چودھری احمد علی منہاس کا انتقال ہوگیا، کوونٹری کی ایک درخشاں شخصیت ہم سے رخصت

وفات پر تعزیتی نوٹ

کوونٹری سٹی ( نمائندہ خصوصی ) برطانیہ کے شہر کوونٹری سے تعلق رکھنے والی پاکستانی کمیونٹی کی ممتاز سماجی و کاروباری شخصیت چودھری احمد علی منہاس طویل علالت کے بعد خالقِ حقیقی سے جا ملے۔ آپ کی وفات سے نہ صرف کوونٹری بلکہ پورے برطانیہ میں مقیم پاکستانی کمیونٹی ایک مخلص، باکردار اور دردِ دل رکھنے والی شخصیت سے محروم ہو گئی ہے۔

یہ بھی پڑھیں: حکومت پاکستان اور ایشیائی ترقیاتی بینک کے درمیان 304.5 ملین ڈالر مالیت کے 2 بڑے معاہدوں پر دستخط

زندگی کا سفر

چودھری احمد علی منہاس کا تعلق راولپنڈی کے قریب قصبہ سرصوبہ شاہ، روات سے تھا۔ وہ 1971ء میں برطانیہ منتقل ہوئے اور اپنی انتھک محنت، دیانت داری اور عزمِ صمیم کے ذریعے نہ صرف اپنے خاندان بلکہ پوری کمیونٹی کا نام روشن کیا۔ انہوں نے کاروبار کے ساتھ ساتھ فلاحی اور سماجی خدمات کو اپنی زندگی کا مشن بنا لیا۔

یہ بھی پڑھیں: سکولوں میں ایک ہفتے کی چھٹیوں کا اعلان

کمیونٹی کی خدمات

وہ ہر نئے آنے والے کی رہنمائی، بے سہارا افراد کی مدد اور کمیونٹی میں اتحاد و بھائی چارے کے فروغ کے لیے ہمیشہ پیش پیش رہے۔ اس نیک مشن میں ان کے بھائی چوہدری حاجی شوکت اور بھتیجے حاجی یحییٰ منھاس نے بھی ان کا بھرپور ساتھ دیا۔

یہ بھی پڑھیں: شمالی وزیرستان میں سکیورٹی فورسز کے کیمپ پر حملہ، 4 خواج ہلاک، چار بہادر جوان وطن پر قربان

تعزیتی نشست

گزشتہ روز جامع مسجد ایگل اسٹریٹ، کوونٹری میں منعقدہ تعزیتی نشست میں برطانیہ بھر سے آئے ہوئے دوستوں، سماجی شخصیات اور کمیونٹی رہنماؤں نے شرکت کی۔ مقررین نے چودھری احمد علی منہاس کے ساتھ گزارے گئے لمحات اور ان کی انسان دوست خدمات کو خراجِ تحسین پیش کیا۔ اس موقع پر فضا سوگوار اور ہر آنکھ اشکبار تھی۔

یہ بھی پڑھیں: شاہ سلمان انٹرنیشنل کنونشن سینٹر میں دوسرا سالانہ عمرہ اور زیارت فورم جاری

خلا اور مستقل عزم

شرکاء نے اس بات پر اتفاق کیا کہ مرحوم نے اپنی پوری زندگی انسانیت کی خدمت اور فلاحِ عامہ کے لیے وقف کر رکھی تھی۔ ان کی وفات سے پیدا ہونے والا خلا مدتوں پُر نہیں ہو سکے گا، تاہم کمیونٹی کی کئی شخصیات نے اس عزم کا اظہار کیا کہ وہ مرحوم کے مشن کو جاری رکھیں گی اور ان کی تقلید میں خدمتِ خلق کا چراغ روشن رکھیں گی تاکہ کوونٹری اور پاکستان کا نام ہمیشہ روشن رہے۔