خیبر پختونخوا میں فورسز کی 2 کاروائیاں، بھارتی پراکسی فتنہ الخوارج کے 3 دہشتگرد ہلاک

راولپنڈی میں سیکیورٹی فورسز کی کارروائیاں

سیکیورٹی فورسز نے 2 نومبر کو خیبر پختونخوا میں کارروائیاں کیں، ان کارروائیوں میں بھارتی پراکسی فتنہ الخوارج کے 3 دہشت گرد ہلاک کردیئے گئے۔

خارجی دہشت گردوں کی شناخت

مسلح افواج کے شعبہ تعلقات عامہ آئی ایس پی آر کے مطابق کارروائی میں مارا گیا ایک خارجی دہشت گرد قاسم افغان شہری نکلا، وہ افغان بارڈر پولیس کا فعال اہلکار تھا۔ خارجیوں کی نقل و حرکت کی نشاندہی شمالی وزیرستان میں ایشام کے سامنے علاقے میں ہوئی۔ خوارج سرحد پار کر کے پاکستان میں داخل ہونے کی کوشش کر رہے تھے، سیکیورٹی فورسز نے خارجیوں کے گروہ کو مؤثر طریقے سے نشانہ بنایا اور بھارتی پراکسی فتنہ الخوارج کے 2 کارندے ہلاک کردیئے۔

ٹانک میں کارروائی

آئی ایس پی آر کے مطابق ٹانک میں آپریشن کے دوران ایک خارجی کو ہلاک کیا گیا، ہلاک خارجی کی شناخت اکرام الدین عرف ابو دجانہ کے نام سے ہوئی، وہ بھی افغان شہری تھا۔

پاکستان کا افغان حکومت سے مطالبہ

آئی ایس پی آر کے مطابق پاکستان عبوری افغان حکومت سے مطالبہ کرتا رہا ہے کہ مؤثر بارڈر مینجمنٹ یقینی بنائے، بارہا مطالبہ کیا کہ افغان سرزمین خوارج اور سہولت کار پاکستان کے خلاف استعمال نہ کریں۔ سیکیورٹی فورسز اور قانون نافذ کرنے والے اداروں کی انسدادِ دہشت گردی کارروائیاں بلا تعطل جاری رہیں گی۔