آپ نے جس ملک کو آزاد کرایا میں وہاں سیاسی قیدی ہوں‘‘ پی ٹی آئی رہنما ڈاکٹر یاسمین راشد کا جیل سے قائد اعظمؒ کے نام خط

پاکستان تحریک انصاف کی رہنما کا خط

لاہور (ڈیلی پاکستان آن لائن) پاکستان تحریک انصاف کی رہنما ڈاکٹر یاسمین راشد نے قائد اعظمؒ کی برسی پر جیل سے ان کے نام خط لکھا ہے، جس میں کہا گیا ہے:

آزادی کا احساس

’’قائد اعظمؒ، آپ نے جس ملک کو آزاد کرایا، میں وہاں آزاد نہیں بلکہ سیاسی قیدی ہوں۔‘‘

غلط الزامات اور عدلیتی نظام

یاسمین راشد نے خط میں مزید لکھا کہ مجھے غلط الزامات کے تحت بند رکھا ہوا ہے۔ میں ٹوٹے ہوئے عدالتی نظام سے متاثر ہوں۔ قائد اعظمؒ، آپ نے وعدہ کیا تھا کہ پاکستان میں انصاف، جمہوریت اور برابری ہو گی۔ آپ نے ہمیں یقین دلایا تھا کہ اس ملک کی عدلیہ آزاد ہو گی اور حکمرانوں کا احتساب ہو سکے گا۔ عوامی خدمت کے لیے اپنی زندگی وقف کرنے والی خواتین کو من گھڑت الزامات کے تحت جیلوں میں گھسیٹا جاتا ہے۔

قانون کی بالادستی

یاسمین راشد نے مزید لکھا کہ عدلیہ قانون کی بالادستی کے بجائے اقتدار کے آگے جھکتی ہے۔ جمہوریت کو طاقت سے ختم کر دیا گیا ہے اور اس کی جگہ چوری شدہ مینڈیٹ نے لے لی ہے۔ عوام کی مرضی کو طاقت، دھمکی، سنسرشپ اور ریاستی تشدد سے کچل دیا گیا ہے۔ میں نے کئی دہائیاں بطور ڈاکٹر اور سرکاری ملازم کے طور پر انسانیت کی خدمت کی ہے۔ تاہم، آج پاکستان میں خدمت کو سزا دی جاتی ہے اور سچ کو جرم قرار دیا جاتا ہے۔ اگر قائد اعظمؒ آج آپ واپس لوٹے تو آپ اس ملک کو نہیں پہچان پائیں گے، جس کے لیے آپ نے اپنی جان دی۔

آئین کی خلاف ورزی

خط میں یاسمین راشد نے مزید لکھا کہ آئین کی دھجیاں اڑائی جاتی ہیں، قانون کی حکمرانی کا مذاق اڑایا جاتا ہے۔ پاکستان اپنے بانی نظریات سے بھٹک گیا ہے۔ سیاسی قیدی، صحافی اور عام شہری سب ایک ایسی ریاست کی قیمت ادا کر رہے ہیں جس نے انصاف کو خیر آباد کہہ دیا ہے۔ انشاءاللہ پاکستان آپ کے بتائے ہوئے راستے پر واپس آئے گا۔ جیل کے اندر سے دیواروں کے پیچھے سے بھی اپنی آواز بلند کرتی رہوں گی۔ بطور پاکستانی میرا یہ فرض ہے، نا انصافی پر خاموش رہنا بھی دھوکہ دینا ہوگا۔