بھارت کی آبی دہشتگردی نے لاکھوں خاندانوں کو شدید نقصان پہنچایا ہے: وزیر تعلیم

ریسکیو آپریشن کا آغاز

لاہور (ڈیلی پاکستان آن لائن) وزیر تعلیم رانا سکندر حیات نے کہا ہے کہ بھارت کی آبی دہشتگردی سے متاثرہ ملتان ڈویژن کے 3 ہزار سے زائد افراد کو اپنی نگرانی میں ریسکیو کروا چکا ہوں۔ گذشتہ 4 روز سے مسلسل موقع پر موجود ہوں اور سیلابی صورتحال پر نظر رکھنے کے ساتھ ساتھ ریلیف آپریشن کی مانیٹرنگ کر رہا ہوں۔

یہ بھی پڑھیں: ہمیں تیار رہنا چاہیے بھارت کوئی بھی حرکت کرسکتا ہے،سابق سفیر عبدالباسط

نقصان کی شدت

انہوں نے کہا کہ بھارت کی آبی جارحیت نے پاکستان کے لاکھوں خاندانوں کو جانی اور مالی طور پر شدید نقصان پہنچایا ہے۔ متاثرہ خاندانوں کی دکھ بھری کہانیوں نے مجھے 4 روز سے سونے نہیں دیا۔ بھارتی آبی دہشتگردی سے متاثر ہونے والے افراد کیلئے ہماری پہلی ترجیح انہیں محفوظ مقامات پر منتقل کرنا ہے۔ متاثرین کے بروقت انخلا، صفائی اور صحت کی سہولیات، اور انفراسٹرکچر کے تحفظ کے لیے ضلعی انتظامیہ اور ریسکیو ٹیمیں دن رات کام کر رہی ہیں۔

یہ بھی پڑھیں: سیکرٹری داخلہ پنجاب کی صدارت میں اعلیٰ سطحی اجلاس: شنگھائی تعاون تنظیم سربراہی اجلاس کے پیش نظر اہم فیصلے

ریسکیو اور ریلیف سرگرمیاں

وزیر تعلیم نے مزید کہا کہ کشتیوں، ہیلی کاپٹر، مشینری اور دیگر آلات کے ذریعے متاثرہ علاقوں میں ریسکیو اور ریلیف سرگرمیوں کو مؤثر اور تیز تر بنانے پر توجہ دینے کیلئے وزیر اعلیٰ پنجاب کی پوری ٹیم مسلسل فیلڈ میں موجود ہے۔ فیلڈ سکولز، بنیادی سہولیات اور محفوظ منتقلی کے انتظامات اس عزم کے ساتھ جاری ہیں کہ ہر خاندان اپنی بحالی کے سفر میں تحفظ اور عزت کے ساتھ آگے بڑھے۔

ریلیف ورکرز کی محنت

وزیر تعلیم نے ریسکیو آپریشن میں حصہ لینے والے رضاکاروں کو بھی زبردست الفاظ میں خراج تحسین پیش کیا اور کہا کہ ریلیف ورکرز کی انتھک محنت کے بغیر متاثرین کا بروقت انخلا اور دیگر اقدامات ممکن نہیں تھے۔