آزاد کشمیر پولیس میں ہڑتال، اسلام آباد پولیس کے 2000 اہلکار طلب

آزاد کشمیر پولیس کی ہڑتال کا اثر

اسلام آباد، مظفرآباد (نمائندہ خصوصی) آزاد کشمیر پولیس میں ہڑتال کے باعث اسلام آباد پولیس کے 2000 اہلکار طلب کرلیے گئے۔ وفاقی پولیس نے آزاد کشمیر حکومت کی درخواست منظور کرتے ہوئے 2000 پولیس کی نفری فراہم کرنے کا فیصلہ کیا ہے۔ اس میں افسران اور کانسٹیبل شامل ہیں۔ یہ پولیس جوائنٹ ایکشن کمیٹی کی ہڑتال یا مقامی پولیس کی جانب سے کارروائی نہ کرنے پر آزاد کشمیر حکومت کے کہنے پر ایکشن لے گی۔

یہ بھی پڑھیں: سٹاک مارکیٹ میں شدید مندی کا رجحان، انڈیکس میں 1797 پوائنٹس کی کمی

سیکیورٹی کی صورتحال

آزاد کشمیر میں 29 ستمبر کو ممکنہ احتجاج کے پیش نظر وفاقی حکومت سے سیکیورٹی منگوانے کا فیصلہ کیا گیا تھا۔ آئی جی اسلام آباد کی ہدایت پر 2000 پولیس افسران و اہلکاروں کی فہرست تیار کی جا رہی ہے، جس میں ایک ایس ایس پی، 4 ایس پیز، 8 ڈی ایس پیز، 6 انسپکٹرز، 88 سب انسپکٹرز، اسسٹنٹ سب انسپکٹرز، 1718 ہیڈ کانسٹیبلان و کانسٹیبلان، اور 132 لیڈی کانسٹیبلان شامل ہیں۔

یہ بھی پڑھیں: پارلیمنٹ میں وزیر اعظم نے بات چیت شروع کرنے کی خواہش ظاہر کی تھی: بیرسٹر گوہر

اہلکاروں کی تفصیلات

اسلام آباد پولیس کے مختلف ڈویژنز سے افسران و اہلکاروں کو بھیجنے کا فیصلہ کیا گیا ہے۔ آپریشنز ڈویژن سے 636، سیکیورٹی ڈویژن سے 480 اہلکار آزاد کشمیر بھیجے جائیں گے۔ سی ٹی ڈی سے 80 جبکہ ٹریفک پولیس سے 90 اہلکار بھیجنے کا فیصلہ کیا گیا ہے۔ لاجسٹک ڈویژن سے 161 اور لاء اینڈ آرڈر سے 238 اہلکار بھی نامزد کئے جائیں گے۔ سی پی سی ڈویژن سے 251، اسپیشل برانچ سے 38 اور سیف سٹی سے 26 اہلکار بھی شامل ہوں گے۔ اس طرح مجموعی طور پر 2000 پولیس اہلکار آزاد کشمیر میں ڈیوٹی سرانجام دیں گے۔

اہم ہدایتیں

تمام متعلقہ ڈویژنز کے افسران کو آج ہی فہرست مرتب کر کے فراہم کرنے کی ہدایت کی گئی ہے۔ آئی جی اسلام آباد کی ہدایت میں اے آئی جی آپریشن نے تمام ڈویژن کو حکم نامہ جاری کر دیا ہے۔