مساجد اور مدارس کو نفرت یا تشدد کیلئے استعمال کرنے والوں کے خلاف دہشتگردی کے مقدمات درج ہوں گے: پنجاب حکومت کا بڑا اعلان

دوسرا غیر معمولی اجلاس

لاہور (ڈیلی پاکستان آن لائن) وزیر اعلیٰ مریم نواز کی زیر صدارت امن امان سے متعلق دوسرا غیر معمولی اجلاس منعقد ہوا۔ اجلاس میں پنجاب حکومت کا احتجاج کے نام پر خون ریزی، شرانگیزی اور فتنہ و فساد پھیلانے والوں کے خلاف آہنی گھیرا مزید تنگ کرنے کا فیصلہ کیا گیا۔ حکومت پنجاب کا ریاستی رٹ چیلنج کرنے والوں کو آہنی ہاتھوں سے نمٹنے کا فیصلہ بھی کیا گیا۔

یہ بھی پڑھیں: چین میں سابق اعلیٰ سرکاری افسر کو رشوت لینے پر سزائے موت سنا دی گئی

عمران خان کے بیان کے خلاف کارروائی

پنجاب حکومت کا عمران خان کے "ایکس" اکاونٹ پر 400 لاشوں والے اشتعال انگیز جھوٹے بیان پر پیکا ایکٹ کے تحت مقدمہ درج کرانے کا فیصلہ بھی کیا گیا۔ پنجاب حکومت نے واضح کر دیا کہ ریاست کا ہدف فساد ہے، کوئی مذہبی جماعت یا عقیدہ نہیں اور کارروائیاں صرف اُن کے خلاف ہیں جو امن برباد کرنے کی تاریخ کے حامل ہیں۔

یہ بھی پڑھیں: بھارتی وزیر خارجہ باہمی تعلقات کے بجائے برصغیر میں امن کی بات نہیں کریں گے: شیری رحمان

نفرت انگیزی کے خلاف سخت اقدامات

اجلاس میں فیصلہ کیا گیا کہ پنجاب میں مساجد کے منبروں اور مدارس کے فورمز کو نفرت، انتشار یا تشدد کے فروغ کے لیے استعمال کرنے والوں کے خلاف دہشت گردی کے مقدمات درج ہوں گے۔ مدارس کے تقدس کو مجروح کرنے اور بچوں کے ذہنوں میں نفرت یا تشدد کے بیج بونے والوں کے خلاف دہشت گردی کے قوانین کے تحت کارروائی ہوگی۔ پنجاب حکومت نے احتجاج کے دوران کیلوں والے ڈنڈوں، پیٹرول بم اور ہر قسم کے اسلحہ کے استعمال پر مکمل پابندی عائد کر دی۔

یہ بھی پڑھیں: 1 مئی جلاﺅ گھیراﺅ کیس: پی ٹی آئی کے مزید 6 شرپسندوں پر فرد جرم عائد، 42پر پہلے ہی لگ چکی

لاؤڈ سپیکر قوانین کی خلاف ورزی

اجلاس میں پنجاب حکومت کا لاؤڈ سپیکر قوانین کی خلاف ورزی پر فوری کارروائی کا فیصلہ بھی کیا گیا۔ پنجاب بھر میں سیکشن 144 نافذالعمل ہے، خلاف ورزی پر دہشت گردی ایکٹ کے تحت مقدمات درج ہوں گے۔ پنجاب حکومت کا انتہا پسند جتھوں کے سہولت کاروں اور حامیوں کے خلاف سخت ترین کارروائی کا فیصلہ کیا گیا۔ بازار، دکانیں یا ٹرانسپورٹ زبردستی بند کرانے والوں پر دہشت گردی ایکٹ لاگو ہوگا۔ سوشل میڈیا پر نفرت انگیز مواد پھیلانے والوں کے خلاف پیکا ایکٹ کے تحت مقدمات درج ہوں گے۔

زیرو ٹالرنس پالیسی

سوشل میڈیا پر شر انگیزی، نفرت اور فتنہ پھیلانے والوں کے لیے زیرو ٹالرنس پالیسی کا فیصلہ کیا گیا۔ اجلاس میں انتہا پسند گروہوں کی ہر غیر قانونی سرگرمی پر مکمل پابندی عائد کی گئی، اور سیکیورٹی اداروں کو فوری ایکشن کے اختیارات تفویض کیے گئے۔