بیرونِ ملک پاکستانی ترسیلاتِ زر سے ملکی معیشت کو مضبوط بنانے میں اہم کردار ادا کر رہے ہیں، چودھری سالک حسین

وزیر اوورسیز پاکستانیز کا بیان

اسلام آباد (سٹاف رپورٹر) وفاقی وزیر اوورسیز پاکستانیز چودھری سالک حسین کا کہنا ہے کہ محفوظ و منظم طریقے سے بیرون ملک روزگار کیلئے کاوشیں کرنا حکومتِ پاکستان کی ترجیح ہے۔ مہاجرین عالمی معاشی و سماجی ترقی میں اہم کردار ادا کر رہے ہیں، تقریباً ایک کروڑ بیس لاکھ پاکستانی بیرونِ ملک ملازمت کرتے ہیں۔

یہ بھی پڑھیں: چین میں مزید 100 پاکستانی زرعی ماہرین نے تربیتی پروگرام مکمل کر لیا

مہاجرین کے عالمی دن کی تقریب

ان خیالات کا اظہار انہوں نے مہاجرین کے عالمی دن کے حوالے سے منعقدہ تقریب سے بطور مہمان خصوصی خطاب کرتے ہوئے کیا۔ وفاقی وزیر نے کہا کہ بیرونِ ملک پاکستانی ترسیلاتِ زر سے ملکی معیشت کو مضبوط بنانے میں اہم کردار ادا کر رہے ہیں۔ رواں سال 7 لاکھ سے زائد پاکستانی روزگار کے لیے بیرونِ ملک گئے ہیں۔ حکومت پاکستان کی جانب سے مہاجرین کے تحفظ اور حقوق کے لیے مؤثر اقدامات کیے جا رہے ہیں۔ سکل ڈویلپمنٹ پروگرامز کے ذریعے پاکستانیوں کی بیرونِ ملک ملازمت کے بہتر مواقع مل سکتے ہیں۔ نیشنل اسکلز پاسپورٹ سے بیرونِ ملک ملازمت میں سہولت مل رہی ہے۔

ائیرپورٹس پر آف لوڈنگ کا مسئلہ

وفاقی وزیر نے کہا کہ گزشتہ کچھ ہفتوں سے بیرون ممالک روزگار کیلئے جانے والے پاکستانیوں کو ائیرپورٹس پر آف لوڈ کرنے کے واقعات سامنے آئے ہیں۔ وزارت داخلہ اور وزارت اوورسیز پاکستانیز میں اس حوالے سے اعلیٰ سطح پر اجلاس ہوئے جس میں وزیر داخلہ نے بھی شرکت کی۔ وزیر اعظم نے اس معاملے پر اعلیٰ سطح کی کمیٹی تشکیل دے دی ہے۔ امید ہے جنوری تک روزگار کے لیے بیرون ممالک جانے والے پاکستانیوں کے ائیرپورٹس پر آف لوڈنگ کے واقعات کا تدارک کر لیا جائے گا۔