کورٹ فل کورٹ بنا کر 26ویں آئینی ترمیم کیخلاف درخواستیں سنے۔

یہ بھی پڑھیں: سپریم کورٹ میں آئندہ ہفتے 968 مقدمات سماعت کیلئے مقرر

آزاد عدلیہ کی ضرورت

نجی ٹی وی چینل دنیا نیوز کے مطابق میڈیا سے گفتگو کرتے ہوئے بیرسٹر گوہر نے کہاکہ بانی پی ٹی آئی آزاد عدلیہ کے خواہاں ہیں۔ بانی پی ٹی آئی آزاد عدلیہ، ملک کی بالادستی اور خودمختاری کیلئے جیل میں ہیں۔ ان کاکہنا تھا کہ ہماری آواز کو دبایا گیا اور مزید ساتھیوں کو نااہل کیا جارہا ہے۔ اگر یہ سلسلہ جاری رہا تو جمہوریت اور معیشت ناکام ہوگی، کیونکہ سیاسی استحکام نہیں ہوگا تو معاشی استحکام بھی نہیں آئے گا۔

سیلاب متاثرین کی صورتحال

بیرسٹر گوہر کاکہناتھا کہ میں نے پنجاب کے سیلاب متاثرہ علاقوں کا دورہ کیا۔ سیلاب متاثرین کو وہ سہولیات نہیں مل رہیں جو ملنی چاہئیں۔ ان کا کہنا تھا کہ بونیر میں 240 افراد جاں بحق، 875 گھر تباہ ہوئے، 110 کلومیٹر سڑکیں تباہ، اور 4600 مویشی ہلاک ہوئے۔ وفاقی حکومت نے 200 ٹینٹ، 5 جنریٹرز، 1420 کمبل اور 500 کلو ادویات فراہم کیں۔ سیلاب سے کوئی صوبہ اکیلا نہیں نمٹ سکتا، اور سیلاب کے دوران وفاق نے ہماری جتنی مدد کی وہ ناکافی ہے۔ دہشتگردی کے ناسور کا خاتمہ ضروری ہے۔