دھی رانی پروگرام کا تیسرا مرحلہ، خانیوال میں 127 مسلمان اور 10 مسیحی جوڑوں کی اجتماعی شادی کی تقریب

خانیوال میں اجتماعی شادیاں

خانیوال(ڈیلی پاکستان آن لائن) وزیر اعلیٰ پنجاب مریم نواز کے ’’دھی رانی پروگرام‘‘ کے تحت تیسرے مرحلے کی اجتماعی شادیوں کی تقریب کا انعقاد خانیوال پبلک سکول اینڈ یونیورسٹی کالج میں کیا گیا، جس میں 137 جوڑوں کی شادیاں کرائی گئیں۔ محکمہ سوشل ویلفئیر اینڈ بیت المال پنجاب کے زیر اہتمام ہونے والی اس تقریب میں 127 مسلمان اور 10 مسیحی جوڑوں نے شادی کی۔ جوڑوں کو 2 لاکھ روپے کی رقم اے ٹی ایم کارڈ کے ذریعے فراہم کی گئی، جب کہ دلہنوں کو جہیز پیکجز بھی دیئے گئے۔

یہ بھی پڑھیں: پی ٹی آئی کی انٹرا پارٹی الیکشن کیس کی سماعت ملتوی کرنے کی درخواست دائر

صوبائی وزیر کی شرکت

صوبائی وزیر سوشل ویلفئیر و بیت المال پنجاب سہیل شوکت بٹ نے اس تقریب میں خصوصی شرکت کی اور تمام جوڑوں کو مبارکباد دی۔ انہوں نے کہا کہ یہ پروگرام وزیر اعلیٰ پنجاب مریم نواز کی عوام دوستی کا عکاس ہے اور اس سے غریب والدین کے لیے ایک نئی روشنی کی کرن پیدا ہوئی ہے۔ وزیر اعلیٰ پنجاب مریم نواز نے’’ دھی رانی پروگرام‘‘ شروع کرکے ریاست مدینہ کی مثال قائم کی ہے۔ صوبے میں 3 مرحلوں کے دوران اب تک 5000 جوڑوں کی اجتماعی شادیاں کرائی جاچکی ہیں۔ انہوں نے جوڑوں کو سلامی بھی دی۔

یہ بھی پڑھیں: شادی کے 17 سال بعد دوسرے بچے سے متعلق سوال پر ابھیشیک بچن نے کیا جواب دیا ؟

خاص مہمانوں کی موجودگی

ایم این اے محمد خان ڈاہا، صوبائی پارلیمانی سیکرٹری رانا محمد سلیم حنیف، اراکین صوبائی اسمبلی بیرسٹر اسامہ فضل اور عامر حیات ہراج بھی اس موقع پر موجود تھے۔
ڈپٹی کمشنر ڈاکٹر سلمیٰ سلیمان نے اس پروگرام کو والدین کے لیے ایک نعمت قرار دیتے ہوئے کہا کہ ’’دھی رانی پروگرام‘‘ کا مقصد معاشرتی انصاف اور خوشحالی ہے۔

سول سوسائٹی کی شرکت

ضلع بھر کی سول سوسائٹی کی شخصیات اور محکمہ سوشل ویلفئیر کے افسران بھی اس تقریب میں شریک ہوئے اور جوڑوں کے لیے نیک تمنائیں پیش کیں۔