بجلی ہو نہ ہو، ادائیگی کرنا ہوگی، نیپرا نے کے الیکٹرک صارفین پر بم گرادیا

اسلام آباد(ڈیلی پاکستان آن لائن) نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے آئندہ 7 سال کے جنریشن ٹیرف کی منظوری دے دی۔

کاپیسٹی پیمنٹ کی شرائط

بجلی استعمال ہو یا نہ ہو، کپیسٹی پیمنٹ کرنا پڑے گی۔ نیپرا نے کے الیکٹرک کی درخواست پر فیصلہ جاری کردیا ہے۔

جنریشن ٹیرف کی تفصیلات

کے الیکٹرک کے جنریشن ٹیرف ڈیزل پر 44 روپے 33 پیسے سے 50 روپے 75 پیسے فی یونٹ تک منظوری دی گئی ہے۔

اس کے علاوہ ایل این جی پر جنریشن ٹیرف 20 روپے 67 پیسے سے 41 روپے 75 پیسے فی یونٹ تک منظور کیا گیا ہے۔

فرنس آئل پر جنریشن ٹیرف 33 روپے 31 پیسے سے 34 روپے 64 پیسے فی یونٹ تک مقرر کیا گیا ہے جبکہ گیس پر فی یونٹ جنریشن ٹیرف 6 روپے 83 پیسے سے 9 روپے 62 پیسے تک مقرر کیا گیا ہے۔

کے الیکٹرک کا بیان

دوسری جانب کے الیکٹرک کا کہنا ہے کہ یہ فیصلہ ادارے کے لئے ایک اہم سنگ میل ہے جس سے ادارہ اپنے جامع سرمایہ کاری پلان کو حاصل کرنے میں مثبت کردار ادا کرے گا۔ یہ منصوبہ کمپنی کی ٹرانسمیشن اور ڈسٹری بیوشن میں ہونے والے نقصانات کو کم کرنے، اس کے کسٹمر بیس میں اضافے اور پاور یوٹیلیٹی کے بنیادی ڈھانچے کو موجودہ مطالبات اور مستقبل کی ضروریات کو پورا کرنے کے لئے کی جانے والی کوششوں پر مشتمل ہے۔

ریگولیٹری اتھارٹی کے ساتھ تعاون

کے الیکٹرک کے مطابق ادارہ نیپرا کی طرف سے جاری کردہ مکمل اور وسیع فیصلے کا جائزہ لے رہا ہے، کمپنی اس بات کو یقینی بنانے کے لئے ریگولیٹری اتھارٹی کے ساتھ سرگرم عمل ہے کہ یہ تبدیلیاں ایک مستحکم، پائیدار توانائی کے ماحولیاتی نظام کی تعمیر کے وژن کے مطابق ہوں۔