ڈپٹی کمشنر لاہورنے 6 سے 8 فروری بسنت فیسٹیول کا ضابطہ اخلاق جاری کر دیا

لاہور (ڈیلی پاکستان آن لائن) ضلعی انتظامیہ نے بسنت کے لیے خصوصی ایس او پیز جاری کر دیے ہیں۔ ضلعی افسران، پولیس، اور متعلقہ محکموں کو حفاظتی گائیڈ لائنز پر عملدرآمد کا حکم دیا گیا ہے۔

ضابطہ اخلاق کی تفصیلات

ضابطہ اخلاق کا اطلاق لاہور بھر میں تمام مقامات بشمول عمارتوں اور چھتوں پر ہوگا۔ ضلعی افسران اور پولیس کو چھتوں اور مختلف مقامات کا معائنہ کرنے کا اختیار دیا گیا ہے۔ شہریوں کی حفاظت کو یقینی بنانے کے لیے پتنگ بازی فیسٹیول کے لیے بارہ نکاتی سخت ضابطہ اخلاق جاری کیا گیا ہے، جس میں خطرناک ڈور اور ہوائی فائرنگ کے خلاف زیرو ٹالرنس پالیسی اپنائی جائے گی۔ دھاتی، کیمیائی، اور نائلون ڈور کا استعمال سختی سے منع ہے۔

سیکورٹی اور حفاظتی اقدامات

لاہور میں موٹر سائیکلوں پر سیفٹی راڈز کی تنصیب کو لازمی قرار دیا جائے گا۔ ہوائی فائرنگ اور عوامی سکون میں خلل ڈالنے والے ساؤنڈ سسٹم پر پابندی ہوگی۔ ایئرپورٹ اور حساس تنصیبات کے قریب پتنگ بازی کی اجازت نہیں ہوگی، اور چھتوں کے مالکان حفاظتی انتظامات کے ذمہ دار ہوں گے۔

غیر محفوظ چھتوں پر پابندی

پتنگ بازی کے لیے غیر محفوظ چھتوں کے استعمال پر سخت پابندی عائد ہے۔ ڈپٹی کمشنر کیپٹن ر علی اعجاز نے کہا ہے کہ خطرناک ڈور کی خرید و فروخت پر پابندی کو سختی سے نافذ کیا جائے گا، اور قانون شکن عناصر کے خلاف فوراً ایف آئی آر درج کی جائے گی اور سخت کارروائی کی جائے گی۔