مبینہ طور پر خود کشی کرنے والے ایس پی عدیل اکبر کی ڈی آئی جی اسلام آباد کو چھٹی سے متعلق دی گئی درخواست اور میڈیکل رپورٹ کی تفصیلات سامنے آئیں۔

اسلام آباد (ویب ڈیسک) مبینہ طور پر خود کشی کرنے والے ایس پی عدیل اکبر کی ڈی آئی جی اسلام آباد کو چھٹی سے متعلق دی گئی درخواست بھی سامنے آگئی ہے۔

ایس پی عدیل اکبر کی میڈیکل رپورٹ

عدیل اکبر کی میڈیکل رپورٹ بھی سامنے آگئی ہے، جس کے مطابق ایس پی عدیل اکبر کا ڈینگی ٹیسٹ پوزیٹو آیا تھا۔ میڈیکل رپورٹ کے مطابق، ایس پی عدیل اکبر نے 20 اکتوبر کو پولی کلینک سے چیک اپ کرایا تھا۔ ڈینگی پوزیٹیو آنے کے بعد، انہوں نے 3 روز کی چھٹی کی درخواست دی، جو کہ ڈی آئی جی اسلام آباد نے منظور کر لی۔

ڈیوٹی پر واپسی اور دوسرے معاملات

جیونیوز کے مطابق ذرائع کا بتانا ہے کہ عدیل اکبر نے میڈیکل چھٹی کے بعد 23 اکتوبر کو دوبارہ ڈیوٹی جوائن کی تھی۔ پولیس ذرائع نے بتایا کہ عدیل اکبر کا بیرون ملک یونیورسٹی میں داخلہ ہو چکا تھا اور وہ دفتر خارجہ میں دستاویزات کی تصدیق کے لیے بھی گئے تھے۔

ایس ایم جی گن کے حادثے کی تفصیلات

پولیس ذرائع کے مطابق قوی امکان ظاہر کیا جا رہا ہے کہ عدیل اکبر سے ایس ایم جی گن حادثاتی طور پر چلی ہے۔ ذرائع کا کہنا ہے کہ پولیسنگ ماہرین کے مطابق اس حادثے میں ایس ایم جی گن کے شاٹ کا زاویہ 65 ڈگری ہے جبکہ پی ایس پی افسران عام طور پر ایس ایم جی گن کے استعمال میں زیادہ ماہر نہیں ہوتے۔