یہ تو نہیں ہوا، مگر جو ریپ ہو رہے ہیں، ان کا کیا؟

مجھے یہ معلوم نہیں کہ لاہور کے کسی تعلیمی ادارے میں ایک ریپ ہوا یا یہ واقعہ سوشل میڈیا کے کچھ اکاؤنٹس میں ہی ہوا۔ بظاہر، اب تک کسی بھی فرد، متعلقہ تحقیقاتی اداروں یا سوشل میڈیا ہینڈلرز کو کسی بھی قسم کا کوئی ثبوت نہیں ملا، اور نہ ہی لاہور ہائیکورٹ میں اس مبینہ ریپ کی چھان بین کی درخواست دائر کرنے والے مدعی نے کوئی ثبوت ملنے کا دعویٰ کیا۔

مگر نئی پود کا غصہ پھر بھی ٹھنڈا نہیں ہو پا رہا۔ اسے پختہ یقین ہے کہ اگر کسی کے ہاتھ میں کوئی ثبوت نہیں تو پھر اس بات کا امکان ہے کہ اسے بہت ہی مہارت سے چھپایا جا رہا ہے۔

یہ پریقین شک محض نئی پود کی میراث نہیں بلکہ یہ ترکہ ان بڈھوں سے ورثے میں ملا ہے جنھوں نے دنیا کو اس حد تک پہنچا دیا ہے کہ سیاہ و سفید کے سوا ہر رنگ دکھائی دے رہا ہے۔

مثال کے طور پر، جب امریکی و برطانوی دعووں کے برعکس کسی بھی بین الاقوامی معائنہ کار کو عراق میں وسیع تر تباہی پھیلانے والے ہتھیاروں یا دہشت گردوں کو ان ہتھیاروں کی مبینہ فراہمی کا کمزور سا ثبوت بھی نہیں ملا، تو امریکی وزیر دفاع ڈونلڈ رمزفیلڈ نے چھان بین کے نتائج کو تسلیم کرنے کے بجائے یہ فلسفہ پیش کیا۔

’میں ان رپورٹوں سے ہمیشہ لطف اندوز ہوتا ہوں جن میں کہا گیا ہو کہ جو آپ سوچ رہے ہیں ویسا کچھ نہیں، حالانکہ کچھ باتوں کے بارے میں ہم سب جانتے ہیں کہ یہ ہمیں معلوم ہیں۔ کچھ باتوں کے بارے میں ہمیں یہ پتہ ہے کہ ہم نہیں جانتے، مگر کچھ باتیں ایسی بھی ہیں جن کے بارے میں ہمیں نہیں معلوم کہ ہم ان سے لاعلم ہیں۔ اس کا یہ مطلب نہیں کہ جن باتوں سے ہم لاعلم ہیں ان کا وجود ہی نہیں۔‘

بہرحال، سب قصور ان بچے بچیوں کا بھی نہیں جو رمزفیلڈ کی طرح عدم وجود کو وجود ثابت کرنے پر تلے ہوئے ہیں۔ شاید تعلیمی اداروں کے اندر اور باہر انہیں بے یقینی کے بادلوں تلے اتنی سماجی و سیاسی گھٹن محسوس ہوتی ہو کہ اندر ابلتے لاوے کو باہر آنے کے لیے کوئی بھی بہانہ غنیمت ہو۔

اب بوئے گل نہ بادِ صبا مانگتے ہیں لوگ

وہ حبس ہے کہ لو کی دعا مانگتے ہیں لوگ

(جوش صاحب)

آخر یہ نوبت کیونکر آئی کہ اب سچائی کو بھی کوئی فیس ویلیو پر قبول کرنے کو آمادہ نہیں۔ اس کا ایک ذمہ دار شاید وہ میڈیا ہے جسے آدھے سچ یا من مرضی سچ کی پیداواری فیکٹری میں اسٹیبلشمنٹ نے خاصی حد تک کامیابی سے جھونک دیا ہے۔

وہ دن ہوا ہوئے جب تفتیشی صحافت کی حوصلہ افزائی اور قدر ہوتی تھی۔ اب تو ’بلیک میل ہو جاؤ یا بلیک میل کر لو‘ کا چلن ہے۔ کڑوی سچائی کے پیچھے نامعلوم افراد اور مذہبی و سیاسی گماشتے چھوڑ دیے گئے ہیں۔ عوام کے براہ راست بنیادی مفادات و سلامتی سے متعلق اطلاعات اور اندر خانے گھٹالوں تک رسائی علاقہِ ممنوعہ قرار پا چکی ہے۔ ہر محکمے، میڈیا ہاؤس اور سوچنے والے دماغوں نے اپنے خرچے پر سیلف سینسرشپ مشینیں نصب کر لی ہیں۔

اس سے اور تو کچھ نہیں ہوا، سچ کے پیاسے عام آدمی کے انفرادی و اجتماعی یقین نے خود کشی کر لی۔ اب اس کے کندھے پر اگر کوئی مہربان ہاتھ بھی محسوس ہو تو وہ مطمئن ہونے کے بجائے یہ سوچ کے لرز جاتا ہے کہ جانے اس مہربانی کے پیچھے کون کون سی برائی کھڑی ہے۔ نوبت یہ ہے کہ سایہ سائے سے ڈر رہا ہے۔