اگر میری داڑھی ہے تو کیا میں صرف مُلّا ہی بن سکتا ہوں؟

اداکار عدنان شاہ ٹیپو کا کہنا ہے کہ پاکستانی فلموں اور ڈراموں میں فنکار کی اداکاری کی قابلیت سے زیادہ اس کی ظاہری شکل و صورت کو ترجیح دی جاتی ہے۔

دو دہائیوں سے زائد عرصے سے پاکستانی ڈراموں میں منفرد اداکاری کا مظاہرہ کرنے والے ٹیپو اس وقت دو پاکستانی ڈرامہ سیریلز میں نظر آ رہے ہیں، جہاں دونوں میں وہ ایک ’مولوی‘ کا کردار ادا کر رہے ہیں۔

تاہم، یہ دونوں کردار آپس میں بالکل مختلف ہیں۔

ایک انٹرویو میں ٹیپو نے بتایا کہ ڈرامہ ’من جوگی‘ کا مولوی کافی ’سپریسڈ‘ ہے جبکہ ’زرد پتوں کا بن‘ میں وہ ایک ’لبرل مولوی‘ کے روپ में ہیں جو ’عورتوں کی تعلیم کے حق میں ہیں۔‘

ٹیپو ان ’ورسٹائل‘ اداکاروں میں شامل ہیں جنہیں مختلف رولز کو حقیقت کے قریب لانے کے لئے سراہا جاتا ہے۔

’زرد پتوں کا بن‘ میں فیملی پلاننگ جبکہ ’من جوگی‘ میں حلالہ کے موضوعات پر بات کی گئی ہے، جو کہ پاکستان کے روایتی معاشرے کے لئے سنجیدہ نوعیت کے ہیں۔

لیکن ٹیپو کا کہنا ہے کہ پاکستان میں بعض اوقات اداکاری سے زیادہ کسی اداکار کے ظاہری عناصر کی اہمیت دی جاتی ہے۔ وہ کہتے ہیں کہ 'بڑ سرحدی ملک میں دیکھیں تو نواز الدین صدیقی پر فلمیں بن رہی ہوتی ہیں، جبکہ یہاں اگر ایسی کوئی فلم بنے گی تو اس کے لیے بھی آپ ایسے لوگوں کو منتخب کریں گے جو اس کردار میں فٹ نہیں ہو رہے۔ اس سے نقصان آپ کا بھی اور ان کا بھی ہو گا۔'

وہ پاکستانی ڈراموں اور فلموں کا موازنہ کرتے ہوئے کہتے ہیں کہ 'دنیا بھر میں کرداروں کو دیکھا جاتا ہے، ایکٹنگ سکلز پر توجہ دی جاتی ہے، افسوس کہ ہمارے یہاں ایسا نہیں ہوتا۔'

وہ مزید کہتے ہیں کہ 'ہم کچھ مختلف طرح کی فلمیں بناتے ہیں، موجودہ کہانیوں میں ہم اس طرح سے فٹ نہیں ہوتے۔ ہم لڑکی کے والد، گلی کے غنڈے یا اسی قسم کے کرداروں میں اپنا کام نمٹاتے ہیں۔'

'جب کرداروں پر فلمیں نہیں بنیں گی تو پھر ہمارے جیسے لوگوں کو کم مواقع ملیں گے۔'

‘اگر میری داڑھی ہے تو کیا میں صرف مُلّا کا کردار ہی کر سکتا ہوں؟’

ٹیپو نے 1998 میں اپنے اداکاری کی کیریئر کا آغاز کیا۔ ان 26 سالوں میں ہم نے انہیں اکثر معاون کاسٹ یا سائیڈ رولز میں ہی دیکھا ہے، چاہے وہ کردار سنجیدہ ہوں یا مزاحیہ۔

وہ بتاتے ہیں کہ 'چیزیں بدلی ہیں پر اتنی نہیں جتنی ہمسائے ملک میں یا پوری دنیا میں۔ جب مارکیٹنگ والے ڈومیننٹ کرنا شروع کر دیں کہ انھیں کیا چاہیے تو اس سے کام پر فرق پڑتا ہے۔'

ٹیپو کو بہترین اداکار اور بہترین سپورٹنگ اداکار کی کیٹگری کے 51 مختلف ایوارڈز مل چکے ہیں۔ وہ کہتے ہیں کہ 'جو میرے پاس ہے، میں اسی میں خوش ہوں۔ جو نہیں ملا اس کے بارے میں سوچتا ہی نہیں۔'

'اس سے آپ کو تکلیف ہوتی ہے۔ میں کیریکٹر ایکٹر ہوں۔ میں نے تو اپنے آپ کو ہمیشہ ہیرو ہی سمجھا، چاہے میں ولن تھا یا دو سینز کے لیے تھا۔'

'مجھے لگتا ہے آپ کا کام ہی آپ کو ہیرو یا زیرو بناتا ہے۔'