جماعت اسلامی کی سندھ اسمبلی کے سامنے دھرنے کی کوشش، پولیس کا ورکرز پر لاٹھی چارج اور شیلنگ

پولیس کا جماعت اسلامی کے کارکنوں پر تشدد

کراچی(ڈیلی پاکستان آن لائن) سندھ اسمبلی جانے کی کوشش کرنے والے جماعت اسلامی کے کارکنوں پر پولیس کی جانب سے آنسو گیس کی شیلنگ اور لاٹھی چارج کیا گیا۔پولیس نے جماعت اسلامی کے کارکنوں پر شیلنگ کرکے انہیں منتشر کرنے کی کوشش کی، آنسو گیس کی شیلنگ اور لاٹھی چارج سے جماعت اسلامی کا ایک کارکن زخمی ہوگیا۔پولیس نے جماعت اسلامی کا ساؤنڈ سسٹم لگا ٹرک قبضے میں لےکر جماعت اسلامی کے 10 کارکنوں کو حراست میں لے لیا۔جماعت اسلامی کے کارکنوں کے پتھراؤ سے متعدد پولیس اہلکار بھی زخمی ہوئے۔

یہ بھی پڑھیں: کراچی میں دوران واردات شہری کی فائرنگ سے ڈاکو ہلاک

جماعت اسلامی کی مذمت

اس حوالے سے صدر پبلک ایڈ کمیٹی جماعت اسلامی قیصر شریف نے کہا کہ کراچی میں جماعت اسلامی کے پرُامن دھرنے پر پیپلزپارٹی کی ریاستی غنڈہ گردی، شرکاء پر لاٹھی چارج اور آنسو گیس شیلنگ مسلسل جاری نا اہل اور نالائق حکومت سندھ کا رویہ شرمناک ہے، اس کی مذمت کرتے ہیں۔

دھرنے کا اعلان

خیال رہے کہ جماعت اسلامی نے آج 14 فروری کو کراچی کے حقوق کے لیے سندھ اسمبلی کے سامنے دھرنا دینے کا اعلان کیا تھا۔