الخدمت آغوش کالج مری سے فارغ التحصیل طلبہ کے اعزاز میں تقریب، تعلیمی و اعزازی اسناد اور میڈلز سے نوازا گیا۔

گریجویشن تقریب کا انعقاد

لاہور (ڈیلی پاکستان آن لائن) اورفن بچوں کیلئے قائم الخدمت آغوش کالج مری کے فارغ التحصیل باہمت بچوں کیلئے گریجویشن تقریب کا انعقاد کیا گیا۔ اس موقع پر مہمانان خصوصی میں صدر الخدمت فاؤنڈیشن پاکستان پروفیسر ڈاکٹر حفیظ الرحمن، پاکستان میں فلسطین کے سفیر ڈاکٹر زہیر محمد حمد اللہ زید، وائس چانسلر رفاہ انٹرنیشنل یونیورسٹی ڈاکٹر انیس احمد، سیکرٹری جنرل الخدمت سید وقاص جعفری، نائب صدر ایئرمارشل (ر) فاروق حبیب، پرنسپل آغوش کالج مری اعظم خان سمیت زندگی کے مختلف طبقات کی نمایاں شخصیات شریک ہوئیں۔

یہ بھی پڑھیں: غزوات سے واپسی پر حضرت محمدﷺ کیا کلمات ادا کرتے اور اس جیت کے بعد پاکستانیوں کو کس بات سے بچنا ہے؟

تعلیمی اسناد اور میڈلز کی تقسیم

اس موقع پر فارغ التحصیل 31 طلبہ کو تعلیمی و اعزازی اسناد اور میڈلز سے نوازا گیا۔ پروفیسر ڈاکٹر حفیظ الرحمن نے خطاب کرتے ہوئے کہا کہ ہم اپنے رب کے حضور شکر بجالاتے ہیں جس نے ان باہمت بچوں کی تعلیم کی تکمیل کی صورت میں ہمارے خوابوں کو تعبیر دی۔ الخدمت فاؤنڈیشن ان بچوں کو آگے کے مراحل میں بھی تنہا نہیں چھوڑے گی اور مزید تعلیم کیلئے تمام وسائل انہیں فراہم کرے گی۔

یہ بھی پڑھیں: سونے کی قیمت میں ریکارڈ اضافہ

آغوش ہومز کی ترقی

پروفیسر نے مزید کہا کہ 2006 میں پہلا آغوش اٹک قائم ہوا اور 19 سالوں کے دوران آغوش ہومز کی تعداد 24 ہو چکی ہے جبکہ 11 آغوش ہومز زیر تعمیر ہیں۔ الخدمت فاؤنڈیشن 33,825 اورفن بچوں کی کفالت پر سالانہ اڑھائی ارب روپے سے زائد رقم خرچ کر رہی ہے۔

طلبہ کے مستقبل کے بارے میں امیدیں

پروفیسر ڈاکٹر انیس احمد نے بھی طلبہ اور کالج انتظامیہ کو مبارکباد پیش کی اور کہا کہ ہمیں جدید ٹیکنالوجی سے بھی استفادہ ضرور کرنا چاہیے لیکن اس کے ساتھ ساتھ بحیثیت امت اپنے نمایاں تشخص کو بھی اقوام عالم میں منوانا ہو گا۔ انہوں نے کہا کہ مجھے امید ہے کہ یہ طلبہ امت مسلمہ کی قیادت کا فریضہ سرانجام دیں گے۔