مغل بادشاہ اکبر کے آخری ایام: باغی بیٹے کے ساتھ اختلافات کی کہانی

یہ بھی پڑھیں: سپین میں پاکستانی کمیونٹی کے مسائل کے حل کے لیے سوشلسٹ پارٹی کے رہنماؤں سے ملاقات

اکبر کی سلیم کو ’وارننگ‘

مارچ 1602 میں سلیم نے اکبر کو پیغام بھیجا کہ وہ ان سے مل کر ان کے لیے عزت و تکریم کا اظہار کرنا چاہتا ہے تاہم اکبر نے سلیم سے ملنے سے انکار کر دیا۔ پھر خبر آئی کہ سلیم 30 ہزار سپاہیوں کے ساتھ آگرہ کی جانب بڑھ رہے ہیں۔

ابوالفضل لکھتے ہیں کہ ’اکبر نے سلیم کو سخت پیغام بھیجا کہ اگر وہ اپنی خیریت چاہتے ہیں تو واپس الہ آباد لوٹ جائیں۔ اور اگر وہ حقیقتاً خدمت کا جذبہ رکھتے ہیں تو عدالت میں تنہا حاضر ہوں۔‘

سلیم کی سمجھ میں معاملہ آ گیا اور وہ فوری اٹاوہ سے الہ آباد واپس لوٹ گئے۔ سلیم کو اقتدار کے مرکز سے دور رکھنے کے لیے اکبر نے انھیں بنگال اور اڑیسہ کا گورنر مقرر کیا لیکن سلیم نے وہاں جانے سے انکار کر دیا۔

یہ بھی پڑھیں: کپتان اچھا مل جائے تو ٹیم گراؤنڈ میں پرفارم کرتی ہے: راشد لطیف

سلیم کی معافی

اس دوران اکبر کی والدہ حمیدہ بیگم اور خالہ گلبدن بیگم نے باپ بیٹے کے درمیان کشیدگی کو دور کرنے کی مہم شروع کر دی۔

انھوں نے اکبر سے سلیم کو معاف کرنے کی درخواست کی۔ اکبر ان دونوں عورتوں کا بہت احترام کرتے تھے، اس لیے انھوں نے یہ درخواست مان لی۔ انھوں نے اپنی ایک بیوی سلمیٰ سلطان بیگم کو بھیجا کہ سلیم کو اپنے ساتھ واپس لائیں۔

ابوالفضل لکھتے ہیں ’اکبر نے ان کے ساتھ ایک ہاتھی، ایک گھوڑا اور ایک لباس سلیم کو تحفے کے طور پر بھیجا تھا۔ جب سلیم سلمیٰ کے ساتھ آگرہ کے قریب پہنچے تو انھوں نے درخواست کی کہ ان کی دادی ہاتھ پکڑ کر بادشاہ کے سامنے لے جائیں تاکہ وہ اکبر کے قدموں میں اپنا سر رکھ سکیں۔‘

اگلے دن شہزادہ سلیم نے اکبر کے قدموں میں سر رکھ کر ان سے معافی مانگی۔ اکبر نے انھیں گلے لگایا اور 350 ہاتھی اور 12 ہزار سونے کے سکے تحفے میں دیے۔

سلیم کے دماغ کو پرسکون کرنے کے لیے اکبر نے اپنی دستار اتار کر اپنے بیٹے کے سر پر رکھ دی۔ یہ اس بات کا اشارہ تھا کہ اکبر کے جانشین کے طور پر سلیم کی حیثیت میں کوئی فرق نہیں تھا۔

یہ بھی پڑھیں: ورلڈ ٹائٹل فائٹ: پاکستانی باکسر شعیب خان کا افغان باکسر سے مقابلہ 8 نومبر کو ہوگا

والدہ حمیدہ بانو کا انتقال

لیکن 1604 تک سلیم کی بغاوت کی خبر ایک بار پھر اکبر کے کانوں تک پہنچی۔ اکبر نے اس بار فیصلہ کیا کہ وہ خود سلیم کو قابو کرنے جائیں گے۔

شدید بارش کی وجہ سے ان کی روانگی میں تاخیر ہوئی۔ اسی دوران خبر آئی کہ ان کی والدہ حمیدہ بانو شدید بیمار ہیں اور اکبر واپس آگرہ چلے گئے۔

عنایت اللہ ’اکبرنامہ‘ میں لکھتے ہیں کہ ’اکبر اپنی ماں کے پاس بیٹھے رہے۔ کئی بار انھوں نے ماں سے بات کرنے کی کوشش کی لیکن کوئی جواب نہیں ملا۔‘

دنیا میں عظیم ترین بادشاہ کے طور پر پہچان رکھنے والے اکبر اپنی ماں سے آخری بار بات نہ کر سکے۔

29 اگست 1604 کو ہمایوں کی اہلیہ اور اکبر کی والدہ نے بے ہوشی کی حالت میں آخری سانس لی۔ اکبر نے اپنے سر کے تمام بال اور مونچھیں منڈوا دیے، دستار اتار دی اور سوگ کا لباس پہن لیا۔

یہ بھی پڑھیں: ہانگ کانگ کے چڑیا گھر میں انفیکشن پھیل گیا، 12 بندر ہلاک

اکبر کی طبیعت بگڑ گئی

ان واقعات کے بعد سلطنت کے انتظامی امور پر اکبر کی گرفت کمزور پڑنے لگی۔ اس وقت اکبر کی بنائی گئی تصاویر میں دیکھا جا سکتا ہے کہ ان کے بال سفید ہو چکے تھے اور چہرے پر اداسی کی لکیریں نمایاں تھیں۔

22 ستمبر 1605 کو پیٹ میں درد سے اکبر کی طبیعت بگڑ گئی۔ ان کے معالج حکیم علی جیلانی کو بلایا گیا۔ ڈاکٹر نے بادشاہ سے کہا کہ کوئی دوا لینے سے پہلے ایک دن تک کچھ کھانا پینا نہیں ہے۔

اگلے دن انھیں پینے کے لیے صرف سوپ دیا گیا۔ ان کے پوتے خسرو بیماری کے دوران ان کے بستر پر موجود رہے لیکن اکبر کے معالج حاکم علی نہیں جان سکے کہ انھیں کیا بیماری ہے۔

عنایت اللہ ’اکبر نامہ‘ میں لکھتے ہیں کہ ’اپنی بیماری کے ابتدائی دنوں میں، اکبر نے ہر روز جھروکھا درشن کی رسم ادا کی کیونکہ وہ عام لوگوں کو یہ تاثر نہیں دینا چاہتے تھے کہ وہ شدید بیمار ہیں۔ لیکن پھر انھوں نے بستر پکڑ لیا۔ لیکن اس کے باوجود وہ شاہی احکامات دیتے رہے۔ لیکن 10 دن کے بعد انھیں بخار آگیا اور ان کا جسم کمزور ہو گیا۔‘

یہ بھی پڑھیں: سلمان نے ایشوریا کا کندھا فریکچر کیا، مجھے ملازم نے بچایا، سابقہ گرل فرینڈ سومی علی نے الزام لگا دیا

سلیم کی جگہ خسرو کو تخت پر بٹھانے کی مہم

اکبر کے آخری دنوں میں اکبر کے دو قریبی ساتھیوں مان سنگھ اور عزیز کوکا نے اپنے جانشین کے انتخاب کے لیے اجلاس بلایا۔

ان دونوں نے اجلاس کے شرکا کو یاد دلایا کہ اکبر کا رجحان سلیم کے حق میں نہیں تھا۔

اسد بیگ اپنی کتاب ’وقائعِ اسد بیگ‘ میں لکھتے ہیں کہ ’مان سنگھ اور عزیز نے اجلاس میں موجود لوگوں سے کہا کہ اکبر سلیم کو اپنا جانشین نہیں بنانا چاہتے تھے۔ انھوں نے سلیم کی جگہ خسرو کا نام تجویز کیا لیکن اکبر کے ایک اور درباری سعید خان برہہ نے سلیم کی حمایت کی اور اجلاس سے اٹھ کرچلے گئے۔‘

سلیم نے جمنا ندی کے دوسری طرف اپنا پڑاؤ ڈال رکھا تھا۔

ایرا مکھوتی اپنی کتاب ’اکبر دی گریٹ مغل‘ میں لکھتی ہیں کہ ’راجہ مان سنگھ نے سلیم کے تخت پر دعویٰ کرنے کے امکان کو ختم کرنے کی کوشش کی۔ یہاں تک کہ جب سلیم کشتی کے ذریعے آگرہ کے قلعے میں آئے تو انھوں نے اسے گرفتار کرنے کی کوشش بھی کی۔‘

لیکن سلیم کو پہلے ہی خبردار کر دیا گیا تھا کہ وہ قلعہ میں داخل نہ ہوں ورنہ انھیں گرفتار کر لیا جائے گا۔ وہ کشتی کے ذریعے واپس اپنی حویلی چلے گئے۔

سلیم اپنی حویلی میں اپنے مستقبل کے بارے میں فیصلے کا انتظار کرنے لگے۔ شام تک ہوا کا رخ سلیم کے حق میں ہو چکا تھا۔ سب سے پہلے شیخ فرید اور سعید خان برہہ مبارکباد دینے آئے۔

اس کے بعد اکبر کے درباریوں کی ایک بڑی تعداد ان کی حمایت میں آ گئی۔ سعید خان نے سلیم سے وعدہ کیا کہ تخت پر آنے کے بعد وہ خسرو یا ان لوگوں کو سزا نہیں دیں گے جنھوں نے پہلے سلیم کا ساتھ نہیں دیا تھا۔

شام تک مرزا عزیز کوکا جو سلیم کے مخالف تھے وہ بھی مبارکباد دینے پہنچے لیکن سلیم نے اس کے ساتھ بدتمیزی نہیں کی۔

جب مان سنگھ کو یقین ہو گیا کہ خسرو کو کوئی نقصان نہیں پہنچے گا تو وہ خود انھیں اسے سلیم کے پاس لے گئے۔

اکبر کی وفات

مونس فاروقی اپنی کتاب ’دی پرنس آف دی مغل ایمپائر‘ میں لکھتے ہیں کہ ’اپنے دورِ حکومت کے آخر تک اکبر کسی طرح سلیم کے مغلیہ تخت کے دعوے کو ناکام بنانے کی کوشش کرتے رہے۔‘

سلیم اپنے والد کی خواب گاہ میں داخل ہوئے تو شہنشاہ اکبرابھی تک سانس لے رہے تھے۔

اپنے والد کی ہدایت پر انھوں نے اکبر کا تاج اور کپڑے پہنے اور اکبر کی تلوار کمر پر لٹکا دی۔ یہ تلوارمغل بادشاہ بابر کی تھی۔ انھوں نے اپنی موت سے کچھ عرصہ قبل ہمایوں کو بھی دی تھی۔

سلیم نے باپ کے قدموں میں سر جھکا دیا۔ اسد بیگ لکھتے ہیں ’اکبر نے سلیم کو اپنی آنکھوں سے مغل راج کا تاج پہنتے اور تخت سنبھالتے دیکھا۔‘

شہنشاہ اکبر نے یہ بھی دیکھا کہ ان کے درباری نئے حکمران کے سامنے سر جھکا رہے ہیں۔ اس کے بعد ان کی آنکھیں ہمیشہ کے لیے بند ہو گئیں۔

وہ دن 27 اکتوبر 1605 تھا۔ اس وقت ان کی عمر 63 سال تھی اور انھوں نے انڈیا پر 49 سال حکومت کی تھی۔ پاروتی شرما اکبر کی سوانح عمری ’ہندوستان کے اکبر‘ میں لکھتی ہیں ’اکبر نے سلیم کو نہ صرف اقتدار کی علامت کے طور پر تاج، لباس اور تلوار دی، بلکہ انھوں نے اپنی کچھ ذاتی چیزیں جیسے تسبیح اور خوش بختی کی علامت سمجھا جانے والا ہار بھی سلیم کو سونپ دیا۔‘

اپنے والد کی موت کے ایک ہفتے بعد 36 سالہ سلیم نے ان کی جگہ سنبھال لی۔ اب وہ محض سلیم یا اکبر کے پسندیدہ ’شیخو بابا‘ نہیں رہے تھے۔

ہندوستان کے تخت پر بیٹھنے والے اس شخص کا نیا نام نورالدین محمد جہانگیر تھا۔