نیٹ میٹرنگ صارفین کے لئے بلنگ پالیسی میں تبدیلی نافذ، صارفین کیلئے ایکسپورٹ ریٹ میں 66 پیسے کمی

لیسکو کی نئی بلنگ پالیسی

لاہور (آئی این پی) لیسکو نے نیٹ میٹرنگ صارفین کے لیے بلنگ پالیسی میں تبدیلی نافذ کردی ہے۔ وزارتِ توانائی کی ہدایت پر نیٹ میٹرنگ بلنگ میکانزم تبدیل کر دیا گیا ہے جس کے تحت نیٹ میٹرنگ صارفین کے لیے ایکسپورٹ ریٹ میں 66 پیسے کی کمی کردی گئی ہے۔

یہ بھی پڑھیں: ڈی پی او چکوال نے قحبہ خانوں کیخلاف سخت کارروائی کی ہدایت کردی

ایکسپورٹ ریٹ میں کمی

لیسکو کے آئی ٹی ڈائریکٹوریٹ نے نوٹیفکیشن بھی جاری کردیا ہے۔ فی یونٹ ایکسپورٹ ریٹ 25.98 روپے سے کم ہو کر 25.32 روپے مقرر کردیا گیا ہے۔ نئی بلنگ پالیسی جنوری 2026 کے بلنگ سائیکل سے نافذ العمل ہوگی جبکہ منظور شدہ ڈی جی کپیسٹی سے زائد ایکسپورٹ یونٹس پر پابندی عائد کردی گئی ہے۔

یہ بھی پڑھیں: لاہور تعلیمی بورڈ نے انٹرمیڈیٹ سیکنڈ اینول 2025 پارٹ ون اور ٹو کے امتحانات کا شیڈول جاری کر دیا

یونٹس کی ایڈجسٹمنٹ کا نیا فارمولہ

نوٹیفکیشن کے مطابق اضافی ایکسپورٹ یونٹس کو ڈی جی کپیسٹی کے تناسب سے محدود کیا جائے گا۔ ایکسپورٹ ایم ڈی آئی زیادہ ہونے پر یونٹس ایڈجسٹ کرنے کا نیا فارمولہ متعارف کروایا گیا ہے جبکہ سی پی 22 کے تحت ایکسپورٹ یونٹس کی ایڈجسٹمنٹ جاری رہے گی۔

درست ڈیٹا کی اہمیت

لیسکو کے مطابق نیٹ میٹرنگ صارفین کے لیے ایکسپورٹ ایم ڈی آئی کا درست اندراج لازمی قرار دیا گیا ہے، جبکہ غلط یا نامکمل ڈیٹا پر بلنگ میں مسائل کا خدشہ ہے۔ لیسکو آئی ٹی ڈائریکٹوریٹ نے تمام افسران کو فوری عملدرآمد کی ہدایت جاری کردی ہے۔ ماہرین کا کہنا ہے کہ نئی پالیسی سے نیٹ میٹرنگ صارفین کے مالی فوائد مزید محدود ہونے کا امکان ہے۔