منصور علی شاہ، منیب اختر یا یحییٰ آفریدی: پاکستان کے نئے چیف جسٹس کی تقرری کا عمل شروع

حال ہی میں، وہ پاکستان تحریکِ انصاف کو مخصوص نشستوں کی الاٹمنٹ کے معاملے میں ان آٹھ ججوں میں سے ایک تھے جنھوں نے اکثریتی فیصلہ عمران خان کی جماعت کے حق میں دیا تھا۔ اس فیصلے کے بعد انھی ججوں نے اپنے فیصلے پر عملدرآمد سے متعلق دو وضاحتی بیانات بھی جاری کیے لیکن الیکشن کمیشن نے ابھی تک اس عدالتی فیصلے پر عمل نہیں کیا۔

جسٹس منصور علی شاہ نے عدالتی نظام میں بہت سی اصلاحات متعارف کروائی ہیں اور وہ ججوں کی کارکردگی کو جانچنے کے لیے بھی عدالتی اصلاحات پر زور دیتے رہے ہیں۔

یہ بھی پڑھیں: وکلاء اور حکومت ایک ہی ٹیم کی طرح کام کر رہے ہیں: وزیر قانون پنجاب صہیب احمد بھرتھ

جسٹس منیب اختر

جسٹس منیب اختر کا تعلق لاہور سے ہے اور وہ پاکستان مسلم لیگ نون کے دور میں وزیر قانون رہنے والے وکیل خالد انور کے داماد ہیں۔

لاہور میں ایچیسن کالج سے تعلیم حاصل کرنے والے منیب اختر امریکہ سے قانون کی اعلیٰ تعلیم حاصل کر چکے ہیں۔

انھوں نے بطور وکیل اپنا کریئر کراچی سے شروع کیا، جس کے بعد 2009 میں انھیں سندھ ہائیکورٹ کا ایڈیشنل جج تعینات کیا گیا اور دو برس بعد وہ اس عہدے پر مستقل کر دیے گئے۔

سنہ 2018 میں، سپریم کورٹ کے سابق چیف جسٹس میاں ثاقب نثار کے دور میں، جسٹس منیب اختر کو ایسے وقت سپریم کورٹ کا جج تعینات کیا گیا جبکہ سندھ ہائی کورٹ کے چار جج ان سے سینیئر تھے۔

سابق چیف جسٹس عمر عطا بندیال کے دور میں، جسٹس منیب اختر زیادہ تر ایسے بینچز کا حصہ رہے جو آئینی نوعیت کے مقدمات کی سماعت کر رہے تھے۔ ان دونوں کے ساتھ تیسرے جج جسٹس اعجاز الااحسن تھے جنھوں نے رواں برس کے آغاز میں استعفیٰ دے دیا تھا۔

اسی دور میں سپریم کورٹ کے موجودہ چیف جسٹس، جسٹس قاضی فائز عیسی کے خلاف صدارتی ریفرنس کی سماعت کے دوران، جسٹس منیب اختر کے چیف جسٹس کی اہلیہ کے ساتھ بھی تلخ جملوں کے تبادلے کے کئی واقعات پیش آئے تھے۔

جسٹس منیب اختر نے آئین کے آرٹیکل 63 اے سے متعلق صدارتی ریفرنس پر وہ متنازع فیصلہ بھی دیا تھا جس میں پارلیمانی لیڈر کی ہدایت کے خلاف ووٹ دینے پر رکنِ پارلیمان کی نااہلی کے ساتھ ساتھ اس ووٹ کو شمار نہ کرنے کو کہا گیا تھا۔ اسی فیصلے کی روشنی میں پنجاب میں مسلم لیگ ن کے وزیر اعلیٰ حمزہ شہباز کی حکومت کو ختم کیا گیا تھا۔

سپریم کورٹ نے حال ہی میں اس عدالتی فیصلے کے خلاف نظرثانی کی اپیل میں اس فیصلے کو کالعدم قرار دے دیا ہے اور کہا کہ یہ عدالتی فیصلہ کسی طور پر بھی آئین کے مطابق نہیں تھا۔

نظرثانی کی اس درخواست میں چیف جسٹس نے جسٹس منیب اختر کو اس بینچ میں شامل ہونے کا کہا تھا، لیکن انھوں نے اس بینچ کی تشکیل پر تحفظات کا اظہار کیا تھا اور وہ اس بینچ کا حصہ نہیں بنے تھے۔

یہ بھی پڑھیں: گنڈا پور نے آئینی ترمیم کیخلاف احتجاج کی دھمکی دے دی

جسٹس یحییٰ آفریدی

پاکستان کے صوبہ خیبر پختونخوا کے قبائلی ضلع سے تعلق رکھنے والے جسٹس یحییٰ آفریدی اس وقت سپریم کورٹ میں سینیارٹی کے لحاظ سے تیسرے نمبر پر ہیں۔

جسٹس منصور علی شاہ کی طرح، انھوں نے بھی قانون کی ابتدائی تعلیم پاکستان سے حاصل کرنے کے بعد برطانیہ کی کیمبرج یونیورسٹی سے اعلیٰ تعلیم حاصل کی ہوئی ہے۔

سنہ 2010 میں پشاور ہائی کورٹ کا ایڈیشنل جج تعینات ہونے سے پہلے، وہ آفریدی، شاہ اور من اللہ لا فرم کا حصہ تھے۔

2012 میں جب انھیں پشاور ہائی کورٹ کا مستقل جج تعینات کیا گیا تو انھوں نے اس ادارے سے علیحدگی اختیار کر لی تھی۔

ہائیکورٹ میں چار سال کام کے بعد 30 دسمبر 2016 کو جسٹس آفریدی کو پشاور ہائی کورٹ کا چیف جسٹس تعینات کیا گیا۔

اس عرصے کے دوران جب سابق فوجی صدر پرویز مشرف کے خلاف آئین شکنی کا مقدمہ چل رہا تھا تو انھوں نے کچھ عرصے کے لیے اس خصوصی بینچ کی سربراہی کی تاہم پھر وہ اس بینچ سے الگ ہو گئے تھے۔

پشاور ہائیکورٹ میں چھ برس کا عرصہ گزارنے کے بعد 28 جون 2018 کو انھیں سپریم کورٹ کا جج تعینات کیا گیا۔

جسٹس یحییٰ آفریدی نے موجودہ چیف جسٹس قاضی فائز عیسی کے خلاف دائر صدارتی ریفرنس میں قاضی فائز عیسی کی درخواست کو مسترد کیا تھا۔

تاہم حال ہی میں وہ چیف جسٹس کے ساتھ ان چار ججوں میں شامل تھے جنھوں نے مخصوص نشستیں پاکستان تحریک انصاف کو الاٹ کرنے کی مخالفت کی تھی۔

جسٹس یحییٰ آفریدی کی عمر اس وقت 59 سال ہے اور اگر ان کا نام بطور چیف جسٹس منظور کر لیا جاتا ہے تو پھر بھی انھیں ریٹائرمنٹ کی مقررہ عمر تک پہنچنے سے تین برس قبل ہی ریٹائر ہونا پڑے گا۔

اس کی وجہ 26 ویں آئینی ترمیم ہے جس میں یہ کہا گیا ہے کہ ملک کے چیف جسٹس کا تقرر تین سال کے لیے ہو گا اور یہ مدت مکمل ہونے کے بعد اس چیف جسٹس کو ریٹائر ہی سمجھا جائے گا چاہے وہ 65 سال کی عمر کو نہ بھی پہنچا ہو۔

’جسٹس منصور عدالتی اصلاحات کے بہت بڑے حامی ہیں‘

پاکستان بار کونسل کے سابق وائس چیئرمین امجد شاہ نے بتایا کہ سپریم کورٹ کے ان تین ججز میں جسٹس منصور علی شاہ اور جسٹس یحیی آفریدی کا قانونی کیریئر بہت بہتر ہے اور وہ دونوں ہائی کورٹ کے چیف جسٹس بھی رہ چکے ہیں، جس سے انہیں انتظامی امور کا تجربہ بھی حاصل ہے۔

انہوں نے بات کرتے ہوئے کہا کہ جسٹس منصور علی شاہ اور جسٹس یحیی آفریدی نے متعدد ایسے فیصلے دیے ہیں جنہیں وکلا کی برادری میں بڑی عزت دی جاتی ہے۔

انہوں نے کہا کہ جسٹس منیب اختر کو سینیارٹی کے اصول کی خلاف ورزی کرتے ہوئے سپریم کورٹ کا جج بنایا گیا تھا، جس پر وکلا برادری نے احتجاج بھی کیا تھا۔

امجد شاہ کا کہنا تھا کہ چونکہ وہ سپریم کورٹ میں بھی پیش ہوتے رہے ہیں جبکہ جسٹس منیب اختر معمولاً گیارہ بجے تک مقدمات کی سماعت کے لئے دستیاب ہوتے تھے اور گیارہ بجے کے بعد وہ مقدمات کی سماعت نہیں کرتے تھے۔

انہوں نے بتایا کہ چیف جسٹس قاضی فائز عیسیٰ نے بھی جسٹس منیب اختر کو جو خط لکھا، اس میں ان کی گیارہ بجے کے بعد عدم دستیابی کا ذکر کیا گیا جبکہ ان کے جونیئر ججز اور خاص طور پر ایڈہاک ججز کے ساتھ بدتمیزی اور ناروا سلوک کا بھی ذکر ہوا۔

چوہدری اکرام ایڈووکیٹ نے کہا کہ سوشل میڈیا اس قدر ترقی کر چکا ہے کہ جو جج سوشل میڈیا پر وائرل ہو جاتا ہے، اس کے بارے میں کہا جاتا ہے کہ وہ بہتر جج ہے، حالانکہ حقیقت میں ایسا نہیں ہے۔

انہوں نے کہا کہ جسٹس منصور علی شاہ عدالتی اصلاحات کے بہت بڑے حامی ہیں اور وہ خود بھی کہتے ہیں کہ کسی بھی اہم عہدے کے لئے سنیارٹی کے ساتھ ساتھ قابلیت کو بھی مدنظر رکھنا چاہیے۔

انہوں نے مزید کہا کہ جسٹس یحیی آفریدی نے کبھی بھی کسی معاملے میں اپنے آپ کو متنازع نہیں بنایا اور وہ آئین اور قانون کے مطابق فیصلے دیتے رہے، جبکہ جسٹس منیب اختر کئی مقدمات کی سماعت میں اپنے ریمارکس اور رویے کی وجہ سے متنازع رہے ہیں۔