سوڈان میں جاری خونریز تنازع کا واحد حل بامعنی مذاکرات اور سیاسی عمل کی بحالی ہے: پاکستان

پاکستان کا سوڈان کے بحران پر موقف

اقوام متحدہ (ڈیلی پاکستان آن لائن) پاکستان نے سوڈان میں جاری خونریز تنازع کے تیسرے سال میں داخل ہونے کے موقع پر زور دیا ہے کہ بحران کا واحد قابلِ عمل حل بامعنی مذاکرات اور سیاسی عمل کی بحالی ہے۔ اقوام متحدہ کے سلامتی کونسل کے اجلاس سے خطاب کرتے ہوئے اقوامِ متحدہ میں پاکستان کے نائب مستقل مندوب عثمان جدون نے کہا کہ اس تنازع کا کوئی فوجی حل ممکن نہیں۔ انہوں نے عبوری سوڈانی حکومت کی جانب سے پیش کردہ امن منصوبے اور کوششوں کی حمایت کا اعادہ کیا۔

یہ بھی پڑھیں: بنوں میں شہید ہونیوالے 12سیکیورٹی اہلکاروں کے حوالے سے اہم معلومات سامنے آ گئیں

سوڈانی عوام کی مشکلات

’’اے پی پی‘‘ کے مطابق انہوں نے کہا کہ سوڈانی عوام طویل عرصے سے شدید مشکلات کا سامنا کر رہے ہیں اور اب وقت آ گیا ہے کہ ایک قابلِ اعتماد سیاسی افق بحال کیا جائے۔ پاکستانی مندوب نے خاص طور پر دارفور میں ریپڈ سپورٹ فورسز کی جانب سے مبینہ مظالم کی شدید مذمت کی، جن میں الفاشر اور الجنینہ میں پیش آنے والے واقعات شامل ہیں۔

یہ بھی پڑھیں: ٹرمپ نے اسرائیلی حملوں سے قبل کئی بار نیتن یاہو سے بات کی، سی این این کا دعویٰ

بین الاقوامی برادری کی ذمہ داری

انہوں نے امن دستوں، اقوامِ متحدہ کے عملے اور انسانی امدادی کارکنوں پر حملوں کو ناقابلِ قبول قرار دیتے ہوئے کہا کہ ایسے اقدامات جنگی جرائم کے زمرے میں آ سکتے ہیں اور ذمہ داران کا احتساب ضروری ہے۔

یہ بھی پڑھیں: آدمی نے اپنی بیٹی کی عمر کی لڑکی سے شادی کرلی، دونوں کی عمر میں کتنا فرق ہے؟

سوڈان کی خودمختاری کی حمایت

پاکستان نے اقوامِ متحدہ کے چارٹر کے اصولوں کے تحت سوڈان کی خودمختاری، اتحاد اور علاقائی سالمیت کی مکمل حمایت کا اعادہ کیا۔ پاکستانی مندوب کا کہنا تھا کہ ایک متحد سوڈان نہ صرف اس کے عوام بلکہ افریقہ کے قرن، ساحل اور بحیرہ احمر کے خطے کے امن و استحکام کے لیے بھی ناگزیر ہے۔

پائیدار سیاسی تصفیے کی ضرورت

انہوں نے تمام فریقین پر زور دیا کہ وہ لچک اور دانشمندی کا مظاہرہ کرتے ہوئے پائیدار سیاسی تصفیے کی جانب پیش رفت کریں۔ انسانی صورتحال کو تشویشناک قرار دیتے ہوئے پاکستانی مندوب نے متاثرہ علاقوں تک محفوظ اور بلا رکاوٹ امدادی رسائی کو یقینی بنانے کا مطالبہ کیا اور عالمی برادری سے انسانی امداد کے لیے فنڈز میں فوری اضافے کی اپیل کی۔