لاہور سمیت پنجاب کے مختلف شہروں میں منشیات فروشوں کے ساتھ سی سی ڈی کے 9 مبینہ مقابلے، زیر حراست 9 ملزمان ہلاک

لاہور میں منشیات فروشوں کے ساتھ مقابلے

لاہور (ڈیلی پاکستان آن لائن) لاہور سمیت پنجاب کے مختلف علاقوں میں منشیات فروشوں کے ساتھ کرائم کنٹرول ڈیپارٹمنٹ (سی سی ڈی) کے 9 مبینہ مقابلوں میں زیر حراست 9 ملزمان مارے گئے۔ پولیس کے مطابق لاہور کے علاقوں گرین ٹاؤن، کاہنہ، سول لائنز، کینٹ، ماڈل ٹاؤن اور اقبال ٹاؤن میں سی سی ڈی منشیات کے ملزمان کو ریکوری کے لیے لے جارہی تھی کہ ملزمان کے ساتھیوں نے انہیں چھڑانے کے لیے فائرنگ کر دی۔

یہ بھی پڑھیں: اسلام آباد ہائی کورٹ: پاکستان نرسنگ کونسل کی صدر فرزانہ ذوالفقار کی تعیناتی کا فیصلہ کالعدم قرار

پولیس کی جوابی کارروائی

پولیس کے مطابق جوابی کارروائی کے دوران زیر حراست 6 ملزمان اپنے ہی ساتھیوں کی فائرنگ سے مارے گئے، مرنے والے ملزمان میں فرید، محسن، آصف، فاروق، رمضان اور وسیم شامل ہیں۔

دیگر واقعات

حویلی لکھا میں مبینہ مقابلے میں منشیات فروش پرویز عرف بگی مارا گیا، ملزم کے قبضے سے پستول، موٹر سائیکل اور چرس برآمد ہوئی، ملزم کے دیگر ساتھی فرار ہوگئے۔ شیخوپورہ میں بھی مبینہ مقابلے میں منشیات فروش نثار عرف ٹونڈا ہلاک ہو گیا جب کہ اس کے 2 ساتھی فرار ہوگئے، ملزم 40 سے زائد منشیات کے مقدمات میں مطلوب تھا۔

پولیس کے مطابق ننکانہ صاحب میں مبینہ مقابلے میں مطلوب منشیات فروش اعجاز عرف ججی مارا گیا، ملزم منشیات کے 7 مقدمات میں مطلوب تھا، ملزم کے دو ساتھی موقع سے فرار ہو گئے۔