پاڑہ چنار کا ملک کے دیگر حصوں سے رابطہ بدستور منقطع: دو سال بعد سعودی عرب سے پاکستان آیا ہوں مگر اب تک گھر نہیں پہنچ سکا۔

لائق حُسین کا کہنا ہے کہ ’پارہ چنار سے ہم جتنے پیسے علاج کے لیے اپنے ساتھ لائے تھے وہ سب ختم ہو چکے ہیں، کچھ ہسپتال میں علاج پر لگ گئے اور جو باقی تھے وہ رہنے کے اخراجات پر خرچ ہو گئے۔ اب اس ساری صورتحال کی وجہ سے ہم یہاں پشاور میں پریشان ہیں اور گھر والے پارا چنار میں ہیں۔‘

ضلع کرم اہم کیوں ہے؟

پاکستان کی شمال مغربی سرحد پر واقع ضلع کرم کا جغرافیہ اور اس کی آبادی اسے منفرد بناتے ہیں۔ یہ پاکستان کا واحد قبائلی ضلع ہے جہاں آبادی کی اکثریت کا تعلق اہل تشیع سے ہے۔

اگر آپ پاکستان کے نقشے پر کرم کو تلاش کریں تو آپ کو علم ہو گا کہ یہ ضلع تین اطراف سے افغانستان جبکہ ایک جانب پاکستان کے ساتھ جڑا ہوا ہے۔ اس کے جغرافیہ کی وجہ سے ہی کرم کو کسی زمانے میں ’پیرٹس بیک‘ یعنی ’طوطے کی چونچ‘ کہا جاتا تھا اور افغانستان میں سویت یونین کے خلاف جنگ کے دوران اس ضلع کی سٹریٹیجک اہمیت میں اسی وجہ سے اضافہ ہوا۔

کرم پاکستان کے کسی بھی شہر کے مقابلے میں افغانستان کے دارالحکومت کابل کے قریب ترین ہے اور یہ افغانستان میں خوست، پکتیا، لوگر اور ننگرہار جیسے صوبوں کے سرحد پر بھی واقع ہے جو شیعہ مخالف شدت پسند تنظیموں داعش اور تحریک طالبان کا گڑھ ہیں۔

اس علاقے میں جیش محمد اور سپاہ صحابہ جیسی کالعدم شدت پسند تنظیموں کی موجودگی بھی ہے۔ ضلع کرم کا صدر مقام پارہ چنار ہے جہاں آبادی کی اکثریت اہلِ تشیع مسلک سے تعلق رکھتی ہے۔

پارہ چنار پاکستان کے دیگر علاقوں سے صرف ایک سڑک کے راستے جڑا ہوا ہے جو لوئر کرم میں صدہ کے علاقے سے گزرتی ہے جو سُنی اکثریت آبادی پر مشتمل ہے۔

’کُرم‘ کا لفظ دریائے کرم سے منسوب ہے جو ضلع کے اطراف سے گزرتا ہے۔ یہ ضلع تین حصوں میں تقسیم ہے یعنی اپر کرم، سینٹرل اور لوئر کرم۔ اس علاقے کو کوہ سفید کے بلند و بالا پہاڑی سلسلے نے افغانستان سے جدا کیا ہوا ہے جو تقریباً سارا سال برف سے ڈھکا رہتا ہے۔

رواں سال اگست کے مہینے میں پاکستان کے صوبہ خیبرپختونخوا کے ضلع کرم میں ایک بار پھر شروع ہونے والے فرقہ ورانہ فسادات کے دوران کم از کم 43 افراد ہلاک اور 150 سے زیادہ زخمی ہوئے، ساتھ ہی ساتھ چھ روز تک علاقے کے باسیوں کا رابطہ ملک کے دیگر حصوں سے منقطع ہو گیا۔

زمین کی ملکیت کا تنازع کیوں اور کہاں کہاں ہے؟

ضلع کرم کا شمار ملک کے قدیم ترین قبائلی علاقوں میں ہوتا ہے۔ غیر منقسم ہندوستان میں انگریز دورِ حکومت کے دوران 1890 کی دہائی میں اس قبائلی علاقے کو باقاعدہ طور پر آباد کیا گیا اور اس کے بعد یہاں زمینوں کی تقسیم شروع ہوئی۔

وہی زمینیں جن کی ملکیت پر آج اختلافات اس قدر بڑھ جاتے ہیں کہ ہر چند ماہ بعد درجنوں افراد اپنی جانوں سے ہاتھ دھو بیٹھتے ہیں۔

اس کی وجہ یہ ہے کہ کرم کے زیادہ تر علاقوں میں زمین کا ریکارڈ آج تک موجود نہیں ہے۔ زمین کے ریکارڈ کی عدم موجودگی کے باعث مختلف قبائل اور افراد ضلع میں مختلف مقامات پر زمین کے ٹکڑوں کی ملکیت کے دعویدار ہیں۔

خیال رہے کہ پارہ چنار کی زمین قبائلی علاقوں کی زرخیز ترین زمینوں میں شمار ہوتی ہے۔ یہاں کی فصلیں جیسے چاول، سبزیاں اور میوہ جات مشہور ہیں، جن کی خاصی شہرت ہے، جس کی وجہ سرسبز و شاداب زمین اور پانی کے وافر ذخائر ہیں۔

کہا جاتا ہے کہ اس علاقے کے چاول اتنے مشہور ہیں کہ پرانے وقتوں میں لوگ انہیں کھانے کے لیے خصوصی طور پر اپنے رشتہ داروں کے ہاں کرم جایا کرتے تھے۔

آج یہاں زمین کا تنازع کم از کم پانچ مختلف مقامات پر موجود 10 یا اس سے زیادہ دیہاتوں اور قبائل کے درمیان پھیلا ہوا ہے، جس میں زمین کے ساتھ ساتھ مسلک کی تقسیم بھی موجود ہے۔ یعنی متنازعہ زمینوں پر اہل تشیع اور سنی مسلک سے تعلق رکھنے والوں کا دعویٰ ہے۔

کرم میں فرقہ وارانہ اور زمین کے تنازعات کی تاریخ تو پرانی ہے، مگر اب ضلعی انتظامیہ کے مطابق گرینڈ جرگے نے حالات کو معمول پر لانے اور مسئلے کا حل تلاش کرنے کے لیے اپنی کوششیں شروع کر دی ہیں۔